Te Ke ʻi Ai?
1 Naʻe pehē ʻi he taimi ʻe taha ʻe ha Fakamoʻoni fuoloa: “Kapau te ke tō ʻi he ʻuluaki ʻaho ʻo e fakataha-lahí, ʻāua, kuó ke tō leva mei he meʻa lahi ʻaupito!” Ko e hā naʻá ne ongoʻi pehē aí? Koeʻuhi ko e ʻuluaki ʻahó ko e kamataʻanga ia ʻo ha kātoanga kai lahi fakalaumālie ʻa ia kuo teuteu ʻe he kautaha ʻa Sihová maʻatautolu. (Ai. 25:6) Ko ʻetau ʻi ai mei he kamatá pē ʻoku fakahaaʻi ai ʻoku tau loto-tatau mo e fakakaukau ʻa e tokotaha-tohi-sāmé: “Ne u fiefia ʻi heʻenau pehe kia kita, ‘Tau o ki he fale ʻo Sihova.’”—Sāme 122:1.
2 Kae kehe, ʻi he taʻu kuo ʻosí ʻi he niʻihi ʻo e ngaahi Fakataha-Lahi Fakavahe “ʻAve ki he ʻOtuá ʻa e Lāngilangí,” ko e maʻu fakataha ʻi he Falaité naʻe tokosiʻi ʻa hono tokolahí ʻi he Tokonakí mo e Sāpaté. ʻOku ʻuhinga ení ko ha peseti lahi ʻo hotau fanga tokouá ne nau tō mei he fanongo ki he ngaahi konga ʻo e fakataha-lahí ʻa ia naʻe ʻomai ai ʻa e fakamatala mātuʻaki mahuʻinga fekauʻaki mo hono ʻave ki he ʻOtuá ʻa e lāngilangí. Naʻa nau toe liʻaki ʻa e feohi fiefia mo honau kaungātuí.
3 ʻOua ʻe Tuku ke Taʻofi ʻe he Ngāue Fakamāmaní: Ko e tokanga fekauʻaki mo e hoko ʻo mole ʻete ngāué ʻa e ʻuhinga nai naʻe ʻikai ke maʻu ai ʻe he niʻihi ʻa e Falaité. Kae kehe, kuo ʻiloʻi ʻe he Kau Fakamoʻoni tokolahi ʻoku loto-lelei ʻa honau kau pule ngāué ke fāitaha mo kinautolu ʻi he meʻá ni kapau ʻoku nau kole ki muʻa feʻunga ki ha taimi ʻatā. Naʻe mātuʻaki maongo ki ha pule ngāue ʻe taha ʻa e fakapapauʻi mālohi ʻe ha tuofefine tāimuʻa ke ne maʻu kotoa ʻa e ngaahi fakataha mo e ngaahi ʻasemipilī ʻa e fakatahaʻangá ʻo ne fakamoleki ai ha ʻaho kakato ʻi he fakataha-lahi naʻe kau ki ai ʻa e tāimuʻá!
4 ʻOku ʻikai totonu ke ke fakamahalo ʻoku ʻikai loto ho pule ngāué ke ʻoatu hao taimi ʻatā, pea ʻoku ʻikai totonu ke ke fakaʻosiʻaki ko e tō ʻi ha ʻaho ʻo e fakataha-lahí ʻe ʻikai hano maumau. ʻI he tuipau loto-moʻoni, teuteu ke fakahaaʻi fakapotopoto ki ho pule ngāué mei he Tohi Tapú ʻa e ʻuhinga ko hono maʻu ʻo e fakataha-lahí ko ha konga mahuʻinga ia ʻo hoʻo lotú. (Hep. 10:24, 25) Tuku leva ʻa hoʻo falala kakató ki he ngaahi talaʻofa ʻa Sihová, ʻi hono ʻiloʻi ko e hā pē e meʻa fakamatelie ʻokú ke fiemaʻú ʻe tokonaki mai ia kapau ʻokú ke tauhi ʻa e ngaahi fiemaʻu fakalaumālié ke muʻomuʻa taha ʻi hoʻo moʻuí.—Mt. 6:33; Hep. 13:5, 6.
5 Ko e kī tefitó ko e houngaʻia ki he “ngaahi meʻa ʻoku lelei lahi.” (Fili. 1:10, 11; Sāme 27:4) ʻOku ueʻi ʻe he meʻá ni kitautolu ke fai ʻa e ngaahi palani ke maʻu ʻaonga kakato mei he tokonaki mātuʻaki mahuʻinga ko eni meia Sihová. Kamata fai hoʻo ngaahi palani papaú he taimí ni, pea fakapapauʻi te ke ʻi ai ʻi he ʻaho ʻe tolú kotoa!