Vakai Ki He Māmaní

Ko e pēseti nai ʻe 17 ʻo e fānau ako Pelēsila taʻu 10 ki he 13 ʻoku nau kau he houtamakí—ʻa ia ko e faʻahinga ʻoku maʻukovia pe ko e faʻahinga ʻoku nau fakahoko.​—O ESTADO DE SÃO PAULO, PELĒSILA.

Ko e toto māʻolungá, lahi e ngakó, makamaka he kofuuá, mo e ngaahi palopalema he ʻaté ʻoku maʻu ia he taimí ni ʻi he fānau ʻi lalo hifo he taʻu 12. Ko e hā e ngaahi tupuʻanga tefitó? Ko e founga moʻui lahilahi tangutú, fuʻu lahi e meʻakai vevé, mo e fuʻu mamafá.—ABC, SIPEINI.

Ko e fakamole hono ʻohake ha kiʻi tama ne fāʻeleʻi ʻi he 2008 ʻo aʻu ki hono taʻu 18 ʻi ha fāmili ʻoku fakaʻavalisi ʻo ʻi ha tuʻunga feʻunga ʻene paʻanga hū maí ʻi ʻAmeliká ko e $221,190 ($291,570 nai ʻi he feʻunuʻaki ki he hikihiki e totongi ʻo e koloá),” fakatatau ki hano fakafuofuaʻi fakapuleʻanga.—POTUNGĀUE NGOUE ʻA E ʻIUNAITE SETETÉ, AMELIKÁ.

Ngalo ʻa e Anga ʻo e Vaʻingá

Ko e vahe nima ʻe taha ʻo e ngaahi mātuʻa ʻi Pilitāniá ʻoku nau taukaveʻi kuo ngalo ʻa e “anga ʻo e vaʻinga mo ʻenau fānaú,” fakatatau ki ha savea ki muí ni. Ko e vahe tolu ʻe taha ʻoku nau fakahaaʻi ʻoku nau fakapipikoʻia he vaʻingá, lolotonga ia ko e niʻihi kehé ʻoku ʻikai hanau taimi pe fakakaukau ki ai. Fekauʻaki mo e ola ʻo e saveá, ʻoku pehē ʻe Palōfesa Tanya Byron, ko ha toketā ʻatamai: “ʻOku ʻi ai ʻa e tafaʻaki mahuʻinga ʻe fā ke maʻu ai ha taimi vaʻinga lavameʻa ʻi he vahaʻa ʻo e ngaahi mātuʻá mo e fānaú: ko e ako, fakaueʻiloto, feohi mo e fetuʻutaki.” Neongo ko e mātuʻa ʻe 1 ʻi he 3 naʻa nau fili ke vaʻinga he ngaahi keimi fakakomipiutá mo ʻenau fānaú, ko e fuʻu tokolahi ʻo e fānaú ʻoku nau saiʻia ange ke vaʻinga ʻi he ngaahi keimi ko ení ʻia kinautolu pē. ʻOku kau he ngaahi vaʻinga ʻoku loto ʻa e tokolahi taha ʻo e kau taʻu 5 ki he 15 ke kau fakataha ai mo ʻenau mātuʻá ʻa e ngaahi vaʻinga ʻi tuʻá mo e vaʻinga ʻi he papa vaʻingá.

Talanoa ki Muʻa ke Mohé

ʻOku tuʻuaki mai ha ngāue he ʻInitanetí ʻe tokoni ki he ngaahi tamai ʻoku nau fuʻu femoʻuekina ke lau ʻa e ngaahi talanoa ki muʻa ke mohé ki heʻenau fānaú. “ʻOku hiki ʻi he polokalama fakakomipiutá ʻa e leʻo ʻo e ngaahi tamai ʻoku nau lau ha talanoa ki muʻa ke mohé, tānaki atu ki ai ha fasi mo e ngaahi ongo pea ʻīmeili ha fasi ki he kiʻi tamá,” ko e fakamatala ia ʻa e Daily Telegraph ʻi Seneé. Kae kehe, ko e kau mataotao ʻi he vahaʻangataé ʻoku nau veiveiua. “ʻOku kau ki he lautohí hono langa hake ha vahaʻangatae,” ko e lau ia ʻa Dr. Richard Fletcher fekauʻaki mo ha polokalama fakatotolo ki he ngaahi fāmilí ʻi he ʻUnivēsiti Newcastle, ʻi ʻAositelēliá. ʻOku kau ki ai ʻa e feohi e ngaahi tamaí mo ʻenau fānaú, kuku kinautolu, pea kakata mo kinautolu. ʻOku ʻikai lava ke fetongi ʻe ha ʻīmeili ʻa e ngaahi ʻaonga ʻo e tangutu hifo ʻo lautohi ki hoʻo tamá, ko e lau ia ʻa Fletcher.