ʻOku Mahuʻinga Fēfē ʻa e Feohi Faka-Kalisitiané?
1 “ʻOku ʻikai ha tangata ʻe lava ke mavahe fakaʻaufuli mei he kakai kehé.” Ko e fakamatala ko ia naʻe fai ʻe ha faʻu-maau ʻi he senituli hono 17 ʻokú ne fakaongo mai pē ʻa e meʻa ʻoku leaʻaki ʻe he Tohitapú ʻo fekauʻaki mo ha fiemaʻu tefito ʻa e faʻahinga ʻo e tangatá—ko e feohí. (Pal. 18:1) ʻOku fakalato ʻa e fiemaʻu ko ʻení ʻe heʻetau feohi faka-Kalisitiané. ʻI he ngaahi founga ʻaonga fē?
2 ʻI he Ngāue Fakafaifekaú: Ko e taha ʻo e ngaahi ʻaonga tuʻu-ki-muʻá ko e founga ʻoku fakaivimālohiʻi mo poupouʻi ai kitautolu ʻe hotau fanga tokouá ʻi he ngāue fakafaifekau maʻá e kakaí. Naʻe fekau atu ʻe Sīsū ʻene kau ākongá ʻo “tautau toko ua” ke malanga. (Mk. 6:7; Luke 10:1) ʻI he fehoanaki mo e sīpinga ko ʻení, ʻi he taimi ʻoku tau ngāue ai mo ha niʻihi kehe ʻi he ngāue fakamalangá, ʻoku tau hokosia ai ʻa e moʻoni ʻo e Koheleti 4:9, 10. ʻI heʻetau fakahoko fakataha ʻetau ngāue fakafaifekaú, ko e tui, talangofua mo e ʻofa ʻa hotau kaungāngāué ʻoku fakahūhū mai ai kiate kitautolu ʻa e loto-toʻa pea fakafoʻou ai ʻetau faivelengá.
3 Ki ha Tokoni Fakafoʻituitui: Ko ʻetau fetokouaʻakí ko ha toe matavai ia ʻo e fakalototoʻa mo e tataki ke fekuki ai mo e ngaahi tengé pea talitekeʻi ʻa e ngaahi ʻahiʻahí. Ko ʻetau feohi faka-Kalisitiané ʻoku fakahanga nai ai ʻetau tokangá ki he ngaahi konga Tohitapu ʻoku felāveʻi mo e ngaahi meʻa ʻoku tau tokanga fakafoʻituitui ki aí. ʻOku aʻu nai ʻo nau lotu mai maʻatautolu, ʻo hangē pē ko ia ʻoku tau fai maʻanautolú. (2 Kol. 1:11) Pea ko e moʻoni ko ʻenau faʻifaʻitakiʻanga leleí ʻokú ne ueʻi kitautolu ki he ngaahi ngāue leleí pea fakaivimālohiʻi ai kitautolu.
4 ʻI he Ngaahi Fakatahá: Ko e tāpuaki ʻo e feohi faka-Kalisitiané ʻoku maʻu ia ʻi he taimi ʻoku tau maʻu maʻu pē ai ʻa e ngaahi fakataha ʻa e fakatahaʻangá. (Hep. 10:24, 25) Ko e polokalamá ʻoku lahi ai ʻa e fakahinohino fakalaumālié, pea ko ʻetau ʻi ai ʻi he ngaahi fakatahá ʻokú ne ʻai ai ke tau vāofi mo hotau kaungātuí. Ko e ngaahi fakatahataha ko ʻení ʻoku ʻomai ai kiate kitautolu ʻa e faingamālie ke fanongo ai ki hono fakahaaʻi ʻe hotau fanga tokouá mo e fanga tuofāfiné ʻa ʻenau tuí, pe ko e fai mei he peletifōmú pe mei he kau fanongó. (Loma 1:12) ʻOku fakalolotoʻi ange ʻa e haʻi ʻo ʻetau feohí ʻi heʻetau fetalanoaʻaki ki muʻa pea mo e hili ʻa e ngaahi fakatahá. ʻOku ʻomai ʻe he ngaahi taimi peheé kiate kitautolu ʻa e ngaahi faingamālie ke lāulea ai ki he ngaahi meʻa naʻa tau hokosia tonu ʻoku langa hake ai ʻa e tuí. ʻOku laveʻi hotau angaʻitangatá ʻi ha founga ʻaonga ʻi heʻetau feohi tauʻatāina mo e faʻahinga ʻoku ʻofa kia Sihova, ko ʻene Folofolá, ko ʻene ngāué pea mo hono kakaí.—Fili. 2:1, 2.
5 ʻOku tau fiemaʻu hotau ngaahi kaumeʻa faka-Kalisitiané. ʻI he ʻikai kinautolú, ko e ʻaʻeva ʻi he hala fāsiʻi ʻoku taki atu ki he moʻuí ʻe faingataʻa ange. Kae kehe, ʻi heʻenau ʻofá mo e fakalototoʻá, ʻe lava ke tau hokohoko atu ai ki he māmani foʻou māʻoniʻoni ʻa Sihová.—Mt. 7:14.