Puha Fehuʻi
◼ Ko e hā ʻoku fiemaʻu ai ʻa e fakafuofua leleí ʻi he fekauʻaki mo hono ngāueʻaki ha telefoni ʻoku fakahoko ki he ngaahi fakataha ʻa e fakatahaʻangá?
Kuo ʻai ʻe he ngaahi fakatahaʻanga lahi ke ala maʻu ʻe he faʻahinga tāutaha ʻoku ʻikai te nau malava ʻi ha taimi ke maʻu ʻa e ngaahi fakataha ʻa e fakatahaʻangá ʻi he Fale Fakatahaʻangá koeʻuhi ko e mahamahakí pe tuʻunga kehe nai ʻoku ʻikai toe ala kalofi, ke fanongo ai mei honau ʻapí ki he fakatahá fakafou ʻi he telefoni ʻoku fakahoko ki ai. Ko hono fakapapauʻi ʻoku ngāueʻaki ʻa e tokonaki anga-ʻofa ko ʻení ʻe he faʻahinga ʻoku nau fiemaʻu moʻoní ʻoku fiemaʻu ki ai ʻa e fakafuofua lelei mo e fokotuʻutuʻu lelei. Ko ia ai, ko e kau mātuʻa ʻoku nau tokangaʻi ha fokotuʻutuʻu peheé te nau loto ke fokotuʻutuʻu pea vakaiʻi hono ngāueʻakí koeʻuhí “ko e meʻa kotoa pe ke fai ke tāu mo māu.”—1 Kol. 14:40.
Ko e kau mātuʻá te nau fakapapauʻi ke fai ʻa e tokanga muʻomuʻa ki he kau malanga ʻi honau fakatahaʻangá ʻa ia ʻoku ʻi ai hanau mahaki tauhi pe vaivai pe ʻoku ʻikai lava ke nau ʻalu ki ha feituʻu. Ko ha tokotaha malanga ʻoku mahamahaki pe ngāvaivai fakataimi, pe ko ha ako Tohi Tapu fakalakalaka ʻoku ʻikai lava nai ke ʻalu ki ha feituʻu, te nau maʻu ʻaonga foki mei he tokonaki ko ʻení pea ʻe fakakau kinautolu ʻi hono lau ʻa e kau maʻu fakatahá. Ka ʻikai ha laine telefoni feʻunga ke feau e fiemaʻu ʻa e faʻahinga ʻoku nau fiemaʻu moʻoní, ʻe lava ke fai ha ngaahi fokotuʻutuʻu kehe nai, hangē ko hono ʻoange kia kinautolu ha ngaahi hiki tepi ʻo e fakatahá.
Ko hono moʻoní, ʻoku ʻikai ha meʻa ʻe lava ke fakatatau mo e ngaahi ʻaonga ʻoku maʻu mei he ʻi ai tonu ʻi heʻetau ngaahi fakatahá. Ko ʻetau feohi tonu mo hotau fanga tokouá ʻoku iku ia ki ha “fefakalototoʻaʻaki” pea tokoniʻi ai ʻa e faʻahinga foʻoú ke nau mahinoʻi lahi ange ʻa e fiemaʻu ke nau ʻi aí. ʻI he taimi ʻoku tau maʻu ai ʻetau ngaahi fakatahá, ʻoku tau maʻu ʻaonga lahi ange ai mei he ngaahi fakahāhaá, ʻoku malava ai ʻa e kau mātuʻá ke ʻomai ʻa e tokoni fakafoʻituitui, pea ʻoku tau maʻu tonu ai ʻa e ʻofa māfana ʻi he fanga tokouá. ʻOku ʻikai toe loi e ongoʻi ʻa e tuofefine taʻumotuʻa ʻe taha, ʻi he hili ha fāʻofua naʻe fai kiate ia ʻi heʻene mavahe mei he Fale Fakatahaʻangá naʻá ne leaʻaki: “Heʻikai fai kia koe ha meʻa peheni fakafou he laine telefoní!”—Loma 1:11, 12, NW.
ʻI he hangē ko ʻAná ʻa ia “naʻe ʻikai mahuʻi ia mei he Temipale,” ʻi he ʻaho ní, ko e tokolahi hotau fanga tokoua taʻumotuʻá ʻoku nau malava ke ʻi ai maʻu pē ʻi he ngaahi fakataha faka-Kalisitiané ʻo fakatatau pē ki honau tuʻunga moʻui leleí mo e ngaahi tuʻunga kehé. (Luke 2:36, 37) ʻI he lolotonga hono ngāueʻaki ʻa e telefoni fakahokó ʻo ka fiemaʻu, ʻoku ʻikai te nau vakai ki ai ko ha toe founga kehe ia ʻe feʻungamālie ke maʻu ai ʻa e ngaahi fakataha ʻi he Fale Fakatahaʻangá. ʻI he faʻifaʻitaki ki heʻenau faʻifaʻitakiʻanga leleí, ʻofa ke tau hokohoko atu ke fiefia ʻi hono fai ha feinga ke maʻu tonu ʻa ʻetau ngaahi fakatahá ʻi heʻetau lotu ki hotau ʻOtua lahi, ko Sihová.—Sāme 95:1-3, 6; 122:1.