Hoko ko ha Tokotaha Fetuʻutaki!
1 Ke fakahoko ʻetau ngāue ke malanga mo ngaohi-ākongá, kuo pau ke tau ʻoatu ʻa e fakamatala ki he niʻihi kehé. (Mt. 24:14; 28:19, 20) ʻE lava ke hoko ʻa e fetuʻutakí ko ha pole ia naʻa mo e ʻi he lotolotonga ʻo e ngaahi kaumeʻá. Ko e hā ʻe lava ke ne tokoniʻi kitautolu ke aʻu ai ki he kau solá mo e ongoongo leleí?
2 Mei he Solá ki he Kaumeʻá: Feinga ke ʻai ʻa koe tonu ʻi he tuʻunga ʻo e faʻahinga ko ia ʻokú ke fakaofiofi ki ai ʻi he ngāue fakafaifekaú. ʻI he māmani ʻo e ʻaho ní, ʻoku mahinongofua ʻe ʻi ai nai ʻa e niʻihi ʻe huʻuhuʻu, pe aʻu ʻo manavahē ʻi he kau solá. ʻE lava ke taʻofi ʻe he meʻá ni ʻa e fetuʻutakí. ʻE lava fēfē ke ke ikuʻi ʻa e ʻuluaki tailiili ʻa e faʻahinga ʻokú ke fetaulaki mo iá? Naʻa mo e ki muʻa ke tau leaʻaki ha foʻi leá, ko e founga ʻe taha ʻoku tau fetuʻutaki aí ko hotau fōtunga fakafoʻituitui fakanānaá. Ko hotau teunga lelei mo fakangeingeiá ʻoku tokoni ia ke fakasiʻisiʻi ai ʻa e manavaheé.—1 Tim. 2:9, 10.
3 Ko e toe tokoni ʻe taha ki he fetuʻutakí ko ha founga fiemālie mo anga-fakakaumeʻa. ʻOku tokoni eni ke fakafiemālieʻi ʻa e niʻihi kehé pea ʻai ai kinautolu ke nau hehema lahi ange ke fanongo. ʻOku fiemaʻu ʻa e teuteu lelei ʻi he fekauʻaki mo e meʻá ni. ʻI he taimi ʻoku tau manatuʻi lelei ai ʻa e meʻa te tau leaʻakí, ʻoku hehema ange ai ke siʻi ʻetau hohaʻá. Pea ko e fakakaukau nonga ko eni ʻi heʻetau tafaʻakí ʻe lava ke ne tohoaki mai ai ʻa e niʻihi kehé ki heʻetau pōpoakí. Naʻe leaʻaki ʻe ha fefine ʻe taha ʻa e meʻá ni fekauʻaki mo e ʻaʻahi ʻa ha tokotaha Fakamoʻoni: “Ko e meʻa ʻoku ou manatuʻi fekauʻaki mo hono fofonga malimalí ko e nongá. Naʻá ku fieʻilo.” Naʻe fakaʻatā ʻe he meʻá ni ʻa e founga ki he fefiné ke fanongo ai ki he ongoongo leleí.
4 Ngaahi ʻUlungaanga ʻOku Fakamānako: ʻOku fiemaʻu ke tau maʻu ha mahuʻingaʻia fakafoʻituitui loto-moʻoni ʻi he niʻihi kehé. (Fili. 2:4) Ko e founga ʻe taha ke fai ai ení ko e ʻikai ke puleʻi ʻa e fetalanoaʻakí. Ko hono moʻoní, ʻoku toe kau ki he fetuʻutakí ʻa e fanongó. ʻI heʻetau fakaafeʻi ʻetau kau fanongó ke nau fai ha fakamatala pea tau fanongo fakataha mo e mahuʻingaʻia ʻi heʻenau fakamatalá, ʻoku nau ongoʻi ai ʻoku tau tokanga fekauʻaki mo kinautolu. Ko ia ʻi he taimi ʻoku lea ai hoʻo kau fanongó, ʻoua ʻe fakavave ke foki ki hoʻo malanga kuo ʻosi teuteú. Fakaongoongoleleiʻi kinautolu kapau ʻe lava ke ke fai loto-moʻoni ia, pea feinga ke feʻunuʻaki hoʻo fakamatalá ki he meʻa ʻoku nau leaʻakí. Kapau ʻoku fakahaaʻi ʻi heʻenau fakamatalá ha meʻa ʻoku nau hohaʻa fekauʻaki mo ia, feʻunuʻaki hoʻo malangá ke fakahanga ki heʻenau hohaʻá.
