ʻOku ʻIkai ʻAupito Tuku ʻEtau Ngāué
1. ʻOku tau ʻilo fēfē ko e kau ʻevangeliō he ʻuluaki senitulí naʻe ʻikai ʻaupito te nau fakakaukau ke tuku ʻenau ngāué?
1 Ko e kau ʻevangeliō faivelenga ʻi he ʻuluaki senitulí naʻa nau talaki ʻa e ongoongo leleí “ʻo ʻikai tuku” ʻi ha feituʻu pē naʻe ʻi ai ha kakai. (Ngā. 5:42) Ko ia heʻikai lava ke tau fakakaukau atu ʻi heʻenau ʻalu mei he fale ki he falé naʻa nau fakalaka ʻi he kakai ʻi he halá ʻo ʻikai malanga kia kinautolu foki. Pea heʻikai te nau tukunoaʻi ha faingamālie ke faifakamoʻoni ai ʻi he founga ʻikai anga-mahení lolotonga ha fakatau ʻi he māketí hili ʻa e ngāue fakafaifekaú. Hangē ko Sīsuú, naʻe ʻikai ʻaupito te nau fakakaukau ke tuku ʻenau ngāué.—Mk. 6:31-34.
2. Ko e hā ʻoku kau ʻi he moʻui ʻo fakatatau ki hotau hingoá?
2 Mateuteu Maʻu Pē: Ko hotau hingoá, ʻa e Kau Fakamoʻoni ʻa Sihová, ʻoku ʻikai ke ne fakamatalaʻi pē ʻa e meʻa ʻoku tau faí; ʻokú ne fakamatalaʻi ko hai kitautolu. (ʻAi. 43:10-12) Ko ia ʻoku tau mateuteu maʻu pē ke fai ha taukapo ki heʻetau ʻamanakí, naʻa mo e taimi ʻoku ʻikai ke tau ʻalu ai ʻi he fale ki he falé. (1 Pita 3:15) ʻOkú ke fakatuʻotuʻa atu ki he ngaahi tuʻunga te ne fakaʻatā nai ai koe ke faifakamoʻoni ʻi he founga ʻikai anga-mahení pea fakakaukau leva fekauʻaki mo e meʻa nai te ke leaʻakí? ʻOkú ke ʻalu maʻu pē mo ha ʻū tohi ke tuku ki he faʻahinga ʻoku nau fakahāhā ha mahuʻingaʻiá? (Pal. 21:5, NW) ʻOkú ke malanga pē mei he fale ki he fale, pe ʻokú ke toe fakamafola ʻa e ongoongo leleí ki he kakai ʻi he ngaahi feituʻu kehé kapau ʻoku fakaʻatā ia ʻe ho ngaahi tuʻungá?
3. Ko e hā ʻoku ʻikai totonu ai ke siʻi hono fakamamafaʻi ʻa e malanga ʻi he halá mo e ngaahi tauʻanga meʻalelé, ʻū paʻaké, ʻū feituʻu faiʻanga pisinisí, mo e hā fua?
3 Faifakamoʻoni “ʻi he ʻAo ʻo e Kakaí:” ʻOku tau malanga ʻi he halá mo e ngaahi tauʻanga meʻalelé, ʻū paʻaké, ʻū feituʻu faiʻanga pisinisí, mo e hā fua. Ko e ngaahi feinga peheé ʻoku anga-kehe, kehe mei he anga-mahení, pe ko ha fili pē ke fai? Naʻe pehē ʻe he ʻapositolo ko Paulá naʻá ne malanga “ʻi he ʻao ʻo e kakaí” pea mei fale ki he fale. (Ngā. 20:20) Ko e ngāue fakafaifekau fale ki he falé ʻa ʻetau founga tefito mo ola lelei taha ʻo e aʻu ki he kakaí mo e pōpoaki ʻo e Puleʻangá. Kae kehe, ko e kau ʻevangeliō ʻi he ʻuluaki senitulí naʻa nau tokanga tefito ki he kakaí, ʻo ʻikai ko e ʻū falé. Naʻa nau ngāueleleiʻaki ʻa e faingamālie kotoa pē ke talanoa fekauʻaki mo e moʻoní—ʻi he ʻao ʻo e kakaí, ʻi he founga ʻikai anga-mahení, pea mei he fale ki he fale. ʻOfa ke tau maʻu ha tūkunga fakakaukau tatau koeʻuhi ke fakahoko kakato ai ʻetau ngāue fakafaifekaú.—2 Tīm. 4:5.