Meʻakai ʻOku Malu Maʻá e Tokotaha Kotoa
KO E kai ʻo e meʻakai leleí ko ha meʻa fakafiefia. Kae hangē ko ia kuo tau vakai ki aí, ko e meʻakai ko iá ʻoku ʻikai faingofua maʻu pē ke maʻu. Ko e toe kovi angé, ʻoku laui miliona ʻa e kakai ʻoku ʻikai te nau maʻu ʻa e fili ʻo e hohaʻa pe ʻoku malu feʻunga pe fakatupu moʻuilelei ʻa ʻenau meʻakaí. ʻOku nau nōfoʻi ʻi he kumi ha meʻakai feʻunga koeʻuhi pē ke moʻui. ʻE malava ke pehē naʻe fakataumuʻa ʻe he ʻOtuá ke peheni ʻa e ngaahi meʻá?
Fakakaukau atu ki ai. ʻI hono tuku ʻe he ʻOtuá ʻa e tangatá mo e fefiné ʻi he foʻi māmaní, naʻe ʻi ai ha faʻahinga ʻuhinga ke na hohaʻa ai ki he meʻakaí? ʻIkai, ʻikai ʻaupito! Ko e fakamatala ʻi he tohi Tohitapu ʻa Sēnesí ʻoku pehē ai: “Naʻe fakatupu ʻe Sihova Elohimi mei he kelekele ʻa e ʻakau kehekehe naʻe ha fakaʻofoʻofa, pea lelei ki he kai.” (Senesi 2:9) Ko ia, naʻe maʻu ʻe ʻĀtama mo ʻIvi ʻa e meʻakai lelei kehekehe pea pehē ki ha tokonaki lahi mo taʻefakangatangata ʻo ia. Ko e ʻOtua naʻá ne fakatupu kinauá naʻá ne ʻafioʻi tonu ʻa ʻena fiemaʻu fakameʻatokoní; naʻá ne toe ʻafioʻi ʻa e meʻa te na fiefia aí. Ko e moʻoni, ʻoku ʻikai ke tau ʻi he ngoue ko ʻĪtení ʻi he ʻahó ni. Ka kuo liliu ʻe he ʻOtuá ʻa ʻene fuofua taumuʻa ki he faʻahinga ʻo e tangatá mo e foʻi māmaní?
ʻOku tau maʻu ʻa e ʻuhinga lelei ke tui ai ʻoku vavé ni ke maʻu ʻo lahi ʻe he tokotaha kotoa pē ʻi he māmaní ʻa e meʻakai fakatupu-moʻuilelei mo lelei! Ko e tui ko ení ʻe lava ke hoko ia ko ha tokoni mālohi ʻi heʻetau tauhi ko ia ha fakakaukau mafamafatatau ʻi he ʻīsiu ʻo e tuʻunga malu ʻo e meʻakaí he ʻaho ní. Ko ha ʻamanaki pehē, kapau ʻoku pau mo alafalalaʻanga, ʻe lava ke ne tokoniʻi kitautolu ke kalofi ʻa hono maʻu ʻo e ngaahi fakakaukau fuʻu tōtuʻa mo hulú.
Ko e hā ʻe lava ke tau mātuʻaki fakapapauʻi ai ʻe vavé ni ke kehe ʻa e moʻuí? Ko e kau ako vēkeveke ʻo e Folofola ʻa e ʻOtuá ʻoku nau ʻilo ʻoku tau lolotonga moʻui ʻi he “ngaahi ʻaho fakaʻosi” ʻo e fokotuʻutuʻu ʻo e ngaahi meʻa ko ení. Ko e fokotuʻutuʻu lolotongá ʻoku fakalele ia ʻe he poto fakaetangatá, ʻa ia ko e ngaahi tafaʻaki lahi ʻo e moʻuí ʻoku taʻepau mo fakafalala ʻi hono ʻahiʻahiʻi ʻa e ngaahi founga ʻoku lavameʻá. ʻI he fekauʻaki mo e ngaahi founga ʻo hono ngaohi ʻo e meʻakaí, ʻoku ʻi ai ʻa e veiveiua lahi pe ʻoku malu ia pe fakatuʻutāmaki. Ko e veiveiua ko iá ʻokú ne fakatupunga ʻa e manavahē, felotokehekeheʻaki mo e taʻefeongoongoi.—2 Timote 3:1-5, NW.
