Ngaohi ʻo Hangē ha Kehé
“Lolotonga ʻa hoku ʻuluaki taʻu ʻi he lautohi Puleʻangá ʻi Sipeini, naʻe uiʻaki maʻu pē au ʻe he tamaiki ʻi heʻemau kalasí ʻa e ngaahi hingoa, koeʻuhí naʻá ku nounou ange ʻaupito au ʻia kinautolu. Naʻá ku foki tangi ki ʻapi ʻi he meimei ʻaho kotoa pē.”—Jennifer, ko ha ʻofefine ʻo ha ongo Filipaini naʻe hiki mai.
“ʻI he taimi naʻá ku hiki ai ki ha ʻapiako foʻou, naʻe uiʻaki au ʻe he kaungāako pālangí ha ngaahi hingoa tuku hifo. Naʻá ku ʻiloʻi naʻa nau loto ke fakaʻitaʻi au ke mau fuhu. Kae kehe, ʻi ha founga naʻá ku anga-mokomoko pē—ka ʻi loto ʻiate au naʻá ku ongoʻi mamahi mo līʻekina.”—Timothy, ko ha ʻAfilika-ʻAmelika.
“I heʻeku taʻu fitú, naʻe fepaki ai ʻa e kakai ʻĪkipo mo Hausa ʻi Naisīliá. Naʻe uesia au ʻe he tāufehiʻá, pea naʻe kamata ke u fakakataʻaki ha tamasiʻi ʻi heʻeku kalasí ʻa ia ko e Hausa, neongo naʻá ma kaumeʻa.”—John, ko ha mēmipa ʻo e matakali ʻĪkipó.
“Ko au mo hoku hoa misinalé naʻá ma vahevahe atu ʻa e pōpoaki Fakatohitapú ki homa kaungāʻapí ʻi he taimi naʻe kamata ai ʻa e tamaikí ke muimui mai ʻo tolomakaʻi kimaua, ʻi hono fakaʻaiʻai ʻe he faifekau ʻi he feituʻú. Naʻe fiemaʻu ʻe he faifekaú ke ma mavahe mei he koló.”—Olga.
KUÓ KE hokosia ʻa e tuʻunga ʻikai fakangeingeiaʻi ʻo e filifilimānako taʻetotonu ʻa ia ʻoku hehema ke hoko makatuʻunga ʻi he tomuʻa fehiʻá? Mahalo pē koeʻuhi ko e lanu ʻo ho kilí, ko hoʻo lotú, ko ho tuʻunga fakaʻekonōmiká, ko e tangata pe fefine, pe naʻa mo ho taʻumotuʻá. Ko e faʻahinga ʻoku faʻa fai ki ai ʻa e tomuʻa fehiʻá ʻoku nau faʻa nofo ʻo manavahē ki ha ngaohikovia lahi ange. ʻI heʻenau lue ofi ki ha pupunga kakai, ʻalu ki ha falekoloa, hiki ki ha ʻapiako foʻou, pe kau ki ha fakatahataha fakasōsiale, ʻoku lōmekina nai ai kinautolu ʻe he tailiilí.
Tānaki atu ki ai, ko e faʻahinga ʻoku maʻukovia ʻi he tomuʻa fehiʻá mo e filifilimānakó te nau faingataʻaʻia nai ʻi hono maʻu ʻo ha ngāué, pe ko e tokangaʻi fakafaitoʻo nai ʻoku nau maʻú ʻoku ʻi ha tuʻunga ʻikai lelei, ko ha tuʻunga fakaako māʻulalo, pea siʻi ange ʻa e ngaahi monū fakasōsialé mo e ngaahi totonu fakalaó. ʻI hono fakaʻaiʻai ʻe he kau maʻu mafaí, ʻe lava ke iku ʻa e filifilimānakó ki he ngaahi kovi hangē ko e fakamaʻa fakamatakalí mo e fakaʻauha fakafaʻahingá. Ko ha fakatātā motuʻa ʻo ha tomuʻa fehiʻa naʻe fakahoko ʻoku maʻu ia ʻi he tohi Tohi Tapu ʻa Esetá. Sio ai ki he tafaʻaki ʻo e tāufehiʻá mo e tomuʻa fehiʻá.—Eseta 3:5, 6.
Ko e fusifusilotó mo e fetāufehiʻaʻakí ʻe hokohoko atu nai ia neongo e ʻi ai ʻa e ngaahi lao ki he filifilimānakó. ʻOku pehē ʻe ha Komisiona Māʻolunga ki muʻa ʻo e Puleʻanga Fakatahatahá ki he Totonu ʻa e Tangatá: “ʻI he hongofuluʻi taʻu ʻe ono hili hono ngāueʻaki ʻa e Talaki Fakaeʻuniveesi ʻo e Totonu ʻa e Tangatá . . . , ko e ngaahi tefitoʻi moʻoni ʻo e tuʻunga tataú mo e ʻikai filifilimānakó ʻoku ʻikai ʻaupito kei hoko moʻoni ia ʻi he feituʻu kotoa pē.” ʻOku fakatupu hohaʻa ia, koeʻuhi ko e hiki ki ha fonua mo e lahi ʻo e kau kumi hūfangá kuó ne mātuʻaki liliu ʻa e tokolahi ʻo e kakaí ʻi he ngaahi fonua lahi.
Ko ia ai, ko ha misi pē ʻa e ʻi ai ha sōsaieti tuʻunga tataú? Pe ʻe lava ke ikuʻi ʻa e tomuʻa fehiʻá mo e filifilimānakó? Ko e ngaahi kupu hoko maí ʻoku lāulea ai ki he ongo fehuʻi ko ení.