Ko ha Tohi mei he Kulupu Pulé
He monūʻia ē ka ko kitautolu! ʻI he tuʻunga ko e Kau Fakamoʻoni ʻa Sihová, ʻoku tau maʻu ʻa e monū ʻo ʻikai ngata pē ʻi hono ʻiloʻi ʻa Sihova, ko e ʻOtua moʻoni mo moʻuí pē ia, ʻa e Tokotaha-Fakatupu ʻo e ʻunivēsí, ka ʻoku toe pehē foki ki hono fataki ʻa hono huafá mo tauhi Iá. ʻOku ʻikai mo ha toe tāpuaki ʻe lahi pehē!—Ai. 43:12; Hep. 8:11.
ʻOku tau maʻu ʻa e ʻamanaki ʻo e fakamoʻuí pea mo e fekau ke malangaʻi ʻa e ongoongo lelei ʻo e Puleʻangá koeʻuhi ke lava foki ai mo e niʻihi kehé ʻo lotu kia Sihova mo ʻinasi ʻi heʻetau ʻamanakí. (Mt. 24:14; Loma 10:13, 14; 1 Tes. 5:8) ʻOku tau toe maʻu foki mo e fiefia ʻi he hoko ko e fetokouaʻaki fakavahaʻapuleʻanga ʻo e kau lotu ʻoku nau ʻofa mo longomoʻui ʻi he fetokoniʻakí. He fakafiemālie moʻoni ē ko e kotoa ʻo e meʻá ni!
ʻOku feʻungamālie ʻa hono fakaafeʻi kitautolu ʻe he Tohitapú: “Tauhi ʻa Sihova ʻaki ʻa e fiefia: . . . Mou hu hono ngaahi matapa he fakafetaʻi, hu hono ngaahi lotoʻa mo hono hivaʻi: ʻio, mou sani pe ia, fakamālō ki hono huafa. He ʻoku lelei ʻa Sihova; ʻoku taʻengata ʻene ʻaloʻofa; pea tuʻu maʻu ʻene fuakava ki he toʻutangata mo e toʻutangata.” (Sāme 100:2-5) Ko hono tauhi ʻa Sihova ʻaki ʻa e fiefiá ʻoku felāveʻi hangatonu ia mo hono maʻu ha vahaʻangatae fakafoʻituitui mālohi mo ia. ʻOkú ne ʻai ke malava ʻo maʻu ha vahaʻangatae pehē, pea ʻoku tau maʻu ʻa e monū ke fakatupulekina ia. ʻI heʻetau maʻu ʻa e faʻahinga vahaʻangatae ko iá, ʻoku tau ʻiloʻi ʻoku faingamālie maʻu pē ʻa Sihova ke ne tokoniʻi mo fakaivimālohiʻi kitautolu ʻi he ngaahi taimi ʻo e faingataʻá. ʻOku tau tuipau te ne tokonaki mai ʻa e mālohi mo e tataki fakalaumālie ʻoku fiemaʻú ke fekuki ai mo e ngaahi pole ʻo e moʻui ʻi he ngaahi ʻaho fakaʻosi ʻo e fokotuʻutuʻu ʻo e ngaahi meʻa ko ení. Neongo pe ko e hā ʻa e ngaahi tenge ʻoku tau fehangahangai mo iá, ʻoku tau fiefia pē ʻi heʻetau ngāue fakafaifekaú, pea ʻoku tau fakamālō kia Sihova ʻi he ʻaho kotoa pē, koeʻuhi hangē ko ia ʻoku fakamanatu mai kiate kitautolu ʻe heʻene Folofolá, ‘ʻoku ne mamahiʻi kitautolu.’—1 Pita 5:7.
