Ko e Ako Fakafaifekau Fakateokalati ki he 2001
1 ʻOku ʻi ai ʻa e ngaahi ʻuhinga Fakatohitapu feʻunga ki he ʻuhinga ʻoku totonu ai kiate kitautolu kotoa pē ke kau ai ʻi he kakato taha ʻe ala lavá ki he Ako Fakafaifekau Fakateokalatí.—Pal. 15:23; Mt. 28:19, 20; Ng. 15:32; 1 Tim. 4:12, 13; 2 Tim. 2:2; 1 Pita 3:15.
2 Ko ha polokalama lau Tohitapu fakauike kuo hoko fuoloa ia ko ha konga ʻo e akó. ʻOku fakafuofua ki hono lau ʻa e peesi nai ʻe taha ʻo e Tohitapú ʻi he ʻaho taki taha. Kamata ʻi he taʻú ni, ʻoku toe vaheʻi ha lau Tohitapu ki he uike fakamanatu tohinima taki taha. Ko e fakalahi ʻo e lau Tohitapú, ʻa ia naʻe fakataimi-tēpileʻi ki he taʻu ʻe tolu kuohilí, kuo ʻosi kakato. Ka ʻo kapau ʻokú ke loto ke lahi ange ʻa hoʻo lau ʻa e Tohitapú ʻi he taimi-tēpile kuo ʻosi fokotuʻutuʻú, te ke faʻu nai haʻo polokalama lautohi pē ʻaʻau.
3 Ko e Konga Fika 2 ʻoku akoʻi ai ʻa e fanga tokouá ke “nofo ki he lau” ʻo e Folofola ʻa e ʻOtuá. (1 Tim. 4:13) ʻI he taimi ʻokú ke maʻu ai ha konga ki he lautohí, toutou lau leʻo-lahi ia. Fanongo tokanga ki he kau lautohi lelei ʻi hoʻo fakatahaʻangá ke fakaleleiʻi ʻa hoʻo puʻaki leá, fetōʻaki ʻo e leʻó, pea mo e ngaahi tafaʻaki kehe ʻo e lautohi leleí.
4 Ko e Konga Fika 3 mo e Fika 4 ʻoku makatuʻunga ia ʻi he tohi Ko ʻEku Tohi ʻo e Ngaahi Talanoa Faka-Tohitapú mo e Reasoning. Neongo ko e tohi Reasoning ʻoku ʻi he faka-Pilitāniá pē, ko e ngaahi konga ʻoku ngāueʻakí ʻoku tautefito pē ki he ngaahi konga Tohitapú, ko ia neongo kapau ʻoku ʻikai te ke mahinoʻi ʻa e lea faka-Pilitāniá, ʻi ha tokoni ʻa ha taha ʻokú ne mahinoʻi iá te ke malava ai ʻo mahinoʻi ʻa e ngaahi fakaʻuhinga faka-Tohitapú. Kapau ko e fakamatala kuo vaheʻí ʻoku lahi ange ia ʻi he taimi kuo vaheʻi ke ke ngāue ki aí, filifili pē ʻa e meʻa ʻe ʻaonga lahi taha ki he feituʻu hoʻo fakatahaʻangá. ʻE ngāueʻaki nai ha faʻahinga fokotuʻutuʻu pē ʻe feʻungamālie ki ho feituʻú.
5 Fai ʻa e feinga feʻungamālie kotoa pē ke fakahoko kotoa ʻa hoʻo ngaahi konga ʻi he akó. Vaheʻi ha taimi ke teuteu lelei ai, pea lea mei ho lotó. Te ke hoko ai ko ha matavai ʻo e fakalototoʻa ki he fakatahaʻangá, pea te ke maʻu ai ʻa e ʻaonga fakafoʻituitui ʻaki ʻa hoʻo kau loto-ʻaufuatō ki he Ako Fakafaifekau Fakateokalatí he lolotonga ʻo e 2001.