Kumi ki ha Ngaahi Faingamālie ke Malanga Ai
1 ʻOku faʻuʻaki ʻa e fakatahaʻanga Kalisitiané ha kakai ʻo e ngaahi tuʻunga kehekehe lahi. Neongo ia, ʻoku tau fāʻūtaha ʻi heʻetau fakapapau ke fakalāngilangiʻi ʻa Sihova. (Saame 79:13) Kapau ʻoku hanga ʻe he mahamahakí pe ko ha ngaahi tuʻunga faingataʻa kehe ʻo fakangatangata ʻetau kau ʻi hono fanongonongo ʻa e ongoongo leleí, ʻe lava fēfē ke tau kumi ki ha ngaahi faingamālie ke malanga ai?
2 ʻI he Ngaahi Ngāue Fakaʻahó: Naʻe ngāueʻaongaʻaki ʻe Sīsū ʻa ʻene ngaahi feangainga fakaʻaho mo e kakaí ke fai ai ha fakamoʻoni. Naʻá ne lea kia Mātiu ʻi he lolotonga ʻene paasi atu ʻi ha ʻōfisi tukuhau, kia Sākeasi he lolotonga ʻene fonongá, pea ki ha fefine Samēlia he lolotonga ʻo ʻene mālōloó. (Māt. 9:9; Luke 19:1-5; Sione 4:6-10) ʻI heʻetau ngaahi ngāue fakaʻahó, te tau lava ai mo kitautolu foki ke liliu ha fetalanoaʻaki anga-maheni ki ha faifakamoʻoni. ʻI he maʻu ha Tohi Tapu, fakataha mo ha ngaahi tuleki pe ngaahi polosiuá, ʻe fakaʻaiʻai ai kitautolu ke tau mateuteu ke lea ʻo fekauʻaki mo ʻetau ʻamanakí.—1 Pita 3:15.
3 ʻOku hanga ʻe hoʻo faingataʻaʻia fakasinó ʻo fakangatangata hoʻo kau ki he ngāue matapā-ki-he-matapaá? Tokanga ki he ngaahi faingamālie ke faifakamoʻoni ai ki he tokotaha ngāue fakafaitoʻo ʻoku ʻaʻahi maí mo e niʻihi kehe ʻokú ke fetuʻutaki mo iá. (Ngā. 28:30, 31) Kapau ʻoku faʻa ʻai koe ʻe ho ngaahi tuʻungá ke ke nofo ai ʻi ʻapi, kuó ke ʻahiʻahiʻi ʻa e faifakamoʻoni ʻi he telefoní pe faitohí? Ko ha tuofefine ʻe taha ʻokú ne faitohi maʻu pē ki he ngaahi mēmipa ʻi hono fāmili ʻikai-Fakamoʻoní. ʻOkú ne fakakau ai ʻa e ngaahi fakakaukau fakalototoʻa mei he Tohi Tapú mo e ngaahi hokosia naʻá ne maʻu ʻi heʻene faifakamoʻoní.
4 ʻI he Ngāueʻangá pe ʻApiakó: Ko ʻetau holi ke fakalāngilangiʻi ʻa Sihová te ne toe ueʻi kitautolu ke fokotuʻu ha ngaahi faingamālie ke tō ai ʻa e fanga kiʻi tenga ʻo e moʻoní ʻi he ngāueʻangá pe ʻapiakó. Naʻe vahevahe atu ʻe ha tokotaha malanga taʻu valu ki heʻene kalasí ʻa e meʻa naʻá ne lau ʻi he Awake! ʻo fekauʻaki mo e māhiná. ʻI he hili hono ʻiloʻi ʻa e maʻuʻanga ʻo ʻene fakamatalá, naʻe kamata ai ke tali maʻu pē ʻe heʻene faiakó ʻa e Taua Leʻo mo e Awake! ʻI he ngāueʻangá, ko ʻetau tuku pē ha tatau ʻo e tohi Akoʻi ʻe he Tohi Tapú ʻi he feituʻu ʻoku lava ke sio ki ai ʻa e niʻihi kehé ʻe langaʻi nai ai ha ngaahi fehuʻi pea taki atu ai ki ha faifakamoʻoni.
5 ʻOku lava ke ke fakakaukau atu ki ha ngaahi founga ke fokotuʻu ai ha ngaahi faingamālie ʻi hoʻo ngaahi ngāue fakaʻahó ke malanga ai? ʻI hono ngāueʻaongaʻaki hotau ngaahi tuʻungá, ʻofa ke tau feinga ʻi he ʻaho taki taha ke ‘ʻoatu ki he ʻOtuá ha feilaulau ʻo e fakafetaʻi.’—Hēp. 13:15.