Lolotonga ʻa e taʻu kuo maliu atú, kuo tāpuakiʻi lahi moʻoni ai kitautolu ʻe Sihova. ʻI he Fakataha-Lahi Fakavahe ko e “Kau Fai ki he Folofola ʻa e ʻOtuá,” naʻa tau fiefia ai ke ʻi ai fakataha mo e laulaui afe ʻo e faʻahinga ʻoku tau maʻu ʻa e tui mahuʻinga tatau, ʻo hiva mo kai fakataha ʻi he tēpile fakalaumālie ʻa Sihová. ʻI heʻetau Ngaahi Ako Tohi faka-Pilitānia ʻa e Fakatahaʻangá, naʻa tau fiefia ai ʻi he hokosia fakatupu tui mālohi ʻa hono ako fakataha ʻa e tohi Pay Attention to Daniel’s Prophecy! Pea ʻikai ko ia pē, he fakafiefia ē kiate kitautolu ʻa ʻetau maʻu ʻa e Voliume 1 ʻo e tohi foʻou ko e Isaiah’s Prophecy—Light for All Mankind! ‘ʻOku fonu mahuohua a ʻetau ipú.’—Sāme 23:5.
He fiefia ē ke ʻiloʻi ko e laui miliona ʻo kitautolu, ʻa e fanga tokoua mo e fanga tuofāfine fakalaumālié, ʻoku tau fāʻūtaha ʻi hono tauhi ʻa Sihová! He fakalototoʻa moʻoni ē ke lau ʻo fekauʻaki mo e ngaahi tumutumu foʻou kuo aʻusia ʻi he fekauʻaki mo e ngāue fakafaifekaú! ʻOku tau fiefia ʻi he fuʻu laui miliona naʻa nau maʻu ʻa e Fakamanatu ʻo e pekia ʻa hotau ʻEikí—pea fai ia neongo ʻa e ngaahi tuʻunga ʻo e māmaní. ʻI heʻetau vakai atu ki he malaʻe ʻi māmani lahí, ʻoku hā mahino “kuo lahi ʻa e taʻu kuo motuʻu.” (Luke 10:2) ʻI he taʻu kuo ʻosí ʻi ha fakaʻavalisi ko e kau ako Tohitapu ʻe toko 5,555 ʻi he uike kotoa pē, naʻa nau fakalakalaka ʻo aʻu ki he tuʻunga ko hono fakahāhaaʻi ʻenau fakatapuí ʻaki ʻa e papitaiso ʻi he vaí. Lolotonga ko e utu-taʻú ʻi he ngaahi tafaʻaki ʻe niʻihi ʻo e māmaní ʻoku lahi ange ia ʻi he ngaahi tafaʻaki kehé, ʻoku tau fiefia kotoa ʻi he meʻa ʻoku fai ʻe Sihová. ʻOku tau sio ki he fakamoʻoni mahino ʻo ʻene tāpuakí ʻi he ngaahi feinga fāʻūtaha ʻa ʻene kau sevānití.
Ko hono langa ʻo e ngaahi Fale Fakatahaʻanga foʻoú kuo hoko ia ko ha toe tupuʻanga ki he lahi ʻo e fiefiá! ʻOku tau mātuʻaki fiefia ke sio ki hono poupouʻi loto-moʻoni ʻo e ngāué ni ʻe hotau fanga tokoua mo e fanga tuofāfine ʻi he ngaahi fonua langalanga haké. Kuo ʻosi langa ʻa e ngaahi Fale Fakatahaʻanga ʻe laui teau ʻi he tokoni ʻa e ngaahi Kulupu Langa Fale Fakatahaʻanga ʻa ia kuo fai hono akoʻi ki he ngaahi meʻa ʻoku fiemaʻú. ʻOku hiki ʻa e fanga tokouá ni mei he fakatahaʻanga ki he fakatahaʻanga ʻi honau fonuá tonu ke takimuʻa ʻi he ngaahi ngāue langa ʻo e Fale Fakatahaʻangá. Koeʻuhi ʻoku kei toe ke langa ʻa e ngaahi Fale Fakatahaʻanga ʻe laui afe, ko e kolé ki ha kau ngāue pole tokolahi ange ʻi he ngaahi fonua langalanga haké ke nau tokoni ʻi he ngāue ko eni ʻoku fiemaʻú. Kapau ʻokú ke nofo ʻi ha fonua pehē, ʻe lava ke ke fakafaingamālieʻi koe? ʻOi, he houngaʻia lahi ē ko siʻotau fanga tokoua mo e fanga tuofāfiné ʻi hono maʻu hanau Fale Fakatahaʻanga tonu ke fakataha ai ki he lotú! Pea ko e houngaʻia lahi ē ko kinautolu ki he fetokouaʻaki ʻi māmani lahí ki he tokoni fakapaʻanga ke ʻai ia ke malavá!
