4 Fakamolemole

KO HONO ʻUHINGÁ

Ke fakamolemolé ʻoku ʻuhingá ko hoʻo tuku ange ha ʻita mo ha ongoʻi mamahi pē. Ko e fakamolemolé ʻoku ʻikai fiemaʻu ia ke ke fakasiʻia ʻa e halá pe fakangalingali naʻe ʻikai ʻaupito ke hoko ia.

TEFITOʻI MOʻONI FAKATOHITAPU: “Hokohoko atu ʻa e fekātakiʻaki mo e fefakamolemoleʻaki loto-lelei neongo ai pē ʻo kapau ʻoku ʻi ai ha taha ʻokú ne maʻu ha ʻuhinga ke lāunga ai fekauʻaki mo ha taha.”​—Kolose 3:13.

“ʻI hoʻo ʻofa ʻi ha taha, ʻokú ke sio fakalaka atu ʻi he taʻehaohaoa ʻa e tokotaha ko iá pea ʻi hono kehé sio ki he tokotaha ʻokú ne feinga ke hoko ki aí.”​—Aaron.

ʻUHINGA ʻOKU MAHUʻINGA AÍ

Kapau ʻokú ke tukulotoʻi ʻa e ʻitá, ʻe lava ke uesia fakaesino mo fakaeongo ai koe​—ʻe lava foki ke ke maumauʻi ai hoʻo nofo malí.

“ʻI he taimi ʻe taha naʻe kole fakamolemole mai hoku husepānití ki haʻane fakalotomamahiʻi lahi au. Naʻe faingataʻa ke u fakamolemoleʻi ia. Naʻe faai atu pē ʻo u fakamolemoleʻi ia, ka naʻá ku fakaʻiseʻisa ʻi he ʻikai ke u fai vave ange iá. Naʻá ku fakamafasiaʻi ai homa vahaʻangataé.”​—Julia.

MEʻA ʻE LAVA KE KE FAÍ

SIVISIVIʻI KOE

Ko e taimi hoko te ke loto-mamahi ai ʻi ha meʻa naʻe leaʻaki pe fai ʻe ho hoá, ʻeke hifo:

• ‘ʻOku ou mamahingofua?’

• ‘ʻOku fuʻu mafatukituki ʻa e fakatupu ʻitá ʻo u fiemaʻu ai ha kole fakamolemole, pe ʻe lava ke u tukunoaʻi pē ia?’

TALANOA MO HO HOÁ

• Ko e hā hono faʻa fuoloa kiate kitaua ke fefakamolemoleʻaki aí?

• Ko e hā ʻe lava ke ta fai ke vave ange ai ʻeta fefakamolemoleʻakí?

FOKOTUʻU

• ʻI he taimi ʻoku fakaʻitaʻi ai koé, ʻoua ʻe tukuakiʻi maʻu pē ho hoá.

• Feinga ke fakamolemoleʻi ʻa e ngaahi tōʻonga ʻa ho hoá, ʻo manatuʻi “ko e kotoa ʻo kitautolú ʻoku tau tūkia ʻo tā-tuʻo-lahi.”​—Sēmisi 3:2.

“ʻOku faingofua ke fefakamolemoleʻaki kapau ʻokú ma fakatou hala, ka ʻoku faingataʻa ange ʻi he taimi ʻoku fehālaaki pē ai ha toko tahá. Ko hono tali ʻa e kole fakamolemolé pea fakamolemolé ʻoku fiemaʻu ki ai ʻa e anga-fakatōkilalo moʻoni.”​—Kimberly.

TEFITOʻI MOʻONI FAKATOHITAPU: “Fakavave ke fakaleleiʻi ʻa e ngaahi meʻá.”​—Mātiu 5:25.