Fokotuʻutuʻu “Tāu mo Māu”
1 Ke lavameʻa ha fakataha-lahi fakavahe, kuo pau ke fai ha ngaahi feinga lahi fakataha. ʻOku fokotuʻutuʻu ʻe he ngāue ʻo e fakataha-lahí ha feituʻu faiʻanga fakataha feʻunga pea pehē ki ha ngaahi aleapau nofoʻanga, ʻi he feituʻu ʻoku fiemaʻu aí. ʻOku fai ʻe ha faʻahinga tāutaha mo e ngaahi fāmilí ʻenau ngaahi palani ki he fefonongaʻakí mo e nofoʻangá. Pea ʻoku ʻoatu fakataha ʻe he ngaahi fakatahaʻangá ʻenau ngaahi ngāue polé ke poupouʻiʻaki ʻa e ngaahi potungāue lahi ʻoku fiemaʻu ki hono fakalele ʻa e fakataha-lahí. Ko e taumuʻá “ko e meʻa kotoa pe ke fai ke tāu mo māu.”—1 Kol. 14:40.
2 ʻI hoʻo ngāue fakataha mo e ngaahi fokotuʻutuʻu ko ia ʻa e fakataha-lahí, manatuʻi maʻu pē ʻoku laui māhina—laui taʻu ʻi he taimi ʻe niʻihi—ʻa e fiemaʻu ʻo e teuteú. ʻOku fakamoleki ʻe he fanga tokoua tokolahi ʻa e taimi lahi ʻi hono fokotuʻu ʻa e ngaahi meʻá. ʻOku kau heni ʻa hono totongi ha ngaahi fale, tātānaki ha naunau, mo kumi ha kau ngāue. ʻOku iku ʻa e teuteu tokamuʻa ko ʻení ki ha ngaahi tāpuaki fakalaumālie maʻá e tokotaha kotoa pē. Ko e hā ʻe lava ke tau fai ke tokoní?
3 Ko Hono Fai Hoʻo Ngaahi Fokotuʻutuʻu ki he Nofoʻangá: ʻI hono maʻu ha ngaahi fakataha-lahi ʻi he malumalu hotau vaʻá, ʻoku faʻa fokotuʻutuʻu ʻe he faʻahinga mei he ngaahi motu kehé ke nofo mo e ngaahi mēmipa ʻo honau fāmili ʻoku nofo ʻi he kolo ʻoku fai ai ʻa e fakataha-lahí. ʻI he ngaahi tuʻunga lahi, ko e ngaahi kāinga ko ʻení ʻoku ʻikai ko ha Kau Fakamoʻoni ʻa Sihova. ʻI hano ʻuluaki fai ha fokotuʻutuʻu ki ha nofoʻanga pehē, tala ange mahino kiate kinautolu ʻa e ngaahi taimi te ke maʻu ai ʻa e fakataha-lahí koeʻuhi ke ʻoua te nau fokotuʻutuʻu atu ha ngaahi meʻa kehe kiate koe ke fai ʻi he ngaahi taimi ko iá. Toe fakamamafaʻi foki te ke fiemaʻu ke maʻu ha mālōlō lelei ʻi he poʻulí ki muʻa ʻi he ʻaho fakataha-lahi taki taha koeʻuhí ke ke lava ʻo ʻāʻā ki he polokalamá. Ko ia, heʻikai te ke faingamālie ki ha fakasōsiale lōloa ʻo aʻu ki he tuʻuapoó.
4 ʻI ha ngaahi tuʻunga kehe, te ke fokotuʻutuʻu nai ke nofo mo ha fāmili Fakamoʻoni ʻoku nau nofo ʻi he kolo ʻoku fai ai ʻa e fakataha-lahí. Fakapapauʻi ke ke fetuʻutaki ki muʻa kiate kinautolu ke fakapapauʻi ʻe malava ke nau nofo mo koe, pea fai ha ngaahi fokotuʻutuʻu pau ʻo kau ai hoʻo tau atú pea mo hoʻo mavahé pea mo e tokolahi ʻo ho fāmilí te ke ʻalu atu mo iá. Kapau ʻe liliu ha niʻihi ʻo e ngaahi fakamatala ko ʻení, ʻai ke ʻilo ia ʻe hoʻo tokotaha talitalí ʻi he vave tahá.
5 ʻI he ngaahi tuʻunga ʻe niʻihi, te tau palani nai ke nofo ʻi ha hōtele pe mōtele. Kapau kuo tau ʻosi fai ha taʻofi nofoʻanga pau, ʻoku lelei ke fai ki he fokotuʻutuʻu ko iá kapau ʻe malava. Kapau ʻe kaniseli ʻe ha niʻihi ʻo kitautolu ʻa e nofoʻanga naʻa tau taʻofí pe fai ha ngaahi palani kehe, ʻe palopalema heni ʻa e ngāue ʻa e hōtelé pea pehē ki hotau fanga tokoua mo e fanga tuofāfine naʻa nau mei fiemaʻu nai ke nofo ʻi he fale tatau pē. ʻE ʻikai fie fakaʻatā nai ai ʻe he hōtelé ʻa e ngaahi loki ʻoku ala maʻu ki heʻetau ngaahi fakataha-lahí ʻi he kahaʻú, ʻi he ongoʻi ʻe ʻikai te tau tauhi ʻetau fakapapaú. He lelei lahi ē ke tau fai ki heʻetau leá, ʻo ʻai ʻetau ‘ʻIó ko e ʻIo’!—Mt. 5:37.
