Tokoni Fakafaitoʻo​​—Meʻa ʻe Fai ʻe he Puleʻanga ʻo e ʻOtuá

“Ko e ngata ko ia ʻa e fakataputapui fakamāmanilahi ki he COVID-19 ʻoku ʻikai ʻuhinga iá ʻoku ngata ai mo e fakamanamana fakamāmanilahi ʻo e COVID-19. . . . ʻI he taimi ʻe tukituki mai ai ʻa e mahaki fakaʻauha hokó​​—pea ʻe hoko ia​​—kuo pau ke tau mateuteu ki ai.”​​—Dr. Tedros Adhanom Ghebreyesus, talēkita seniale ʻo e Kautaha Moʻui ʻa Māmaní, Mē 22, 2023.

Ko e kakai tokolahi ʻoku nau hokohoko atu ke fāinga mo e ngaahi uesia fakaesino mo fakaʻatamai ko e tupu mei he mahaki fakaʻauha COVID-19. ʻE hoko ʻa e ngaahi founga-pulé mo e ngaahi kautaha tokoni fakafaitoʻó ʻo mateuteu ki he mahaki fakaʻauha hokó, lolotonga iá ʻoku nau tokangaekina ʻa e ngaahi palopalema lolotonga ʻo e moʻuí?

ʻOku tuhu ʻa e Tohi Tapú ki ha founga-pule te ne tokonaki mai ʻa e tokoni fakafaitoʻo ʻoku tau fiemaʻú. ʻOku pehē ai “ʻe fokotuʻu ʻe he ʻOtua ʻo langí ha puleʻanga,” pe founga-pule. (Taniela 2:44) ʻI he malumalu ʻo e founga-pule ko iá, “ʻe ʻikai ha taha ʻoku nofo ai te ne pehē: ‘ʻOku ou puke.’” (ʻAisea 33:24) Ko e tokotaha kotoa te ne maʻu ʻa e moʻui leleí mo e mālohi fakatalavoú.​​—Siope 33:25.