Te Tau Ako ʻa e Tohi Fāmili Fiefiá

Te mou fiefia ke ʻilo ʻi he kamataʻanga ʻo e uike ʻo Sanuali 7, 2002, te tau ako ai ʻa e tohi Ko e Fakapulipuli ʻo e Fāmili Fiefiá ʻi he Ako Tohi ʻa e Fakatahaʻangá. ʻE ʻikai loto ha taha ke tō mei he kulupu ako ʻo e fakahinohino Fakatohitapu ʻaonga ko ʻeni ki ha moʻui fakafāmili fiefiá. ʻE fakaʻatā ʻe he taimi-tēpile akó hano sivisiviʻi fakaʻāuliliki ʻo e palakalafí mo e konga Tohitapu kotoa pē ʻi he tohí.

Ko e ʻuluaki vahé fakalūkufua ʻe lāulea ki ai ʻi he ʻuluaki uike ʻo e akó, koeʻuhi he ʻoku siʻi pē ʻa e ngaahi konga Tohitapu ʻoku ʻikai hiki ʻi lotó. ʻI he ʻuhinga tatau, ʻe fai ai ʻa e lāulea ki he vahe 15 ʻi he ako ʻe taha pē. Kae kehe, ko e ngaahi vahe kotoa pē ʻe vahevahe ia ki he konga ʻe ua, ʻa ia ko e vaeua nai ʻo e vahé ʻe fai ʻa e lāulea ki ai ʻi he uike taki taha. Ko ia ai, ʻe ʻi ai ha taimi feʻunga ke lau ai mo fakamatalaʻi ʻa e ngaahi konga Tohitapu kotoa pē ʻoku haá pea pehē foki ki hono sivisiviʻi fakalelei ʻa e kaunga ʻo e ngaahi konga Tohitapu kotoa pē ʻoku hiki mai ʻi he palakalafi taki taha.

Ko ha tafaʻaki mahuʻinga ʻo e akó ko hono fakamatalaʻi ko ia ʻa e fakamatala ʻi he kiʻi puha fakamanatú ʻi he ngataʻanga ʻo e vahe taki taha. Ko ia ai, ʻoku totonu ke vaheʻi ha taimi feʻunga ke lāulea ai ki he ngaahi fehuʻí pea mo e ngaahi konga Tohitapu ʻoku hā atu ʻi he kiʻi puhá.

ʻOku fakaʻaiʻai ʻa e kau faiako ʻo e Ako Tohi ʻa e Fakatahaʻangá ke nau fai ha tokanga makehe ki heʻenau teuteu ki he akó pea ke nau fakalototoʻaʻi ʻa e faʻahinga kotoa pē ʻoku vaheʻi ki heʻenau kulupú, kau ai ʻa e faʻahinga foʻoú, ke teuteu lelei, maʻu maʻu pē ʻa e ako tohí pea kau ki ai.