MOʻUI KO HA KALISITIANE
Fekumi ki he Fakakaukau ʻa e ʻOtuá
ʻOku tau loto ke fakahōifuaʻi ʻa Sihova ʻi he meʻa kotoa ʻoku tau faí. (Pal. 27:11) Ke fai iá, ʻoku fiemaʻu ke tau fai ʻa e ngaahi fili ʻoku tapua atu ai ʻa e anga ʻene fakakaukaú naʻa mo e ʻikai ha ngaahi lao pe tuʻutuʻuni pau ke ne tataki kitautolu. Ko e hā te ne tokoniʻi kitautolu ke fai peheé?
Tauhi maʻu ha taimi-tēpile ako Tohi Tapu tuʻumaʻu. ʻI he taimi kotoa pē ʻoku tau lau ai ʻa e Tohi Tapú ʻoku hangē ia ʻoku tau feohi mo Sihová. ʻE lava ke tau ako fekauʻaki mo e anga ʻo e fakakaukau ʻa Sihová ʻaki ʻa e ako mei he founga ʻene fakafeangai ki hono kakaí. Sivisiviʻi foki ʻa e faʻifaʻitakiʻanga ʻo e faʻahinga naʻa nau fai ʻa e ngaahi meʻa naʻe lelei pe kovi ʻi heʻene vakaí. ʻI he fiemaʻu ke tau fai ha fili, ʻe lava ke fakamanatu mai ʻe he laumālie māʻoniʻoní ʻa e ngaahi lēsoni mahuʻinga mo e ngaahi tefitoʻi moʻoni naʻa tau ako mei he Folofola ʻa e ʻOtuá.—Sione 14:26.
Fai ha fekumi. ʻI hoʻo fehangahangai mo ha fili, ʻeke hifo, ‘Ko e hā ʻa e ngaahi veesi pe fakamatala ʻi he Tohi Tapú te ne tokoniʻi au ke mahinoʻi ʻa e anga ʻo e ongoʻi ʻa Sihova fekauʻaki mo ení?’ Lotu kia Sihova ki ha tokoni, pea ngāueʻaki ʻa e ngaahi meʻangāue fakaefekumi fakateokalati ʻoku ala maʻu ʻi hoʻo leá ke tokoniʻi koe ke ʻilo pea ngāueʻaki ʻa e ngaahi tefitoʻi moʻoni Fakatohitapu ʻoku felāveʻi mo ho tuʻungá.—Saame 25:4.
SIO ʻI HE VITIŌ KUO PAU KE TAU “LELE FAKATAHA MO E KĀTAKI”—KAI ‘A E ME‘AKAI FAKATUPU IVÍ, PEA TALI LEVA ʻA E NGAAHI FEHUʻI KO ENÍ:
Ko e hā ʻa e ngaahi tenge naʻe fehangahangai mo e tuofefine kei siʻi ʻi he vitioó?
ʻE lava fēfē ke ke ngāueʻaki ʻa e meʻangāue fakaefekumí ke tokoniʻi koe ke fehangahangai mo ha tenge meimei tatau?
ʻI heʻetau vaheʻi ʻa e taimi ke fekumi pea ako fakafoʻituitui ke tokoniʻi kitautolu ke fai ʻa e ngaahi fili leleí, ʻe anga-fēfē ʻetau maʻu ʻaonga mei aí?—Hep. 5:13, 14