Kuo talaʻofa ʻe he Tokotaha-Fakatupu ʻo e faʻahinga ʻo e tangatá ke fetongi ʻa e fokotuʻutuʻu lolotonga ʻo e ngaahi meʻa ko ení ʻaki ha fokotuʻutuʻu foʻou fakaʻaufuli. Ko ʻene muʻaki taumuʻa—ki he māmaní kotoa ke hoko ko ha palataisi ʻo hangē ko e ngoue ko ʻĪtení, ʻo nofoʻi ʻe ha fāmili fakaetangata fiefia mo moʻuileleí—ʻe fakahoko ia. Ko e mālohi fakaefāʻūtaha ʻo e poto fakaʻotua haohaoá te ne toki fakafonu ʻa e māmaní. (Aisea 11:9) Ko e poto fakaetangata taʻepaú ʻe ʻikai ke toe ʻi ai. Ko e fokotuʻutuʻu foʻou ʻa e ʻOtuá te ne tatala ʻa e ʻuhinga kotoa ki he veiveiua ʻo fekauʻaki mo e tuʻunga malu ʻo ʻetau meʻakaí. ʻIkai ʻoku ʻuhinga lelei ke fakaʻosiʻaki ko e ʻOtua naʻá ne fakatupu ʻa e tangatá te ne mahinoʻi foki ʻa ʻetau ngaahi fiemaʻu fakameʻatokoní?
Meʻakai Haohaoa mei he Tokotaha-Fakatupú
ʻOku ʻi he Tohitapú ʻa e ngaahi kikite maeʻeeʻa lelei fekauʻaki mo e ngaahi tuʻunga ʻo e moʻuí ʻi he malumalu ʻo e fokotuʻutuʻu ka hoko mai ʻo e ngaahi meʻá. Naʻe tohi ʻa e palōfita ko ʻAiseá: “[Ko e ʻOtuá] te ne ʻomi ʻuha ki he tenga kuo ke tokaki ʻi he kelekele, mo e meʻakai mei he fua ʻo ho kelekele; ʻe hange ha vao fue, ʻo kano lelei. ʻI he taimi ko ia ʻe kaikai hoʻo monumanu ʻi ha fuʻu vao ʻatā; pea ko e fanga pulu mo e fanga asi ʻoku ngaueʻi ʻa e kelekele te nau kai ʻa e tenga kuo fefiofi, ʻa e meʻa sivi ʻaki ha fohe mo e huo vangavanga.”
ʻOku toe pehē ʻe he kikite ʻa ʻAiseá: “ʻI he moʻunga ko eni ʻe fai ʻe Sihova Sapaoti ki he ngaahi kakai kotoa pe ha katoanga meʻa lolo, ha katoanga uaine kuo fisi, ʻani meʻa lolo kuo loloʻi ʻaki ʻa e ngako ʻo e hui, ʻani uaine kuo fisi, ʻo sivi ke masivi.” ʻOku liliu ʻe he The New American Bible ʻa e kupu fakamuimuí, “ko ha kātoanga ʻo e meʻakai mohu ivi mo e uaine lelei, meʻakai huhuʻa mohu ivi mo e uaine haohaoa mo lelei.”—Aisea 25:6; 30:23, 24.
ʻOku ongo fakamānako ia kia koe? ʻOku fakapapauʻi mai kia kitautolu ʻe he kikite ʻa ʻAiseá ko e tokotaha kotoa pē ʻe moʻui ʻi he malumalu ʻo e fokotuʻutuʻu foʻou ʻa e ʻOtuá te ne maʻu ʻo hulu ʻa e meʻakai fakamatelié. ʻE malu ia ke kai mei ai? ʻOku papau ia. ʻOku fakapapauʻi mai ʻe ha toe kikite ʻe taha ko e kakai ʻa e ʻOtuá “te nau nofo taki taha ʻi hono lolo vaine, pea ʻi hono lolo fiki; ʻo ʻikai mafakahohaʻa kinautolu ʻe ha taha.” (Maika 4:4) Ko ha tuʻunga malu fakaʻaufuli pehē ʻe fakapapauʻi ia ʻe he Puleʻanga faka-Mīsaia ʻo e ʻOtuá, ʻa ia te ne pule ki he māmaní kotoa ʻi he kahaʻu ofi maí.—Aisea 9:6, 7.
ʻE ʻikai ʻaupito ke toe ʻi ai ha veiveiua pe ʻoku malu pe ʻikai ʻa e meʻakaí. ʻI hono kehé, te tau fiefia ʻi he fepehēʻaki: “Maʻu ā hoʻo meʻatokoní.”
[Fakamatala ʻi he peesi 22]
ʻOku vavé ni ke maʻu ʻo lahi ʻe he tokotaha kotoa pē ʻi he māmaní ʻa e meʻakai fakatupu-moʻuilelei mo leleí
[Fakatātā ʻi he peesi 20]
ʻOku talaʻofa ʻe he ʻOtuá ha meʻakai ʻoku malu mo lelei maʻá e tokotaha kotoa