Poto ki he Lotó mo e Moʻui Leleí
“Ko e loto ʻoku toka ko e moʻuiʻanga ʻo e sino kotoa.”—PALŌVEEPI 14:30.
“Ko e loto fiefia ko e faitoʻo lelei.”—PALŌVEEPI 17:22.
● Ko e ngaahi lea faingofua kae loloto ko iá naʻe leaʻaki ia ʻe Tuʻi Solomone ʻo ʻIsilelí ʻi he taʻu nai ʻe tolu afe kuohilí.a Ka ʻoku moʻoni ia? Ko e hā e lau ʻa e faitoʻo ʻi onopōní?
ʻI he fekauʻaki mo e loto ʻoku toká mo ha loto ʻoku hehema ke ʻita, ʻoku fakamatala ʻi he Journal of the American College of Cardiology: “Ko e ola ʻo e ngaahi fakatotolo fakamuimuí ʻoku fakahuʻunga ai ha fekauʻaki fakatupu maumau ʻi he vahaʻa ʻo e ʻitá mo e tāufehiʻá mo e CHD [mahaki mafú].” Ko ia ai, ʻoku fakahaaʻi ʻi he Journal: “Ko e taʻotaʻofi mo e faitoʻo lavameʻa ʻo e mahaki mafú ʻe kau nai ki ai . . . ʻo ʻikai ngata pē ʻi he ngaahi faitoʻo fakaesino anga-mahení mo e faitoʻo mei he fale tala-vaí, kae toe pehē foki ki he tokangaʻi fakaʻatamai ʻo fakahangataha ki he ʻitá mo e tāufehiʻá.” Ko hono ʻai mahinó, ko ha loto ʻoku toka ʻoku fakatupulekina ai ʻa e moʻui leleí, hangē tofu pē ko e lau ʻa e Tohi Tapú.
ʻOku tupu e ngaahi ola lelei meimei tatau mei ha loto ʻoku fiefia. Naʻe fakahaaʻi ʻe Dr. Derek Cox, ko ha ʻōfisa moʻui ʻi Sikotilani, ʻi ha līpooti he Ongoongo BBC: “Kapau ʻokú ke fiefia ʻoku ngalingali ʻe siʻi ai ʻi he kahaʻú ʻa hoʻo puke fakaesinó ʻo laka ia he faʻahinga ko ia ʻoku ʻikai te nau fiefiá.” Naʻe fakahaaʻi ʻi he līpooti tatau: “Ko e kakai fiefia angé ʻoku nau toe maʻu ʻa e maluʻi lahi ange mei he ngaahi meʻa hangē ko e mahaki mafú mo e pā kālavá.”
Ko e hā ne hoko ai e poto ʻo Solomoné—taʻelau ki ai e poto ʻo e kau hiki Tohi Tapu kehé—ʻo ʻi muʻa ʻaupito ia kae ʻikai ʻilo ki ai e niʻihi kehé? ʻOku faingofua ʻa e talí. “Naʻe foaki ʻe he ʻOtua kia Solomone ʻa e poto, mo e faiva lahi ʻaupito.” (1 Tuʻi 4:29) Ko e toe meʻa ʻe taha, ko e poto ko iá ʻoku lēkooti ia ʻi he lea mahino koeʻuhi ke maʻu ʻaonga mei ai ʻa e tokotaha kotoa. Pea ʻoku haʻu taʻetotongi!
Ko e hā ʻoku ʻikai te ke ʻai ai ʻa e lau Tohi Tapu tuʻumaʻú ko ha konga ia ʻo hoʻo moʻuí? Hangē ko ia kuo ʻosi ʻiloʻi ʻe he laui miliona ʻo nau fiefia lahi aí, “he hu ʻa e poto ki ho loto, pea felatani ʻa e ʻilo mo ho laumalie. ʻE fai ho fakalekesi ʻe Fakakaukau, ʻe leʻohi koe ʻe Fakahinohino.” (Palōveepi 2:10, 11) ʻIkai ʻoku fakafiemālie ʻaupito ia?
[Fakamatala ʻi lalo]
a Ko e foʻi lea “loto” ʻi he Tohi Tapú ʻoku faʻa ʻuhinga ia ki he tokotaha kakato ʻi lotó, ʻo kau ai ʻene ngaahi ongoʻí.