Ngaahi Fāmili Mālohi Fakalaumālie​—Anga-Fēfē?

¹ ʻOku fakaongoongoleleiʻi ʻa e ngaahi fāmili Kalisitiané ʻi hono ‘ngāueʻaki ʻa e anga-līʻoa fakaʻotuá ʻi honau fāmilí tonu.’ (1 Tim. 5:​4, NW) Kae kehe, ʻi he lahi fau ʻa e ngaahi tākiekina kovi takatakai ʻiate kitautolú ʻa ē ʻe lava ke ne fakavaivaiʻi ʻetau tuí, ʻoku mātuʻaki mahuʻinga ke ngāue mālohi ʻa e ngaahi fāmilí ke kei hoko pē ʻo mālohi fakalaumālie. ʻE lava fēfē ke fakahoko ʻeni?

² Ngāueʻaki ʻa e Tuʻunga-ʻUlu Faka-Kalaisí: ʻOku fiemaʻu ki he ngaahi ʻuluʻi fāmilí ke nau faʻifaʻitaki kia Sīsū Kalaisi ʻi he founga ʻoku nau fua ai honau fatongiá ke fakaivimālohiʻi ai honau ngaahi fāmilí. Mahulu hake mei heʻene fakahāhā ko ia ʻa ʻene ʻofa mai kiate kitautolu fakafou ʻi heʻene pekia tātuʻotaha fakaefeilaulaú, ʻoku hokohoko atu ʻa Sīsū ʻi hono “fafanga mo tauhi” ʻa e fakatahaʻangá. (Ef. 5:​25-29) ʻOku muimui ʻa e ngaahi mātuʻa anga-ʻofá ki he faʻifaʻitakiʻanga ʻo e tokanga ʻofa ko ʻení ʻaki ʻenau vakai ki he ngaahi fiemaʻu fakalaumālie fakaʻaho ʻa honau ngaahi fāmilí. ʻOku kau heni ʻa hono fai ha ako Tohitapu fakafāmili ʻi he uike taki taha, fetalanoaʻaki lelei fakalaumālie ʻi ha taimi pē ʻe malava aí, pea tokanga ki he ngaahi palopalemá ʻi heʻenau malanga haké.​—Teu. 6:​6, 7.

³ ʻI he Malaʻe Fakafaifekaú: ʻOku totonu ke mahinoʻi ʻe he ngaahi mēmipa kotoa pē ʻo e fāmilí ko e faifakamoʻoni ki he niʻihi kehé ʻo fekauʻaki mo Sihová pea mo ʻene ngaahi taumuʻá ko ha konga mahuʻinga ia ʻo ʻenau lotú. (Ai. 43:​10-12) Kapau ʻoku loto ʻa kimoutolu ngaahi mātuʻá ke hoko ʻa hoʻomou fānaú ko ha Kau Fakamoʻoni loto-tōnunga ʻa Sihova, kuo pau ke kamata tōmuʻa leva ʻa hono teuteuʻi honau lotó ki he ngāue fakafaifekaú. Fetalanoaʻaki ki he ngaahi ʻuhinga ʻoku fiemaʻu ai ke hoko ʻo feilaulau-kita ʻi he ngāué pea mo kau ki ai ʻi he uike taki taha. (Mt. 22:​37-39) Pea fai leva ha ngaahi fokotuʻutuʻu mo kinautolu ke nau kau maʻu pē mo koe ʻi he malaʻe fakafaifekaú.

⁴ Toe tokoniʻi ke nau mahinoʻi ʻa e mahuʻinga ʻo e ngāue fakamalangá ʻaki hono vaheʻi ha taimi he lolotonga ʻo e ako fakafāmili fakauiké ke teuteuʻi ai mo ʻahiʻahiʻi ha tuʻuaki ola lelei. Akoʻi tāutaha ʻa hoʻo fānaú ʻi he ngāue fakafaifekaú, ʻo tokoniʻi kinautolu ke nau laka ki muʻa ʻo fakatatau ki honau taʻumotuʻá mo ʻenau malavá. Hili ʻa hono fakamoleki fakataha ha taimi ʻi he ngāue fakamalangá, fetalanoaʻaki ki he founga naʻa nau hokosia tonu ai ʻa e anga-lelei ʻa Sihová. Lave ki ha ngaahi meʻa fakatupu tui-mālohi naʻe hokosia. Ko e lahi ange ʻa hono “ʻahiʻahiʻi [ʻe he ngaahi fāmilí] ʻoku anga-lelei ʻa e ʻEikí,” ko e vāofi ange ia te nau maʻu mo Sihová, ʻo fakaivimālohiʻi ai kinautolu ke talitekeʻi ʻa e “kovi kotoa pē.”​—1 Pita 2:​1-3, NW.

⁵ ʻI he Ngaahi Fakatahá: Ko ha lelei lahi ē ʻi he taimi ʻoku fetokoniʻaki ai ʻa e ngaahi mēmipa ʻo e fāmilí ke maʻu kotoa ʻa e ngaahi fakataha ʻa e fakatahaʻangá, tautautefito ʻi he taimi ʻoku ongoʻi ai ʻe ha taha ʻo kinautolu ʻoku helaʻia, loto-siʻi, pe lōmekiná! “ʻI he taimi ʻoku foki mai ai ki ʻapi ʻeku tamaí mei he ngāué, ʻokú ne helaʻia,” ko e lau ia ʻa ha tuofefine kei siʻi. “Ka ʻoku ou vahevahe mo ia ha poini lelei ʻa ia ʻe fai ki ai ʻa e lāulea he fakataha ʻi he efiafi ko iá, pea ʻoku fakalototoʻaʻi ai ia ke ne ʻalu. Pea ʻi he taimi ʻoku ou ongoʻi helaʻia aí, ʻokú ne fakalototoʻaʻi au ke u ʻalu.”​—Hep. 10:​24, 25.

⁶ Fai Fakataha ha Ngaahi Meʻa: ʻOku totonu ki he ngaahi fāmilí ke nau fai fakataha ha ngaahi meʻa, hangē ko e fetokoniʻaki ʻi he ngaahi ngāue fakaʻapí. ʻOku totonu foki ke vaheʻi ha taimi ke fai ai ha fakafiefia kuo ʻosi filifili lelei. Ko ha ʻalu ʻo kaimeʻakai, luelue ʻo ʻeva, fai ha ngaahi vaʻinga, pea mo e fononga ʻo ʻaʻahi ki he ngaahi kāingá pe ngaahi kaumeʻá ʻe lava ke ne ʻomai ha faingamālie ke maʻu ai ha ngaahi mōmeniti fakafiefia pea mo ha ngaahi manatu ʻofa ke manatuʻi.​—Koh. 3:4.

⁷ ʻOku ikuʻi ʻe he ngaahi fāmili Kalisitiane mālohí ha ngaahi fakafaingataʻaʻiaʻanga fakaʻaho ki honau tuʻunga fakalaumālié. ʻI he ʻunuʻunu ke ofi ange kia Sihová, ʻoku nau maʻu ai ʻa e mālohi ʻokú ne tokonaki maí.​—Ef. 6:10.