Ko ha Tohi mei he Kulupu Pulé
“KE IATE kimoutolu ae aloofa [pe ʻofa maʻataʻatā], moe monuia, mei he Otua koe tau Tamai, bea mei he Eiki ko Jisu Kalaisi.” Ko e lea fakafeʻiloaki eni naʻe ngāueʻaki ʻe Paula ʻi heʻene ngaahi tohi lahi ki he ngaahi fakatahaʻangá. ʻOku fakamatalaʻi lelei ai ʻa ʻemau fakaʻamu kia kimoutolú kotoa.—Ef. 1:2, PM.
He houngaʻia ē ko kitautolu ʻi he ʻofa maʻataʻatā meia Sihova fakafou ʻi he feilaulau huhuʻi ʻa Sīsū Kalaisí! Fakafou ʻi he huhuʻí, kuo tau maʻu ai ha tuʻunga fakahōifua ʻi he ʻao ʻo e ʻOtuá. Heʻikai ʻaupito lava ke tau maʻu eni fakafou heʻetau ngaahi feinga pē ʻatautolú, ʻo tatau ai pē pe ʻoku tōtōivi fēfē ʻa ʻetau ako ʻa e Tohi Tapú, malangaʻi ʻa e ongoongo leleí, pe fakahoko ʻa e ngaahi ngāue lelei kehé. Ko e fakamolemole ʻo e ngaahi angahalá mo e moʻui taʻengatá ʻoku fakaaʻu mai ia kia kitautolu, ʻo ʻikai ko e pale ki heʻetau ngaahi feingá, ka ko e ngaahi meʻaʻofa ʻoku tapua mai ai ʻa e ʻofa maʻataʻatā ʻa Sihová fakafou ʻia Sīsū Kalaisi.—Loma 11:6.
Naʻe tohi ʻa Paula ki he kaungātuí: “ʻOku mau . . . kōlenga atu kiate kimoutolu ke ʻoua ʻe tali ʻa e ʻofa maʻataʻatā ʻa e ʻOtuá pea liʻaki ʻa hono taumuʻá. He ʻokú ne folofola: ‘ʻI ha taimi lelei naʻá ku fanongo ai kiate koe, pea ʻi ha ʻaho ʻo e fakahaofi naʻá ku tokoniʻi koe.’ Vakai! Ko e taimi lelei moʻoni eni. Vakai! Ko e ʻaho eni ʻo e fakahaofi.” Naʻe ʻi ai ha “taimi lelei” ki muʻa ʻi he fakaʻauha ʻo Selusalema ʻi he ʻuluaki senitulí. Ko e kakai loto-totonu naʻe ʻofa kia Sihová naʻe fakahaofi fakalaumālie kinautolu. Naʻe iku eni ki he fakahaofi fakaesino ki he kotoa ʻo e faʻahinga faitōnunga ko ia naʻe hola mei Selusalema ki muʻa ʻi hono fakaʻauha ʻi he taʻu 70 T.S.—2 Kol. 6:1, 2, NW.
ʻI he ʻahó ni foki, ʻoku tau moʻui ʻi ha “taimi lelei” mo ha “ʻaho ʻo e fakahaofi.” Ko e faʻahinga ʻoku tali ʻe Sihova ke hoko ko ʻene kau sevānití pea kuo fakahaofi fakalaumālié ʻoku nau maʻu ʻa e ʻamanaki ʻo e fakahaofi fakaesino ʻi he “aho lahi o Jihova” ʻoku mātuʻaki ofi ní.—Sef. 1:14, PM.
Ko e hoko mai ʻa e ʻaho ʻo Sihová ʻoku hilifaki mai ai kia kitautolu ha fatongia mafatukituki. ʻOku fiemaʻu fakatouʻosi ke tau fakatokanga ki he kakaí fekauʻaki mo ia pea tokoniʻi ʻa e faʻahinga loto-totonú ke nau maʻu ʻaonga mei he ʻofa maʻataʻatā ʻa Sihová koeʻuhi ke lava ai ʻo fakahaofi mo kinautolu foki. Naʻe fakahoungaʻi lahi ʻe Paula ʻa e fatongia ko ení. Naʻá ne tohi: “Malaia au, o kabau e ikai teu malaga aki ae ogoogolelei!” Naʻá ne toe fakahaaʻi ʻa e anga ʻo ʻene ongoʻí ʻi he ngaahi leá ni: “Ko e tangata moʻua au . . . ki he ʻatamai mo e taʻe ʻatamai. Pea ʻi heʻene pehe, ko e anga leva ʻo hoku loto oʻoku ke malangaʻaki ʻa e Kosipeli.”—1 Kol. 9:16, PM; Loma 1:14, 15.
