ʻE Lava ke Fai ʻe Hoʻo Tamá ha Fili Fakamatuʻotuʻa?
1. Ko e hā ʻa e tuʻunga kuo tuʻu ai ʻa e kau talavou Fakamoʻoní ʻi he felāveʻi mo e ngāueʻaki ʻo e totó? ʻOmai ha fakatātā.
1 Ko ha fili fakamatuʻotuʻa ʻo kau ki he hā? Huhu totó. Hangē ko ia kuo fakahaaʻi ʻi he kupu ʻoku fakakaveinga ko e “ʻAʻeva ʻo Hangē ko e Fakahinohino ʻa Sihová” ʻi he ʻīsiu ʻo e Watchtower ʻo Sune 15, 1991, ko e fānau ʻa e Kau Fakamoʻoni ʻa Sihová naʻe pau ke nau fai ha tuʻu fakamatuʻotuʻa ke fakamoʻoniʻi ko ʻenau holi ke talangofua ki he lao ʻa e ʻOtuá ʻi he totó ʻoku mahuʻinga tatau pē ia kia kinautolu ʻo hangē ko ia ki heʻenau ngaahi mātuʻá. ʻE lava ke toe fiemaʻu ia mei hoʻo kiʻi tama kei siʻí?
2. Ko e hā ʻa e tuʻunga fakalao naʻe ngāueʻaki ʻe ha fakamaauʻanga ʻe taha ki ha kiʻi tama naʻá ne fakaʻikaiʻi ʻa e huhu totó, pea ko e hā ʻoku ako mei heni ʻe he ngaahi mātuʻa Kalisitiané mo ʻenau fānau īkí?
2 Ko e Hā ʻa e Lau ʻa e Laó? ʻI he ʻIunaite Seteté, ko e fakamaauʻanga māʻolunga taha ke ne tuʻutuʻuni fekauʻaki mo e totonu ʻa ha kiʻi tama matuʻotuʻa ke ne fakaʻikaiʻi ʻa e huhu totó ko e Fakamaauʻanga Lahi Illinois. ʻI hano toe sivisiviʻi ʻa e hopo ʻa ha tuofefine taʻu 17, naʻe tuʻutuʻuni ʻe he fakamaauʻangá: “Kapau ʻe māʻalaʻala mo fakatuipau ʻa e fakamoʻoní ʻoku matuʻotuʻa feʻunga ʻa e kiʻi tamá ke ne mahinoʻi ʻa e ngaahi ola ʻo ʻene ngaahi ngāué [pea] ke ne fai ʻa e fakakaukau ʻa ha tokotaha lahi, tā ko e tefitoʻi moʻoni ʻa e kiʻi tamá ʻoku fakaʻatā ai ia ki he totonu ʻo e lao fakalūkufuá ke ne tali pe fakaʻikaiʻi ʻa e ngāue fakafaitoʻó.” Neongo kuo teʻeki ke fakapapauʻi ʻa e ʻi ai moʻoni ʻa e totonu ko ení ʻo aʻu mai ki he lolotongá ni ʻe ha fakamaauʻanga Nuʻu Sila, ko ha tuʻunga fakalao meimei tatau mo ia naʻe ngāueʻaki ʻe he Fakamaauʻanga Lahi Illinois ʻoku hangehangē ʻe talí. Ko ia ai, ʻi hono fakapapauʻi pe ʻoku matuʻotuʻa feʻunga ha kiʻi tama ke ne fai ʻene fili pē ʻaʻaná, ʻe fakaʻekeʻeke nai ʻe he kau toketaá mo e kau ʻofisialé ʻa e tokotaha mahakí ke nau fanongo kiate ia ʻi heʻene fakahaaʻi ʻene fakafisi fakafoʻituitui ki hono ngāueʻaki ʻa e totó. ʻE fiemaʻu nai ki he talavoú ke ne mahinoʻi lelei ʻa e mafatukituki ʻo hono tuʻunga fakafaitoʻó pea mo e ngaahi ikuʻanga ʻo ʻene ngaahi fili ki he faitoʻó pea fakahaaʻi māʻalaʻala mo pau ʻene tui fakalotu ʻo kau ki he lao ʻa e ʻOtuá ki he totó.
