Ko ha Lauʻiʻakau ʻi he Matamatakupengá!
MEI HE TOKOTAHA-TOHI ʻĀ HAKE! ʻI ʻAOSITELĒLIA
ʻOKÚ KE sio ki he lauʻiʻakau mōmoa ko ena mo takai maʻú? Fakatokangaʻi ʻoku tautau ia ʻi ha kupenga-hina. ʻI he ʻuluaki sio ki aí ʻe hangē mai nai ne puhiʻi ia ʻe he havilí ki he matamatakupengá. Ka ʻoku ʻi ai ʻa e meʻa makehe fekauʻaki mo e lauʻiʻakau ko iá.
Ko e meʻa ʻokú ke sio ki aí ko e nofoʻanga makehe ia ʻo e hina fai vilo lauʻiʻakaú—ko ha meʻamoʻui fakaofo moʻoni. Ko e hina pē eni ʻe taha ʻoku ʻiloa ʻi heʻene faʻu hono nofoʻangá ʻaki hono viloʻi ha lauʻiʻakau pea kofu ʻa loto ʻaki ha silika, ʻa e nāunau tatau ʻokú ne ngāueʻaki ke faʻuʻaki hono matamatakupengá. Ka ʻoku ngāueʻaki pē nai ʻe he hiná ha lauʻiʻakau kuo puhiʻi fāinoa atu ki he matamatakupengá? ʻE hā ngali pehē nai. Ka ko hono sivisiviʻi lelei angé ʻoku hā mahino ai ʻoku kau ki ai ha foʻi fokotuʻutuʻu pau. ʻOku filifili lelei ʻe he hiná ha lauʻiʻakau, mahalo mei he ngaahi lauʻiʻakau ʻoku laku ʻi lalo he kelekelé. ʻI heʻene viloʻi pē ʻa e lauʻiʻakaú ʻo takatakaí, ʻoku maluʻi leva ia ʻe he hiná ʻaki ha ngaahi tuʻoni silika ke taʻofiʻaki haʻane homo.
Kae kehe, ko e fanga hina ko ení, ʻoku ʻikai fakangatangata pē ki he lauʻiʻakaú ʻenau ngāueʻaki ki ha nofoʻangá. ʻI he ngaahi tuʻa koló ʻoku nau faʻa ngāueʻaki ai ʻa e ngaahi kongokongaʻi nusipepá, pepa ʻoku kiʻi fefeká, pe ngaahi tikite hū liʻakí. ʻOku fakaofó, he ʻoku aʻu ʻo nau ngāueʻaki ha ngeʻesi ʻelili vao. ʻI ha tuʻunga pehē ʻe taha, naʻe liunga ono ai ʻa e mamafa ia ʻo e ngeʻesí ʻi he hina ko ia naʻá ne fusi hake ia ki he matamatakupengá ʻo ne nofo aí!
Fakaʻuta atu ʻoku tau vakaiʻi ke sio pe ʻoku ʻi loto ʻa e hiná ʻi hono nofoʻanga lauʻiʻakaú he taimí ni. ʻOku tau kiʻi tātaaʻi ʻa e lauʻiʻakaú. Ko ena! ʻOkú ke sio ki ai? ʻOku mavahe mai ha kiʻi hina lanu fakaʻofoʻofa mei he lauʻiʻakaú pea ʻokú ne ʻalu hifo ki lalo ʻi hono filo siliká ki he kelekelé. ʻOua ʻe hohaʻa! ʻOku tau malu pē. Ko e kalasi hina ia ko ení ʻoku ʻikai fakatupu maumau ia ki he tangatá, neongo ʻe kiʻi uʻu nai ho louhiʻi nimá kapau ʻe fefeka hoʻo ala ki aí.
Lolotonga ʻa e ʻahó, ʻoku faʻa fakamoleki ʻe he hina vilo lauʻiʻakaú ʻa hono taimí ʻi he mālōlō ʻi loto ʻi hono nofoʻanga lauʻiʻakaú. Ka ʻi he poʻulí, ʻi he tokolahi ange ʻa e fanga ʻinisēkite ʻoku ngahele takai holó, te ke sio ai ki ai ʻokú ne hanoku ʻi he hūʻanga ʻo hono lauʻiʻakaú. Mei he foʻi tuʻuʻanga ko iá, ʻokú ne vakaiʻi tokanga ai ʻa hono matamatakupengá ʻaki hono tuku ʻa e taha ʻo hono ngaahi vaʻé ʻi ha ‘laine mākoni’—ko ha filo silika makehe ʻoku lele mei he lauʻiʻakaú ki he konga tefito ʻo e matamatakupengá. Kapau ʻe tau ha ʻinisēkite ʻi he matamatakupengá, ʻe fakavave atu leva ʻa e hiná ki ai, ʻo ne puke ia ʻo kai.
Ko e kiʻi tufunga poto ko ení ko e taha pē ia ʻo e ngaahi meʻamoʻui fakamānako lahi ʻo e feituʻu vao ʻAositelēliá.