Te tau fai ha fakamatala kia Sihova kapau ʻoku tau liʻaki ʻa e ngāue mātuʻaki mahuʻinga ʻo e fakatokanga ki he kakaí. ʻOku tau lāuʻilo ki he meʻa naʻe folofolaʻaki ʻe Sihova ki he palōfita ko ʻIsikelí: “Hakoʻi-tangata, kuo u tuku koe ko e taulama ki he fale ʻo Isileli: pea te ke maʻu mei hoku ngutu ʻa e lea, pea te ke valoki kinautolu meiate au. Kapau te u lea ʻi ha angahala, Te ke matuʻaki mate; pea ʻoku ʻikai te ke valoki ia, ʻo ʻikai te ke lea ke seseʻe ʻa e angahala mei hono ʻalunga kovi ke ne moʻui; te ne mate ʻa e angahala ko ia ʻi he kovi kuo ne fai; ka ko hono toto te u ʻeke ki hoʻou nima.”—Isi. 3:17, 18.
Ko e ngaahi ʻaho fakaʻosi ko ení ʻoku faingataʻa ke fekuki mo ia. ʻOku ʻikai faingofua ke ʻai ke mafamafatatau ʻa e ngaahi meʻa fakafāmilí, ngāue fakamāmaní, ngāue fakaefakatahaʻangá pea mo e malangá. Tānaki atu ki ai, ko e tokolahi ʻo kimoutolú kuo pau ke mou fekuki mo e mahamahakí, loto-mafasiá, taʻumotuʻá pea naʻa mo e fakafepakí. Ko e tokolahi taha ʻo kimoutolú ʻoku mou “māfasia.” ʻOku mau loto ke fakahaaʻi atu ʻa ʻemau kaungāongoʻí, ʻo hangē ko ia naʻe leaʻaki ʻe Sīsuú: “Haʻu kiate au, ʻa kimoutolu kotoa pe ʻoku fakaongosia mo māfasia, pea te u fakamālōlō kimoutolu.” (Mt. 11:28) ʻOku mau loto ke fakaongoongoleleiʻi loto-māfana atu kimoutolu kotoa ʻoku mou fai ʻa e feinga ke hanganaki tauhi faitōnunga kia Sihova neongo ʻa e ngaahi pole lalahí mo e īkí.
Ko ha ola ʻo hoʻomou malanga mo e ngāue fakafaiako faivelengá pea koeʻuhi ko e tāpuaki ʻa Sihová, ʻoku papitaiso ai ʻi māmani lahi ʻo fakaʻavalisi ʻi he uike taki taha ʻa e toko 4,762. Lolotonga ʻa e taʻu fakangāue kuohilí, naʻe fokotuʻu ai ʻa e ngaahi fakatahaʻanga foʻou ʻe 1,375. ʻOku mau fakatauange mo lotu ko e tohi foʻou Ko e Hā ʻOku Akoʻi Moʻoni ʻe he Tohi Tapú?, ʻa ia ʻoku ʻosi ala maʻu ʻi he lea laka hake he 120, te ne tokoniʻi ʻa e laui miliona ke nau maʻu ʻaonga mei he ʻofa maʻataʻatā mo e nonga meia Sihova lolotonga ʻa e “ʻaho ʻo e fakahaofi” ko ení.
Fakapapauʻi ange ʻoku ʻofa atu ʻa e Kulupu Pulé pea ʻoku mau lotu atu maʻamoutolu. ʻOku mau toe fakamālō atu ki hoʻomou ngaahi lotu mai maʻamautolú.
Mei homou fanga tokoua,
Kulupu Pule ʻo e Kau Fakamoʻoni ʻa Sihová