6 Ngaahi Founga Tefito ʻe Lava Ke Tau Ngāue Fakataha Aí: ʻOku ʻi ai ʻa e ngaahi meʻa faingofua ʻe lava ke tau fai ke ngāue fakataha ai ʻi hono fai ha taʻofi nofoʻanga ʻi he tuʻunga ko ha tokotaha fakafofonga ʻo e fakataha-lahí. (1) ʻOua ʻe taʻofi ha ngaahi loki lahi ange ʻi ha hōtele ʻo laka ia ʻi he loki ʻokú ke palani ke ngāueʻakí. (2) ʻOatu ʻa e tipōsiti totonu ke taʻofiʻaki ho lokí. (3) ʻOua ʻe ngāuehalaʻaki ʻa e tokonaki kai pongipongi taʻetotongi ʻoku ʻoatu nai ki he kau ʻaʻahí. (4) Manatuʻi ʻoku ʻamanekina lelei mai ʻe he kau pule hōtelé ke tau tali ʻenau ngaahi laó. (5) Ke anga-fakaʻapaʻapa mo anga-kātaki ʻi he feangai mo e kau ngāue ʻo e hōtelé. (6) Fakahā ʻa e tokaʻi ʻo e kau ʻaʻahi kehe ʻa e hōtelé.
7 Fakakaukau ki he Ngaahi Ola Lelei ko Ení: ʻI he hili ha fakataha-lahi ʻe taha, naʻe pehē ʻe ha pule ʻo ha feituʻu faiʻanga kemi: “Naʻá ku fakatokangaʻi ko e Kau Fakamoʻoni ʻa Sihová ʻoku nau mātuʻaki faitotonu ʻi he meʻa kotoa pē ʻoku nau faí. ʻI he uike kuo ʻosí, ko e toko 40 ʻo kinautolu naʻa nau ʻi hoku feituʻu faiʻanga kemí, pea naʻe ʻikai te nau fakatupunga ha faʻahinga palopalema. ʻI hono kehé, ko kinautolu pē ʻa e faʻahinga ʻoku nau haʻu ʻo fakahā mai, kapau ʻoku toe ʻi ai mo ha tokotaha kehe ʻoku nofo ʻi honau taulaní pe tēnití. ʻI heʻeku laú, ko kinautolu ʻa e kau kasitoma lelei taha ʻoku lava ke ke maʻú.” He meʻa lelei ē kapau ko e faʻahinga kotoa ʻoku nau tuku mai ke tau nofo totongi ʻi honau ngaahi falé ʻoku malava ke nau hokosia ha meʻa lelei pehē! Ko ha fakamoʻoni lelei ē ʻe ʻoatú!
8 Ngāue Fakataha mo e Ngaahi Fokotuʻutuʻu Fakamaʻa ki Muʻa he Fakataha-Lahí: ʻOku fokotuʻutuʻu maʻu pē ʻe he fokotuʻutuʻu fakaefakatahalahí ha ngaahi fakatahaʻanga ke nau tokoni ʻi hono fakamaʻa pea mo hono teuteuʻi ʻa e holó ki muʻa ʻi he kamata ʻa e fakataha-lahí. Kapau ʻoku tau faingamālie, ʻoku lava ke tau fakahaaʻi ʻetau tokoní ʻaki ʻa e kau loto-lelei fakataha mo ʻetau fakatahaʻangá.
9 ʻI he tuʻunga ko e kau sevāniti ʻa Sihová, ʻoku tau maʻu ʻa e faingamālie ke tapua atu hono ʻulungāngá ʻi he meʻa kotoa pē ʻoku tau faí. ʻOku kau heni ʻa hono fai ha ngaahi fokotuʻutuʻu pea maʻu ʻa e ngaahi fakataha-lahi ʻa ia ʻoku kau ki ai ʻa e huafa ʻo e ʻOtuá. Manatuʻi, ko iá “ko e ʻOtua ʻoku ʻikai ko e fakatupu maveuveu, ka ko e fakatupu melino.” (1 Kol. 14:33) Ko ia, tau fakapapauʻi ʻoku ʻiloʻi ʻe he kau mamata kotoa pē ʻa e ʻulungaanga ko ʻeni ʻo Sihová mei he meʻa ʻoku nau sio mai ki ai ʻiate kitautolú—hotau ʻulungāngá mo e tōʻongá ʻi heʻetau palani mo maʻu ʻa e Fakataha-Lahi Fakavahe “Kau Faiako ʻo e Folofola ʻa e ʻOtuá.” ʻOfa ke hoko ʻo ʻilo ʻe he kau mamata loto-totonú ko e kakai fakatahatahaʻi ʻa Sihová ʻoku fokotuʻutuʻu “tāu mo māu.”—Sāme 68:26.