5 Ko e anga-fakanānaá mo e fakakaukau fakatōkilaló ʻokú ne ʻai ke lele lelei ʻa e fetuʻutakí. (Pal. 11:2; Ng. 20:19) Naʻe tohoakiʻi ʻa e kakaí kia Sīsū koeʻuhi naʻá ne “anga-mokomoko mo loto-fakatōkilalo.” (Mt. 11:29, NW) ʻI he tafaʻaki ʻe tahá, ko ha fakakaukau fiemāʻolunga ʻokú ne fakatafokiʻi ʻa e kakaí. Ko ia ai, neongo ʻoku tau tuipau mālohi ʻoku tau maʻu ʻa e moʻoní, ʻoku tau fakaʻehiʻehi fakapotopoto ʻi he lea ʻi ha founga fakamatemateé.
6 Fēfē kapau ko e fakamatala ʻa e tokotahá ʻoku tapua mei ai ʻa e ngaahi tui ʻoku ʻikai fehoanaki mo e meʻa ʻoku akoʻi ʻe he Tohitapú? ʻOku fakafatongiaʻi kitautolu ke tau fakatonutonuʻi ia? ʻIo, ʻe iku ia ki ai, ka ʻoku ʻikai fiemaʻu ke tau feinga ke fai ia ʻi he ʻuluaki ʻaʻahí. ʻOku faʻa ʻaonga ke hoko atu ʻi he ngaahi fakakaukau ʻoku tau felotoi ai mo ʻetau tokotaha fanongó ki muʻa ke vahevahe atu ʻa e ngaahi akonaki faka-Tohitapu te ne ʻiloʻi nai ʻoku faingataʻa ange ke ne talí. ʻOku fiemaʻu ki he meʻá ni ʻa e anga-kātaki mo e fakapotopoto. Naʻe fokotuʻu ʻe Paula ha faʻifaʻitakiʻanga lelei ʻi he meʻá ni ʻi heʻene faifakamoʻoni ki he kau fakamaau ʻo e ʻAleopeikó.—Ng. 17:18, 22-31.
7 Hiliō he meʻa kotoa, ʻe tokoniʻi kitautolu ʻe he ʻofa taʻesiokitá ke tau hoko ko e kau fetuʻutaki ola lelei. ʻI he hangē ko Sīsuú, kuo pau ke tau ongoʻi fakaʻofaʻia ki he kakai ʻa ia ʻoku “nau nofo ongosia mo tukuhāusia, ʻo hange ko ha fanga sipi taʻe hanau tauhi.” (Mt. 9:36) ʻOku ueʻi kitautolu ʻe he meʻá ni ke ʻoatu kia kinautolu ʻa e ongoongo leleí pea ke tokoniʻi kinautolu ke nau fou ʻi he hala ki he moʻuí. Ko ʻetau pōpoakí ko ha pōpoaki ia ʻo e ʻofa, ko ia tau hokohoko talaki ia ʻi ha founga anga-ʻofa. ʻI hono fai iá, ʻoku tau faʻifaʻitaki ai kia Sihova ko e ʻOtuá mo Sīsū Kalaisi—ʻa e ongo Faifetuʻutaki tuʻu-ki-muʻa taha ʻi he ʻunivēsí.