Puha Fehuʻi

◼ ʻOku feʻungamālie ke pasipasi ʻi he taimi ʻoku fanongonongo ai ha toe fakafoki mai ʻo ha taha?

ʻI heʻene anga-ʻofá, kuo tokonaki ʻe Sihova ko e ʻOtuá ha founga Fakatohitapu ki he kau faihala fakatomalá ke nau toe maʻu ai ʻa ʻene hōifuá pea aʻusia ai ʻa e toe fakafoki mai ki he fakatahaʻanga Kalisitiané. (Sāme 51:​12, 17) ʻI hono fai ʻení, ʻoku fakalototoʻaʻi mai ai kitautolu ke fakapapauʻi ʻetau ʻofa ki he faʻahinga fakatomala loto-moʻoni peheé.—2 Kol. 2:​6-8.

Naʻa mo ia, neongo ʻetau fiefia ʻi he taimi ʻoku toe fakafoki mai ai ha kāinga pe ko ha maheni, ʻoku totonu ke hoko ha faʻa mataʻofi ʻo fakalongolongo ʻi he taimi ʻoku fanongonongo ai ʻi he fakatahaʻangá ʻa hono toe fakafoki mai ʻo e tokotaha ko iá. Ko e Taua Leʻo ʻo ʻOkatopa 1, 1998, peesi 17, ʻoku fakamatalaʻi ai ʻa e ngaahi meʻá ʻi he founga ko ʻení: “Kae kehe, kuo pau ke tau manatuʻi, ko e tokolahi taha ʻi he fakatahaʻangá ʻoku ʻikai te nau lāuʻilo ki he ngaahi tuʻunga tefito naʻe iku ai ki hono kapusi ʻo ha tokotaha pe ki hono toe fakafoki maí. Tānaki atu ki aí, ʻoku ʻi ai nai ʻa e niʻihi ʻa ia kuo uesia fakafoʻituitui nai pe loto-lavea​—mahalo naʻa mo ha ʻi ha tuʻunga vahaʻa taimi fuoloa​—ʻi he faihala ʻa e tokotaha fakatomalá. Ko ia ai, ko e hoko ʻo ongongofua ki he ngaahi meʻa peheé, ʻi he taimi ʻoku fai mai ai ha fanongonongo ʻo e toe fakafoki maí, te tau taʻotaʻofi mahino pē ʻe kitautolu ia ʻa hono fakahāhā ʻo e talitali leleí kae ʻoua ke fai ia ʻi ha tuʻunga fakafoʻituitui.”

Neongo ʻoku tau fiefia lahi ke sio ki ha toe foki mai ʻa ha taha ki he moʻoní, ko e pasipasi ʻi he taimi ʻoku toe fakafoki mai ai iá ʻe ʻikai ke feʻungamālie.