Fakalato ʻe he Meʻa ʻOku Hulú ʻa e Fusimoʻomó

ʻOku fakahoko ʻe he Kau Fakamoʻoni ʻa Sihová ʻa e ngāue mahuʻinga ke tokoniʻi ʻa e kakaí ʻi he ngaahi fonua laka hake ʻi he 200. Ka ʻi he ngaahi fonua ko ení, ko e ngaahi fonua pē ʻe 35 ʻoku nau maʻu ʻa e paʻanga feʻunga fakalotofonua ke feau ʻenau ngaahi fakamolé. ʻOku anga-fēfē hono tokangaʻi ʻa e ngaahi fakamole ʻi he ngaahi fonua ʻoku ʻikai loko tuʻumālié?

ʻOku sivisiviʻi ʻe he Kulupu Pule ʻo e Kau Fakamoʻoni ʻa Sihová ʻa e ngaahi fiemaʻu fakalaumālie mo e ngaahi ngāue ʻa e kaungātuí ʻi māmani lahi. ʻOku nau palani fakalelei ʻa e paʻangá pea ngāueʻaki ia ʻi he founga totonu. Kapau ʻoku maʻu ʻe ha vaʻa ha paʻanga tokoni ʻoku hulu atu ia ʻi he meʻa ʻoku fiemaʻu ke tokangaʻi ʻaki ʻa e ngaahi ngāue fakalotofonuá, ʻoku nau ʻoatu leva ia ke ngāueʻaki ʻe he ngaahi fonua ʻoku fusimoʻomó. ʻOku muimui ʻa e fokotuʻutuʻu ko ení ki he faʻifaʻitakiʻanga ʻo e muʻaki kau Kalisitiané, ʻa ia naʻa nau fetokoniʻaki ʻo “vahevahe tatau.” (2 Kolinitō 8:14) Naʻa nau ngāueʻaki ʻenau meʻa ʻoku hulu atú ke tokoni ki he kau Kalisitiane naʻe fusimoʻomó.

Ko e hā ʻa e ongoʻi hotau fanga tokoua mei he ngaahi vaʻa kehé ʻi heʻenau maʻu ʻa e paʻanga tokoni ʻoku hulú? Ko e fakatātā, ʻi Tenisania laka hake ʻi he vaeua ʻo e tokolahi ʻo e kakaí ʻoku nau maʻu moʻui ʻi he paʻanga siʻi hifo ʻe 2 he ʻaho. Naʻe ngāueʻaki ʻa e paʻanga hulú ke fakaleleiʻiʻaki ʻa e Fale Fakatahaʻanga ʻoku ngāueʻaki ʻe he Fakatahaʻanga Mafinga. Naʻe tohi ʻe he fakatahaʻangá: “Hili ʻa e fakaleleiʻi ʻa e Fale Fakatahaʻangá, ʻoku toe tokolahi ange ʻa e kau maʻu fakatahá! ʻOku mau houngaʻia ʻaupito ki he kautaha ʻa Sihová mo e fetokouaʻaki ʻi māmani lahí ki heʻenau nima-homo ʻo malava ai ke mau fiefia ʻi hono maʻu ha feituʻu faiʻanga lotu fakaʻofoʻofa.”

Ko e niʻihi ʻo hotau fanga tokoua ʻi Suli Langikaá kuo nau fāinga mo e nounou fakameʻatokoní tupu mei he mahaki fakaʻauha COVID-19. Naʻe kau ki heni ʻa Imara Fernando mo hono kiʻi foha ko Enosh. Neongo ia, fakafou ʻi he ngaahi tokoni mei he ngaahi fonua kehé, naʻe malava ai ke na maʻu ʻena ngaahi fiemaʻu vivilí. Naʻá na tohi ʻi ha kiʻi kaati: “ʻOkú ma fakamālō ki he fanga tokoua kuo nau fakahāhā ʻa e ʻofa kia kimaua ʻi he taimi faingataʻa ko ení. ʻOkú ma fiefia lahi ke kau ki he fāmili ko ení pea ʻokú ma lotua maʻu pē ʻe tokoniʻi ʻe Sihova ʻa e kotoa hotau fanga tokouá lolotonga ʻa e ngaahi ʻaho fakaʻosi ko ení.”

Tatau ai pē pe ko fē ha feituʻu ʻoku nofo ai hotau fanga tokouá mo e fanga tuofāfiné, ʻoku nau fiefia ke vahevahe ʻa e meʻa ʻoku nau maʻú. Ko e fakatātā, ko Enosh naʻá ne ngaohi ha kiʻi puha tātānaki paʻanga ke malava foki mo ia ʻo fai ha foaki ki he ngaahi fāmili ʻoku nau fiemaʻu tokoní. Naʻe fakahāhā ʻe Guadalupe Álvarez ʻa e nima-homo tatau. ʻOkú ne nofo ʻi ha feituʻu ʻi Mekisikou ʻa ia ko e tokolahi ʻoku ʻikai ke nau maʻu ha vahe feʻunga pe ʻikai ha vahe pau. Neongo ia, ʻokú ne foaki ki he kautaha ʻa Sihová ʻo fakatatau ki he meʻa ʻokú ne maʻú. Naʻá ne tohi: “ʻOku ou houngaʻia ʻi he lelei mo e ʻofa mateaki ʻa Sihová. ʻOku ou ʻilo ko ʻeku foakí ʻe tānaki atu ia ki he tokoni ʻa e niʻihi kehé pea ʻe ʻaonga ia ki hoku fanga tokoua ʻoku nau fiemaʻu tokoní.”

ʻOku fiefia ʻa e ngaahi ʻōfisi vaʻá ke nau ʻave ʻa e paʻanga ki he ngaahi feituʻu ʻoku nau fiemaʻu tokoní. ʻOku pehē ʻe Anthony Carvalho, ʻa ia ʻokú ne ngāue ʻi he Kōmiti Vaʻa ʻo Pelēsilá: “ʻI he ngaahi taʻu lahi, ko e ngāue ʻi homau fonuá naʻe fiemaʻu ha tokoni fakapaʻanga mei he ngaahi fonua kehé. Koeʻuhi ko e tokoni ko ení, naʻa mau sio ai ki ha tupu fakaofo. ʻI he taimí ni kuo liliu ʻemau tuʻunga fakapaʻangá pea ʻoku mau maʻu ʻa e malava ke tokoni ki he niʻihi kehé. ʻOku vakai ʻa e fanga tokoua ʻi Pelēsilá ki he ngāue fakamalanga ʻi māmani lahí pea sio ki he founga ʻe lava ke fai ai ha tokoni.”

Ko e hā ʻa e founga lelei taha ke poupou ai ʻa e Kau Fakamoʻoni ʻa Sihová ki honau fanga tokoua mo e fanga tuofāfine ʻoku nau fiemaʻu tokoní? ʻOku ʻikai ko e ʻoatu fakahangatonu ʻa e paʻangá ki ha ʻōfisi vaʻa ʻi ha fonua kehe, ka ko e ʻoatu ʻa e tokoni fakapaʻangá ki he ngāue ʻi māmani lahí. ʻE lava ke fakahoko eni fakafou ʻi he kiʻi puha meʻaʻofá ʻa ia ko e “Ngāue ʻi Māmani Lahi” pe ko e donate.jw.org. ʻOku mau houngaʻia loto-moʻoni ki he ngaahi tokoni fakapaʻanga kotoa pē.