3. Ko e hā ʻa e ngaahi fehuʻi ʻoku totonu ke fakakaukau fakamātoato ki ai ʻa e ngaahi mātuʻá, pea ko e hā hono ʻuhingá?
3 Ko e Hā ʻe Leaʻaki ʻe Hoʻo Kiʻi Tamá? ʻOku malava nai hoʻo fānaú ke fai ha fakamatala ʻi he ʻīsiu ko ení? ʻOku nau tui ʻaki ʻa e kotoa honau lotó ko ha fekau fakaʻotua ia ke ‘fakaʻehiʻehi mei he totó’? (Ng. 15:29; 21:25) ʻE lava ke nau fakamatalaʻi ʻenau tuí mei he Tohi Tapú? Te nau taukapoʻi loto-toʻa nai ʻenau fili papau ʻo kau ki he totó kapau kuo tui ʻa e kau toketaá ia kuo ʻi he tuʻunga fakatuʻutāmaki ʻenau moʻuí, naʻa mo e ʻikai ke ʻi ai ʻa ʻenau ongo mātuʻá? Koeʻuhi ko e “hokonoa [kia kitautolu] kotoa pe ʻa e faingamalie mo e tuʻutamaki,” ʻe lava fēfē ke ke teuteuʻi hoʻo fānaú ki hano ʻahiʻahiʻi taʻeʻamanekina ʻo ʻenau anga-tonú?—Koh. 9:11; Ef. 6:4.
4, 5. (a) Ko e hā ʻa e fatongia ʻoku maʻu ʻe he ngaahi mātuʻá, pea ʻe lava fēfē ke nau fakahoko ia? (e) Ko e hā ʻa e ngaahi tokonaki ʻoku ala maʻu ke tokoni ki he ngaahi mātuʻá?
4 Ngaahi Mātuʻa, ko e Hā ʻe Lava Ke Mou Faí? ʻOku mou maʻu ʻa e fatongia ke akoʻi ki hoʻomou fānaú ʻa e vakai ʻa e ʻOtuá ki he totó. (2 Tim. 3:14, 15) ʻOku maʻu ha fakamatala māʻalaʻala ʻi he tohi Reasoning, peesi 70-4. Ako fakalelei ia mo homou fāmilí. ʻI hono ngāueʻaki ʻa e konga “Kapau ʻe Pehē ʻe ha Taha—” ʻi he peesi 74-6, fakahoko ha taimi ʻahiʻahi mo hoʻomou fānaú ke tokoniʻi kinautolu ke nau maʻu ʻa e taukei ʻi hono fakamatalaʻi ʻa e meʻa ʻoku nau tui ki aí pea mo hono ʻuhingá. (1 Pita 3:15) Ko e ngaahi tokonaki kehe ki hono akoʻi kitautolu ʻo kau ki he ʻīsiu ʻo e totó ʻoku kau ai ʻa e polosiua How Can Blood Save Your Life? pea mo e Taua Leʻo ʻo Sune 15, 2004, peesi 14-24. Tānaki atu ki ai, ko e ongo polokalama vitiō ko e Transfusion-Alternative Health Care—Meeting Patient Needs and Rights mo e No Blood—Medicine Meets the Challenge, ʻa ia ʻoku ala maʻu he taimí ni ʻi he DVD ko ia ʻoku fakakaveinga ko e Transfusion Alternatives—Documentary Series, ʻoku ʻomai ai ha fakamatala fakatupu tuipau ʻo kau ki he ʻuhinga lelei mo e ola lelei ʻo e faitoʻo mo e tafa ʻo taʻekau ai ʻa e totó. Kuo sio mo lāulea nai ki muí ni mai homou fāmilí ki he ongo foʻi vitiō ko ení?
5 Tokoniʻi hoʻomou fānaú ‘ke nau sivi ʻo ʻilo pe ko e ha ʻa e finangalo ʻo e ʻOtuá, ʻa e meʻa ʻoku leleí, ʻa e meʻa te ne hōifua aí, ʻa e meʻa ʻoku haohaoá’ ʻi he felāveʻi mo e totó. Pea te nau lava leva ʻo fai ha fili fakamatuʻotuʻa ʻe maʻu ai ʻa e tāpuaki ʻa Sihová.—Loma 12:2.