Founga ʻe Nima ke Maʻu Ai ha Ako Tohi Tapu
1. Kapau ko ha pole ke maʻu ha ako Tohi Tapu ʻi hotau feituʻu ngāué, ko e hā ʻoku totonu ke tau faí pea ko e hā hono ʻuhingá?
1 Kuó ke ʻiloʻi ko ha pole ia ke maʻu ha taha ʻa ia ʻe lava ke mo ako Tohi Tapu? Hokohoko atu hoʻo feingá. ʻOku tāpuakiʻi ʻe Sihova ʻa e faʻahinga ʻoku ʻikai ke nau foʻi ʻi he fai hono finangaló. (Kal. 6:9) Hoko haké ko e ngaahi fokotuʻu ʻe nima te ne tokoniʻi koe.
2. ʻE anga-fēfē haʻatau ngāueʻaki ʻa e tuʻuaki fakahangatonú ke kamata ha ako Tohi Tapu?
2 Tuʻuaki Fakahangatonu: ʻOku ʻilo ʻe he kakai tokolahi ʻoku tau tuʻuaki ʻa e Taua Leʻo mo e ʻĀ Hake!, ka ʻoku ʻikai ke nau ʻilo nai ʻoku tau tuʻuaki mo e ngaahi ako Tohi Tapú. Ko e hā ʻoku ʻikai feinga ai ke tuʻuaki fakahangatonu ʻi he taimi ʻoku tau ʻalu ai mei he fale ki he falé? ʻE lava ke ke toe ʻeke ki he kakai mahuʻingaʻia ʻa ia naʻá ke ʻaʻahi ki aí pē te nau saiʻia ʻi ha ako Tohi Tapu. Kapau ʻe ʻikai ke nau tali, ʻe lava ke ke hokohoko atu hono tuku pē ha tohi mo fakatupulekina ʻa e mahuʻingaʻiá. Ko ha tokoua kuó ne hokohoko ʻaʻahi ki ha ongo meʻa mali ʻi ha laui taʻu ko e taha ia ʻo ʻene tukuʻanga makasini paú. Hili ʻene tuku kia kinaua ʻa e ngaahi makasini fakamuimui tahá, ʻi heʻene tafoki ke mavahé kae hili ʻene kiʻi fakakaukaú naá ne ʻeke: “Te mo saiʻia ʻi ha ako Tohi Tapu?” Ki heʻene ʻohovalé naʻá na tali ʻio. Ko e taimí ni kuó na papitaiso.
3. ʻOku totonu ke tau pehē ko e kau maʻu fakatahá ʻoku nau ako Tohi Tapu mo ha taha? Fakamatalaʻi.
3 Kau Maʻu Fakatahá: ʻOua ʻe pehē ko e kau mahuʻingaʻia ʻokú ke sio ki ai ʻi he ngaahi fakataha ʻa e fakatahaʻangá kuo nau ʻosi ako Tohi Tapu. Naʻe pehē ʻe he tokoua ʻe taha: “Laka hake he vaeua ʻo e kau akó naʻá ku kamataʻi ʻi he fakalea kia kinautolu naʻe ʻi he fakatahá.” Ko ha tuofefine ʻe taha naʻá ne fakakaukau ke fakalea ki ha fefine naʻe anga-mā ʻa ia naʻe ʻi ai ʻene ongo tamaiki fefine kuo ʻosi papitaiso ʻi he fakatahaʻangá. Ko e fefiné kuó ne maʻu ʻa e ngaahi fakatahá ʻi he taʻu nai ʻe 15 pea naʻe haʻu maʻu pē ia ki he Fale Fakatahaʻangá ki muʻa pē ke kamatá pea mavahe leva he tukú. Naʻe loto ʻa e fefiné ke ako pea naʻe faai atu pē ʻo ne haʻu ki he moʻoní. ʻOku tohi ʻe he tuofefiné: “ʻOkú ou fakameʻapangoʻia heʻeku tatali ē ʻi he taʻu ʻe 15 ke ʻeke ange kapau te ne saiʻia ke ako Tohi Tapú!”
4. ʻE lava fēfē ke tau maʻu ha ako fakafou he fakafeʻiloakí?
