Ko Sīsū “Naʻá Ne Ako ʻa e Talangofuá”

Ko Sīsū kuó ne talangofua maʻu pē kia Sihova. (Sione 8:29) Ko e hā leva ʻa e ʻuhinga ʻoku pehē ai ʻi he Tohi Tapú: “Naʻá ne ako ʻa e talangofuá mei he ngaahi meʻa naʻá ne faingataʻaʻia aí”?—Hep. 5:8.

Lolotonga ʻa e ʻi māmani ʻa Sīsuú, naʻá ne fehangahangai mo e ngaahi tuʻunga naʻe ʻikai hoko ʻi hēvani. Naʻe ʻohake ia ʻe ha ongo mātuʻa naʻá na anga-līʻoa kae taʻehaohaoa. (Luke 2:51) Naʻá ne faingataʻaʻia ʻi he nima ʻo e kau taki lotu fakameleʻí pea mo e kau pule fakaemāmani taʻefaitotonu. (Māt. 26:59; Mk. 15:15) ʻIkai ngata aí, “naʻá ne fakatōkilaloʻi ia peá ne hoko ʻo talangofua ʻo aʻu ki he tuʻunga ʻo e maté,” ko ha mate fakamamahi.—Fil. 2:8.

Ko e ngaahi hokosia ko ení naʻá ne akoʻi ʻa Sīsū fekauʻaki mo e talangofuá ʻi ha founga naʻe ʻikai ʻaupito ke ne ako ʻi hēvani. Naʻe malava ai ke ne hoko ko e Tuʻi mo e Taulaʻeiki Lahi haohaoa, ko ha tokotaha ʻoku lava ke ne kaungāongoʻi mai mo kitautolu. (Hep. 4:15; 5:9) Naʻe hoko ʻa Sīsū ʻo toe mahuʻinga lahi ange kia Sihova hili ʻene ako ʻa e talangofuá mei he ngaahi meʻa naʻá ne faingataʻaʻia aí. Ko kitautolu foki ʻe lava ke tau hoko ʻo mahuʻinga mo ʻaonga lahi ange kia Sihova ʻi ha faʻahinga vāhenga-ngāue pē te ne ʻomai nai kiate kitautolu ʻi he taimi ʻoku tau nofoʻaki talangofua ai ʻi he malumalu ʻo e ngaahi tuʻunga faingataʻá.—Sēm. 1:4.