Hanganaki Fakamuʻomuʻa ʻa e Puleʻangá
1 Ko hono fakamuʻomuʻa ʻa e Puleʻanga ʻo e ʻOtuá ʻi he moʻuí pea hokohoko fai peheé ʻoku ʻikai ke faingofua ʻi he taimi ʻoku tau fehangahangai ai mo e ngaahi tenge fakaʻekonōmiká pe ngaahi palopalema kehé. ʻOku anga-fēfē ʻetau hanganaki fakamuʻomuʻa ʻa e Puleʻangá ʻi he taimi ʻoku malanga hake ai ʻa e ngaahi faingataʻá? Fēfē kapau ʻoku tuʻuaki mai ha ngāue ʻoku fiemaʻu ai kitautolu ke liʻaki ʻa e ngaahi fakatahá pe ʻoku kāsia ai ʻetau malaʻe ngāué? ʻE fika ua leva ʻa e Puleʻangá ia ʻi he moʻuí?
2 ʻOku Fiemaʻu ʻa e Tui Mālohi: ʻI he taimi ʻoku ʻahiʻahiʻi ai ʻetau tuí ʻi he ngaahi tuʻunga peheé, kuo pau ke ʻoua naʻa ngalo ʻiate kitautolu ʻa e talaʻofa ʻa Sihova pea mo e fakapapau ʻa Sīsū ʻo kau ki ha poupou fakaʻotuá ʻo kapau te tau fuofua kumi ki he Puleʻangá. (Sāme 37:25; Mt. 6:31-34) ʻE lava ke fakapōpōʻuliʻi ʻe he ngaahi tākiekina mo e ngaahi tenge fakamāmaní ʻetau fakakaukaú pea taʻofi ai kitautolu mei he hanganaki tauhi ke mahuʻinga taha ʻa e Puleʻangá. Kuo fakaʻatā ʻe he niʻihi ʻa e ʻamanaki ki ha tuʻu-ki-muʻa ʻi he ngāué pe ki he tupu fakapaʻangá ke hoko ko e meʻa tefito ia ʻi he moʻuí. Kae kehe, hangē ko Paulá, ʻoku fiemaʻu ke tau fakamahuʻingaʻi totonu ʻa e meʻa ʻoku mahuʻinga moʻoni ʻi he moʻuí.—Fili. 3:7, 8.
3 ʻOku Fiemaʻu ha Ngaahi Fakatonutonu? Naʻe pehē ʻe ha tokotaha malanga: “Ko hoku lotó naʻe ʻi heʻeku pisinisí—ko hoku ʻofaʻangá pē ia. Naʻá ku ongoʻi ʻe kei malava pē ke u hoko ko ha Fakamoʻoni lolotonga ia ʻa e līʻoa ʻa e lahi taha ʻo hoku taimí ki he ngaahi meʻa fakapisinisí.” Ka naʻá ne maʻu ha ongoʻi ʻalovili ʻe lava ke ne fai ha meʻa lahi ange ke tauhi ai kia Sihova. ʻI he faai mai ʻa e taimí, naʻá ne tukuange ai ʻa e pisinisi naʻe hoko ko ha fakafaingataʻaʻiaʻanga ki heʻene laka ki muʻa fakalaumālié. ʻI heʻene līʻoa kakato atu ia ki he ngāue ʻo e Puleʻangá, naʻe malava ai ke ne leaʻaki: “ʻOku ou ongoʻi he taimí ni ʻoku lavameʻa ʻeku moʻuí ʻi he ʻafio mai ʻa Sihová, ʻa ia ko e meʻa ia ʻoku mahuʻinga moʻoní.”
4 ʻOku taau ke fakaongoongoleleiʻi, kuo liʻaki ʻe he tokolahi ʻa e ngaahi ngāue fakamāmaní pea mo e ʻamanaki ʻo e toe maʻu mai ʻo ha paʻanga lahi angé, kae fakafaingofuaʻi ʻenau moʻuí pea kau ki he ngāue taimi-kakató. Ko e kau sevāniti fakafaifekau mo e kau mātuʻa kei talavou mo teʻeki mali ʻoku kau atu ki he Akoʻanga Ako Fakafaifekaú kuo nau fai ʻeni pea ʻoku nau fiefia ʻi he ngaahi monū lelei ʻo e ngāué. ʻI he faʻifaʻitaki ki he faʻifaʻitakiʻanga lelei moʻoni ʻa Paulá, ʻoku nau fiemālie moʻoni ʻi he ngaahi tokonakiʻanga fakamatelie tefitó.—1 Kol. 11:1; 1 Tim. 6:6-8; Hep. 13:5.
5 Neongo ʻe manukiʻi nai ʻe he māmaní ʻetau vakai ki he moʻuí, ʻoku tau maʻu ʻa e tāpuaki ʻa Sihová. (1 Kol. 1:26-31) ʻIkai ʻoku fakalototoʻa ke ʻilo te ne ngāueʻaki kitautolu ki he lahi taha ʻe malavá pea te ne tokoniʻi kitautolu ke fakahoko ʻene ngāué? Ko hotau monū lolotonga ke fanongonongo ʻa e Puleʻanga kuo ʻosi fokotuʻu ʻo e ʻOtuá heʻikai ʻaupito ke toe fai ia. Ko ia, ko e taimí pē ʻeni ke hanganaki fakamuʻomuʻa ai ʻa e Puleʻangá ʻi heʻetau moʻuí.