4 Fakafeʻiloaki: Ko e tuofefine ʻe taha naʻe feinga mālohi ke kaungāfononga mo e niʻihi kehé ki heʻenau ngaahi ako Tohi Tapú. ʻI hono fakaʻatā ʻe he faiakó, ʻi he fakaʻosí ʻokú ne ʻeke ki he tokotaha akó kapau ʻokú ne ʻilo ha niʻihi kehe ʻa ia te nau fiefia ke maʻu haʻanau ako tonu. ʻI he taimi ʻokú ke tuʻuaki ai ʻa e tohi Akoʻi ʻe he Tohi Tapú ki ha taha kuó ke ʻaʻahi ki ai, te ke ʻeke nai: “ʻOkú ke ʻilo ha taha kehe te ne saiʻia ke maʻu haʻane tatau?” ʻI he taimi ʻe niʻihi, ko e ngaahi tuʻungá ʻe ʻikai ke ne fakaʻatā ʻa e kau malangá mo e kau tāimuʻá ke nau fakahoko ha ako mo ha taha ʻoku nau fetaulaki ʻi he feituʻu ngāué. Ko ia ʻai ke ʻiloʻi ʻe he niʻihi kehé ʻokú ke faingamālie ke fakahoko ha ako Tohi Tapu.
5. Ko e hā ʻoku totonu ai ke ʻeke ki he kau hoa taʻetui ko honau malí ko e mēmipa ʻi he fakatahaʻangá kapau ʻoku saiʻia ke ako?
5 Hoa Taʻetui: ʻOku ʻi ai ha kau malanga ʻi hoʻo fakatahaʻangá ʻoku mali ki ha kau taʻetui? Ko e kau taʻetui ʻe niʻihi ʻoku ʻikai ke nau tali ʻa e talanoa fekauʻaki mo e Tohi Tapú mo honau ngaahi hoa Kalisitiané ka te nau tali ha fakaafe ke ako mo ha taha ʻoku ʻikai kau he fāmilí. ʻOku faʻa lelei tahá ke fai ha fetalanoaʻaki mo e husepāniti pe uaifi tuí ki muʻa koeʻuhi ke fakapapauʻi ʻa e fakaofiofi lelei tahá.
6. Ko e hā ʻa e mahuʻinga ʻo e lotú ʻi he feinga ke maʻu ha akó?
6 Lotu: ʻOua ʻe fakasiʻisiʻia ʻa e mālohi ʻo e lotú. (Sēm. 5:16) ʻOku talaʻofa mai ʻe Sihova ke fanongo ki heʻetau ngaahi kolé ʻi he taimi ʻoku nau fehoanaki ai mo hono finangaló. (1 Sio. 5:14) Naʻe pehē ʻe ha tokoua ʻe taha ʻa ia ne fuʻu femoʻuekina ʻaupito naʻá ne kamata lotu ki ha ako Tohi Tapu. Naʻe fifili hono uaifí pē te ne maʻu ha taimi ke tokangaʻi ha tokotaha ako, tautefito kapau ko e tokotaha akó ʻoku lahi ʻene ngaahi palopalemá. Ko ia naʻá ne ʻave ʻa e ngaahi hohaʻa ko iá kia Sihova ʻi he lotu maʻa hono husepānití ke maʻu ha akó. Ko ʻena ngaahi lotú naʻe tali ʻi he uike nai ʻe ua mei ai ʻi he taimi naʻe maʻu ai ʻe ha tāimuʻa ʻi he fakatahaʻangá ha tangata naʻá ne loto ke ako peá ne ʻoange leva ʻa e akó ki he tokouá. Naʻe tohi ʻe he uaifí: “Ki ha taha pē nai ʻokú ne ongoʻi ko ha fakahoko ha ako Tohi Tapú ʻoku fakalaka ia ʻi heʻene malavá, ʻokú ou pehē: Fakamatalaʻi mahino ʻi hoʻo lotú pea ʻoua ʻe tuku ʻa e lotu fekauʻaki mo iá. ʻOku lahi ange ʻema fiefiá ʻi he meʻa naʻá ma ʻamanekiná.” ʻI he kītakí, te ke malava foki mo koe ke maʻu ha ako Tohi Tapu mo hokosia ʻa e fiefia ʻi hono tokoniʻi ha taha ki he “hala ʻoku taki atu ki he moʻuí.”—Māt. 7:13, 14.