ʻOku tau fiefia ʻi he ongoongo fekauʻaki mo e ngaahi ikuna fakalaó. Neongo ia, ʻi he ngaahi feituʻu lahi ʻoku toe ʻi ai mo e kakai tākiekina mālohi ʻoku nau loto ke lōmia ʻa e lotu kia Sihová. ʻI heʻetau feangai mo e ngaahi tuʻunga ko ení, ʻoku tau tuipau, ʻi he fekauʻaki mo e tokoní, ʻoku tatau ai pē kia Sihova pe ko e hā ʻa e tokolahi ʻo e kau fakafepakí pea mo e hā ʻa e ngali fakalaveaʻingofua ʻa ʻene kau sevānití. (2 Kal. 14:11) ʻOku mau fakaongoongoleleiʻi loto-māfana kotoa atu kimoutolu fanga tokoua mo e fanga tuofāfine ʻa ia ʻoku mou hokohoko atu ʻi he tuʻu mālohi maʻá e lotu moʻoní.
Hokohoko atu ʻa hono ʻai ke mālohi hoʻomou tuí pea mātuʻaki falala kia Sihova ki ha tataki ʻi hoʻomou fakahoko fiefia homou ngaahi fatongia faka-Kalisitiané. (Pal. 3:5, 6) ʻOku ʻikai ha ʻuhinga ke hoko ai ʻo loto-siʻi, neongo pe ko e hā e meʻa ʻe fakaʻatā nai ke fai ʻe he filí. Manatuʻi ʻa e fakalototoʻa naʻe ʻoange ʻe ʻIlaisa ki heʻene fakafeʻao loto-hohaʻá: “ʻOua te ke manavasiʻi: he ʻoku toko lahi ʻa e kau mo kitaua ʻi he kau mo kinautolu.” (2 Tuʻi 6:15-17) ʻI he ʻahó ni, ʻoku mateuteu pehē pē ʻa e kau tau fakahēvani ʻa Sihová ke maluʻi ʻa e ngaahi meʻa ʻa e lotu maʻá ʻo hangē ko ia ʻi he ʻaho ʻo ʻIlaisá. ʻOku tau hanga atu ki he kahaʻú fakataha mo e tuipau. ʻOku tokangaʻi ia ʻe Sihova. ʻE ʻikai ke lavameʻa ʻa e ngaahi puleʻangá ʻi he faitau mo iá. Kuó ne fakanofo tuʻi ʻa hono ʻAló ʻaki ʻa e tuʻunga mafai fakaepule kakato. “Monuʻia ka ko e kakai kuo hufanga kiate ia!”—Sāme 2:1-6, 12.
Kātaki ʻo manatuʻi ko kimoutolu kotoa siʻi fanga tokoua mo e fanga tuofāfiné ʻoku mou ʻi heʻemau ngaahi manatu ʻofá maʻu ai pē. Ko ʻemau lotu fakamātoató ke hoko ʻa e tokotaha kotoa pē ʻia kimoutolu ʻo “tuʻu kakato fakataha mo e tuipau mālohi ki he finangalo kotoa ʻo e ʻOtuá.”—Kol. 4:12, NW.
Mei homou fanga tokoua,
Kulupu Pule ʻa e Kau Fakamoʻoni ʻa Sihová