Akoʻi ʻa e Niʻihi Kehé ke Nau Maʻu ha ʻAonga
1 ʻOku fiemaʻu ʻe Sihova ʻa e kakai kotoa pē ke nau maʻu ha ʻaonga. (Ai. 48:17) ʻOkú ne ʻiloʻi ʻa e meʻa ʻokú ne ʻomai kiate kitautolu ʻa e fiefia moʻoní. Ko ʻene holi fakamātoató ia ke fakaʻehiʻehi ʻa e faʻahinga ʻo e tangatá mei he fakatuʻutāmakí pea ke fiefia ʻi he moʻuí ʻaki ʻa e tokanga ki heʻene ngaahi fekaú. ʻOku tau maʻu ʻa e ʻaonga lahi mei heʻetau moʻuiʻaki ʻa e founga ʻa e ʻOtuá. (Sāme 34:8) ʻE lava fēfē ke tau akoʻi ʻa e niʻihi kehé ke nau fai ʻa e meʻa tatau?
2 Ko e Hā ʻOku Fiemaʻu ʻe he Kakaí? Ko e hā ʻoku tokanga ki ai ʻa e kau nofoʻapí ʻi he feituʻu ʻokú ke nofo aí? ʻIkai ko e maluʻi ʻo honau ʻapí, ko e mālohinga ʻo ʻenau nofo malí, ko e kahaʻu ʻo ʻenau fānaú, pea mo e ngaahi meʻa peheé? ʻI he taimi ʻoku ʻi ai haʻanau ngaahi palopalemá, ʻoku nau hanga ki fē ki ha tokoní? ʻOku nau falala pē nai kiate kinautolu, ki he ngaahi polokalama tokoniʻi ʻe kita ʻa kita pē, pe ki he tataki ʻa e niʻihi kehé. Lolotonga hono fai ení, kuo puputuʻu ʻa e tokolahi ia ʻi he ngaahi fakakaukau huʻufakehekehe mo taʻeʻaonga ki he founga ko ia ke nau maʻu ʻaonga aí. Kuo pau ke tau fakalotoʻi kinautolu ko e meʻa ʻoku ʻomai ʻe he Folofola ʻa e ʻOtuá ʻi he founga ʻo e tatakí ʻoku lelei lahi ange ia. (Sāme 119:98) Te tau lava ke fai ʻeni ʻaki hono fakahā ange kiate kinautolu ʻa e founga ʻe lava ke nau fakaleleiʻi ai ʻa e anga ʻo ʻenau moʻuí naʻa mo e taimí ni kapau te nau fai ha feinga ke ako ʻa e Tohitapú pea ngāueʻaki ʻa e meʻa ʻokú ne tala maí.—2 Tim. 3:16, 17.
3 Moʻui Fakafāmili Lelei Ange: Ko e kakai tokosiʻi pē ʻoku nau ʻilo ko e hau e ngāue leleí ʻa e akonaki fakamānavaʻi ʻi he Efeso 5:22–6:4 ki hono fakaleleiʻi ʻa e ngaahi palopalema fakafāmilí. Ko e meʻa ʻeni naʻe hoko ki ha ongo meʻa mali, ʻa ia, hili ʻa e taʻu ʻe hongofulu ʻo ʻena nofo malí, naʻá na fakakaukau ke na māvae. Kae kehe, naʻe kamata ha ako Tohitapu mo e uaifí, ʻa ia naʻe akoʻi kiate ia ʻa e ngaahi tefitoʻi moʻoni Fakatohitapu fekauʻaki mo e nofo malí. Naʻe vave ʻa hono fakatokangaʻi ʻe he husepānití ʻa e ngaahi liliu naʻá ne faí ʻi heʻene ngāueʻaki ʻa e ngaahi tefitoʻi moʻoni faka-Tohitapú, pea naʻá ne kau ʻi he akó. Naʻá ne pehē ki mui mai: “He taimi ní kuó ma maʻu ʻa e makatuʻunga ki he moʻui fakafāmili fiefia moʻoní.”
4 Taumuʻa Moʻoni ʻi he Moʻuí: ʻI he taimi naʻe kumi tokoni ai ki he Kau Fakamoʻoní ha talavou kuo maʻu ʻe he faitoʻo kona tapú, naʻe akoʻi ai ia ko Sihová ʻokú ne tokanga mai kiate ia fakafoʻituitui. Naʻá ne pehē: ‘Naʻá ku ako ko e Tokotaha-Fakatupú ʻoku ʻi ai ʻene taumuʻa ki he tangatá pea ʻokú ne tukutauhi mai ʻa e moʻui taʻengatá ki he faʻahinga ʻokú ne hōifua ki aí. ʻOku ʻikai te mou ʻilo mai ʻa e fiefia naʻá ku ongoʻi fekauʻaki mo e meʻá ni. ʻI he ʻahó ni ʻoku ou fiefia ʻi he moʻui lelei, nonga ʻo e ʻatamaí, pea mo ha vahaʻangatae vāofi mo e ʻOtuá.’
5 ʻOku ʻikai ha taha ʻe taʻemalava ke ne maʻu ʻa e ʻaonga mei he tokoni ʻaonga ʻoku maʻu ʻi he Folofola ʻa e ʻOtuá. ʻI hono ngāueʻaki ia ko hotau tatakí, ʻoku tau fakapapauʻi ai ko e founga ʻa Sihová ʻoku māʻolunga mamaʻo ange ia ʻi he ngaahi founga ʻa e māmaní. (Sāme 116:12) Ko hotau monū ia ke ʻoatu ʻa e pōpoaki ko ʻení ki he niʻihi kehé, ʻo akoʻi kinautolu ke nau maʻu ha ʻaonga. ʻI heʻetau fai peheé, te tau sio atu ai ki ha ngaahi ola lelei lahi.