Fanongonongo

◼ Tohi ke tuʻuaki ki Tīsema: Ko e Moʻungaʻi Tangata Lahi Taha Kuo Moʻui Maí. Sanuali: Ko ʻEku Tohi ʻo e Ngaahi Talanoa Faka-Tohitapú. Fepueli: ʻUnuʻunu Ofi kia Sihova. Maʻasi: ʻIlo ʻA Ia ʻOku Taki Atu ki he Moʻui Taʻengatá.

◼ Ko e ngaahi tohi fakaafe Fakamanatu ki he 2005 ʻi he lea tefito ʻa e fakatahaʻanga taki taha ʻe vavé ni ʻa hono ʻoatu ki he fakatahaʻangá. Kapau ʻoku leaʻaki ha toe ngaahi lea kehe ʻi ho feituʻu ngāué pea te ke saiʻia ke ʻi ai ha ngaahi tohi fakaafe ʻi he ngaahi lea ko iá, ʻoku totonu ke fai ha kole ki ai ʻi he vave taha ʻe malavá ʻi ha Literature Request Form (S-14). Ko ha lisi ʻo e ngaahi lea ʻa ia ʻoku ala maʻu ai ʻa e ngaahi tohi fakaafe Fakamanatú ʻe hā ia ʻi he “Fanongonongo ki he Ngaahi Fakatahaʻanga Kotoa Pē,” ʻa ia ʻoku meiliʻi atu ʻi he māhina hono ua kotoa pē. Kātaki ʻo kole pē ʻa e ngaahi lea ko ia ʻoku fiemaʻu ki ho feituʻu ngāué.

◼ Koeʻuhi ko e mahuʻinga ʻo e Fakamanatú, ko e kulupu ʻo e kau mātuʻá ʻoku totonu ke nau fili ha taha ʻi he kau mātuʻa taau angé ke hoko ko e tokotaha malanga Fakamanatú kae ʻikai ko e taufetongi pē pe ko hono ngāueʻaki ʻa e tokoua tatau ʻi he taʻu kotoa pē. Kapau ʻoku ʻi ai ha mātuʻa ʻo e kau paní ʻa ia ʻe lava ke ne fai ʻa e malangá, ʻoku totonu ke fili ia.

◼ Kātaki ʻo fakatokangaʻi ko e Fakamanatu ki he taʻu 2006 ʻe fai ia ʻi he Pulelulu, ʻEpeleli 12, hili e tō ʻa e laʻaá. Ko e fakatokanga tokamuʻa ko ení ʻoku fai ia koeʻuhi ke fai ai ʻe he fanga tokouá ha ngaahi taʻofi pe ngaahi aleapau ki ha ngaahi holo ʻe faingamālié ʻi he taimi ʻoku ngāueʻaki ai ʻe ha ngaahi fakatahaʻanga kehekehe ʻa e Fale Fakatahaʻangá pea pau ai ke kumi ha ngaahi fale kehé. ʻI he ngaahi tuʻunga ko iá, ʻoku totonu ke felotoi ʻa e kau mātuʻá mo hono fakalele ʻo e falé ke fakapapauʻi ʻe ʻikai ha ngaahi fakahohaʻa mei ha ngaahi ngāue kehe ʻi he falé koeʻuhi ke lava ʻo hokohoko lelei ʻa e kātoanga Fakamanatú ʻi ha founga nonga mo maau.

◼ Ko e vitiō No Blood—Medicine Meets the Challenge ʻe fai ʻa e lāulea ki ai ʻi he Fakataha Ngāue ʻi Sanualí. Ko e tepi vitiō No Blood ʻoku ala maʻu ia ʻi he lea faka-Falaniseé, Kōleá, Pilitāniá, Sekí, Siainá (faka-Kenitoni), Siapaní mo e faka-Sipeiní. Kapau ʻe fiemaʻu, ko e ngaahi tatau ʻo e tepi vitioó ʻoku totonu ke kole ia fakafou ʻi he fakatahaʻangá ʻi he vave taha ʻe ala lavá.

◼ Ko e ngaahi kupu hokohoko ʻi he takafí ko e “Mahinoʻi Hoʻo Toketaá” ʻa ia ʻoku hā ʻi he ʻīsiu ʻo e Awake! ʻo Sanuali 22, 2005, ʻoku faʻufaʻu ia ke tokoniʻi ʻa e kakaí ke nau fehangahangai ola lelei ange mo ʻenau kau toketaá. Kae kehe, ko e kupú ʻe ʻikai ha veiveiua ʻe mahuʻingaʻia ai ʻa e kau toketaá tonu, he ʻoku fakahanga ʻa e fakahokohoko ʻo e ngaahi kupú ni ki he ʻuhinga ʻoku tohoakiʻi ai ʻa e niʻihi ʻo e kau toketaá ki he pōpoaki ko ia ʻo e Tohi Tapú ki he ʻamanakí. Te ke loto nai ke ʻota ha ngaahi tatau lahi ange pea fai ha feinga makehe ke ʻoange ha tatau ki hoʻo toketaá pea pehē foki ki he kau palōfesinale kehe ʻoku nau tokangaʻi ʻa e moʻuí. Ko e ngaahi fakatahaʻangá ʻoku totonu ke nau fakahā leva ki he vaʻá ʻoku fakalahi ʻa e ʻota ʻo e ʻīsiu ko ení.

◼ Kamata ʻi he uike ʻo Mē 23, 2005 te tau ako ai ʻa e Hanganaki Leʻo! ʻi he Ako Tohi ʻa e Fakatahaʻangá.