Te Tau Ako ʻa e Tohi Fāmili Fiefiá
1 Te mou fiefia ke ʻilo ʻe kamata ʻi he uike ʻo Sanuali 8, 2007, ʻa hono ako ʻe he ngaahi fakatahaʻanga lea faka-Tonga kotoa pē ʻa e tohi Ko e Fakapulipuli ʻo e Fāmili Fiefiá ʻi he Ako Tohi ʻa e Fakatahaʻangá. ʻE ʻikai loto ha taha ke tō mei hono ako fakakulupu ʻo e fakahinohino Fakatohitapu ʻaonga ko ʻeni ki ha moʻui fakafāmili fiefiá. ʻI he taimi-tēpile ʻo e akó ʻe fakaʻatā ai ʻa hono sivisiviʻi fakaʻauliliki ʻo e palakalafi mo e konga Tohi Tapu kotoa pē ʻi he tohí.
2 Ko e vahe ʻuluakí kakato ʻe ako ia ʻi he ʻuluaki uike ʻo e akó, koeʻuhí he ʻoku siʻi ai ʻa e ngaahi konga Tohi Tapu ʻoku hā aí. ʻI he ʻuhinga tatau, ʻe ako kakato ai ʻa e vahe 15 ʻi he foʻi ako ʻe taha. Kae kehe, ko e kotoa ʻo e ngaahi vahe kehé ʻe vahevahe ia ki he konga ʻe ua, ʻa ia ko e vaeua nai ʻo e vahé ʻe ako ia ʻi he uike taki taha. Ko ia ai, ʻe ʻi ai ʻa e taimi feʻunga ke lau mo fakamatalaʻi ai ʻa e ngaahi konga Tohi Tapu kotoa ʻoku lave ki aí pea pehē ki hono sivisiviʻi fakalelei ʻa hono ngāueʻaki ʻo e ngaahi konga Tohi Tapu kotoa ʻoku hiki mai hono fakaleá ʻi he palakalafi taki taha.
3 Ko ha tafaʻaki mahuʻinga ʻo e akó ko ha fetalanoaʻaki ʻi he fakamatala ʻi he puha fakamanatu ʻi he ngataʻanga ʻo e vahe taki taha. Ko ia ai, ʻoku totonu ke vaheʻi ha taimi feʻunga ke lāulea ai ki he ngaahi fehuʻí pea mo e ngaahi konga Tohi Tapu ʻoku lave ki ai ʻi he puhá.
4 ʻOku fakaʻaiʻai ʻa e kau faiako Ako Tohi ʻa e Fakatahaʻangá ke nau fai ha tokanga makehe ki heʻenau teuteu ki he akó pea ke fakalototoʻaʻi ʻa e tokotaha kotoa ʻoku vaheʻi ki heʻenau kulupú, kau ai ʻa e faʻahinga foʻoú, ke nau teuteu lelei, maʻu maʻu pē mo kau ki ai.—od-E 69-72.