Fanongonongo

◼ Tohi ke tuʻuaki ʻi Tīsema: Ko e Moʻungaʻi Tangata Lahi Taha Kuo Moʻui Maí. Ki ha toe tuʻuaki, ʻe lava nai ke ke fakaʻaliʻali ʻa e Ko ʻEku Tohi ʻo e Ngaahi Talanoa Fakatohitapú. Sanuali: Ko ha tohi pē naʻe pulusi ki muʻa ʻi he 1990. Ki ha toe tuʻuaki, te ke ngāueʻaki nai ʻa e tohi ʻIlo. Fepueli: ʻUnuʻunu Ofi kia Sihova. Ki ha toe tuʻuaki, te ke ngāueʻaki nai ʻa e tohi ʻIlo. Maʻasi: Ko e Hā ʻOku Akoʻi Moʻoni ʻe he Tohi Tapú?

◼ ʻOku vavé ni ke ʻoatu ʻa e ngaahi tohi fakaafe Fakamanatu ki he 2007 ʻi he lea tefito ʻa e fakatahaʻanga taki taha. Kapau ʻoku leaʻaki ha toe ngaahi lea kehe ʻi ho feituʻu ngāué pea te ke saiʻia ke ʻi ai ha ngaahi tohi fakaafe ʻi he ngaahi lea ko iá, ʻoku totonu ke fai ha kole ki ai ʻi he vave taha ʻe malavá ʻi ha Literature Request Form (S-14). Ko ha lisi ʻo e ngaahi lea ʻa ia ʻoku ala maʻu ai ʻa e ngaahi tohi fakaafe Fakamanatú ʻe hā ia ʻi he “Fanongonongo ki he Ngaahi Fakatahaʻanga Kotoa Pē,” ʻa ia ʻoku meiliʻi atu ʻi he māhina hono ua kotoa pē. Kātaki ʻo kole pē ʻa e ngaahi lea ko ia ʻoku fiemaʻu ki ho feituʻu ngāué.

◼ Kātaki ʻo fakatokangaʻi ko e Fakamanatu ki he taʻu 2008 ʻe fai ia ʻi he Tokonaki ʻo Maʻasi 22, hili e tō ʻa e laʻaá. Ko e fakatokanga tokamuʻa ko ení ʻoku ʻoatu ia koeʻuhi ke fai ʻe he fanga tokouá ha ngaahi taʻofi pe ngaahi aleapau ki ha ngaahi holo ʻe faingamālié ʻi he taimi ʻoku ngāueʻaki ai ʻe ha ngaahi fakatahaʻanga kehekehe ʻa e Fale Fakatahaʻangá pea pau ai ke kumi ha ngaahi fale kehe. ʻI he ngaahi tuʻunga ko iá, ʻoku totonu ke felotoi ʻa e kau mātuʻá mo e pule ʻo e falé ke fakapapauʻi ʻe ʻikai ha ngaahi fakahohaʻa mei ha ngaahi ngāue kehe ʻi he falé. Koeʻuhi ko e mahuʻinga ʻo e kātoanga Fakamanatú, ko e kulupu ʻo e kau mātuʻá ʻoku totonu ke nau fili ha taha ʻi he kau mātuʻa taau angé ke hoko ko e tokotaha malangá kae ʻikai ko e taufetongi pē pe ko hono ngāueʻaki ʻa e tokoua tatau ʻi he taʻu kotoa pē. Kae kehe, kapau ʻoku ʻi ai ha tokotaha mātuʻa ʻo e kau paní ʻa ia ʻe malava ke ne fai ʻa e malangá, ʻoku totonu ke fili ia.