Meʻa ke Leaʻaki Fekauʻaki mo e Ngaahi Makasiní
Ko e Taua Leʻo ʻOka. 15
“Ko e ngaahi fili lahi ʻoku tau fehangahangai mo iá ʻoku ʻi ai ʻene kaunga lahi ki heʻetau moʻuí. Ko e hā ʻe lava ke ne tokoniʻi kitautolu ke fakaʻehiʻehi ai mei hono fai ʻa e ngaahi fili taʻefakapotopotó? [Tuku ke ne tali. Lau leva ʻa e Palovepi 3:6.] Ko e ʻīsiu ko eni ʻo e Taua Leʻo ʻoku ʻomai ai ʻa e ngaahi tataki faka-Tohitapu ʻe nima ʻa ia ʻe lava ke ne tokoniʻi kitautolu ʻi hono fai ʻo e ngaahi fili fakapotopotó.”
Awake! ʻOka. 22
“Kuó ke fakatokangaʻi, ʻoku fakalalahi ange ʻetau fanongo fekauʻaki mo e ngaahi siemu ʻoku nau talitekeʻi ʻa e faitoʻó? [Tuku ke ne tali.] ʻOku sivisiviʻi ʻe he makasini ko ení ʻa e ngaahi ʻuhinga ki he meʻa ko ení pea fokotuʻu mai ʻa e meʻa ʻe lava ke tau fai ke maluʻi ai kitautolú. ʻOku toe lāulea foki ai ki he talaʻofa ʻa e Tohitapú ki ha māmani ʻa ia ʻe ʻikai ha taha ai ʻe puke.” Lau ʻa e Aisea 33:24.
Ko e Taua Leʻo Nōv. 1
“Ko kitautolu hono kotoa kuo lavakiʻi ʻi ha taimi ʻa ʻetau falalá. Kuo faifai ange peá ke ʻeke hifo kiate koe, ‘ʻOku ʻi ai ha taha ʻe lava ke u falala ki ai?’ [Tuku ke ne tali. Pea lau leva ʻa e Palovepi 3:5.] ʻOku fakamatala ʻa e makasini ko ení ki he ʻuhinga ʻe lava ke tau falala kakato ai ki he ʻOtuá. ʻOku toe lāulea ai ki he founga ʻe lava ke tau fakapapauʻi ai ʻa e kakai ʻoku tuha mo ʻetau falalá.”
Awake! Nōv. 8
“Ko e ngaahi koloa ʻoku ngaohi mei he loló ʻoku kaunga ia ki he meimei tafaʻaki kotoa ʻo ʻetau moʻuí. Kuo faifai ange peá ke fifili pe ʻe fēfē ʻa e moʻuí ka ʻikai ʻi ai ʻa e ngaahi koloá ni? [Tuku ke ne tali.] ʻOku lāulea ʻa e makasini ko ení ki he founga ʻo e hoko mai ʻa e loló ʻo ne fakahoko ha ngafa tuʻu-ki-muʻa ʻi he sōsaieti ʻi onopōní. ʻOku toe fakamatala ai ki he ʻuhinga ʻoku fiemaʻu ai ke ʻoua te tau manavahē ki ha ʻosi ʻi ha taimi ʻa e loló.”