KO HA MĀMANI MĀVEUVEU

1 | Maluʻi Hoʻo Moʻui Leleí

ʻUHINGA ʻOKU MAHUʻINGA AÍ

Ko ha faingataʻa pe ko ha fakatamaki ʻe lava ke ne uesia ʻa e moʻui lelei ʻa e kakaí ʻi he ngaahi founga kehekehe.

Ko e ngaahi faingataʻá ʻokú ne ʻai ʻa e kakaí ke nau ongoʻi loto-mafasia, pea ko e loto-mafasia fuoloá ʻe lava ke ne ʻai ke nau tuʻu laveangofua ange ki he puké.
Ko e ngaahi fakatamakí ʻe lava ke ne ʻai ke mafasia ʻa e ngaahi feituʻu ki he tokangaʻi ʻo e moʻuí pea ʻai ke maʻungataʻa ʻa e ngaahi naunau fakafaitoʻó.
ʻOku uesia ʻe he ngaahi fakatamakí ʻa e tuʻunga fakapaʻanga ʻa e kakaí, ʻo fakafaingataʻaʻiaʻi ʻenau malava ke fakatau ʻa e ngaahi meʻa tefitó hangē ko e meʻakai fakatupu moʻui leleí mo e faitoʻó.

Meʻa ʻOku Totonu Ke Ke ʻIló

Ko e puke lahí mo e loto-mafasiá ʻe lava ke ne uesia hoʻo fakafuofua leleí, ʻa ia te ne ʻai koe ke ke fakaliʻeliʻaki ʻa e ngaahi tōʻonga fakatupu moʻui leleí. Ko hono olá, te ke hoko nai ai ʻo toe puke lahi ange.
Kapau ʻe tuku taʻefaitoʻo ho puké, ʻe lava ke toe kovi ange pea aʻu ʻo fakamanamanaʻi ai hoʻo moʻuí.
Ko hoʻo moʻui lelei angé, ko hoʻo mateuteu lelei ange ia ke fai ʻa e ngaahi fili leleí ʻi he uhouhonga ʻo e māveuveú.
Pe ko e hā pē ho tuʻunga fakaʻekonōmiká, ʻe lava ke ke fou ʻi he ngaahi sitepu ke maluʻi hoʻo moʻui leleí.

Meʻa ʻe Lava Ke Ke Fai he Taimi Ní

ʻI ha taimi pē ʻoku malava ai, ko ha tokotaha fakapotopoto ʻokú ne fakakaukau ki he ngaahi fakatuʻutāmaki ʻe ala hokó pea fai ʻa e meʻa te ne malavá ke fakaʻehiʻehi mei ai. ʻE kaunga nai eni ki he moʻui leleí. ʻOku faʻa lava ke ke fakaʻehiʻehi mei hano maʻu koe ʻe ha mahaki pe hoko ʻo puke lahi ʻaki ʻa e tōʻonga moʻui maʻa mo haisini. ʻOku sai ange ʻa e sinakí he tokí.

“ʻI hono tauhi kitautolu ke maʻa pea pehē ki hotau ʻapí, ʻoku siʻisiʻi ange ai ʻetau fakamole ke ʻaʻahi ki he toketaá mo e fakatau ʻa e ngaahi faitoʻó.”—Andreas.a

a Kuo liliu ʻa e ngaahi hingoa ʻe niʻihi ʻi he makasini ko ení.

FOUNGA KE FEKUKI AÍ—Fokotuʻu ʻAonga

Lolotonga ʻa e ngaahi taimi ʻo e māveuveú, maluʻi hoʻo moʻui leleí ʻaki ʻa e muimui ʻi he ngaahi sitepu ʻaonga ko ení

TŌʻONGA MOʻUI MAʻA MO HAISINI

Tōʻonga moʻui maʻa mo haisini

ʻOku pehē ʻe he Tohi Tapú: “Ko e tokotaha fakapotopotó ʻokú ne sio ki he fakatuʻutāmakí peá ne toi.” (Palōveepi 22:3) Feinga ke tomuʻa fakakaukau ki he ngaahi meʻa te ne ala fakamanamanaʻi hoʻo moʻui leleí pea fakaʻehiʻehi mei ai.

Fanofano maʻu pē ʻaki ʻa e koa mo e vai, tautefito ʻi he ki muʻa ke ke kaí pe ʻi he hili hoʻo ngāueʻaki ʻa e falemālōloó.
Fakamaʻa maʻu pē ho ʻapí mo olo ʻaki ha kemikale, tautefito ki he ngaahi funga meʻá mo e ngaahi meʻa ʻoku ala maʻu pē ki aí.
Fakaʻehiʻehi mei he feohi vāofi mo e kakai ʻoku nau maʻu ha mahaki pipihí ʻo ka ala lava.

TAUHI MAʻU HA FOUNGA KAI MOʻUI LELEI

Kai moʻui lelei

ʻOku pehē ʻe he Tohi Tapú: “ʻOku ʻikai ha tangata ʻe faifai ange peá ne fehiʻa ki hono sino pē ʻoʻoná, ka ʻokú ne fafanga mo tauhi ia.” (ʻEfesō 5:29) ʻOku tau fakahaaʻi ʻoku tau ʻofa ʻi hotau sinó ʻaki ʻetau tokanga ki he meʻa ʻoku tau kaí mo e meʻa ʻoku tau ʻai ki hotau sinó.

Inu ʻa e vaí ke lahi.
Kai ʻa e fuaʻiʻakau mo e vesitapolo kehekehe.
Fakasiʻisiʻi ʻa e kai ngakó, māsimá mo e suká.
ʻOua ʻe ifi tapaka pe ngāuehalaʻaki ʻa e ʻolokaholó pe ko e faitoʻo kona tapú.

“Ke fakaʻehiʻehi mei he puké, ʻoku tau feinga ke tauhi maʻu ha founga kai moʻui lelei; he ka ʻikai, te tau fakamoleki ʻetau kiʻi paʻanga hū maí ʻi he fakamole ki he faitoʻó. ʻOku lelei ange ke tau fakamoleki ia ʻi he meʻakai fakatupu moʻui leleí.”—Carlos.

FAKAMĀLOHISINO PEA MAʻU HA MĀLŌLŌ FEʻUNGA

Fakamālohisino

ʻOku pehē ʻe he Tohi Tapú: “ʻOku lelei ange ke fonu ʻa e nima ʻe taha ʻi he mālōloó ʻi he fonu ʻa e nima ʻe ua ʻi he ngāue mālohi mo tuli pē ki he matangí.” (Tangata Malanga 4:6) ʻOku fiemaʻu ke tau ʻai ke mafamafatatau ʻa e ngāué mo e mālōloó.

Ngaungaue mo longomoʻui. ʻE lava ke ke kamataʻaki ʻa e ʻalu maʻu pē ʻo luelue. Ko e ngaungaué ʻe tokoni ia ki hoʻo moʻui leleí neongo kapau ʻokú ke taʻumotuʻa, faingataʻaʻia fakaesino, pe ʻi ai hao mahaki tauhi.
Maʻu ha mālōlō

Maʻu ha mālōlō feʻunga. ʻI he lele nounoú, ko e ʻikai maʻu ha mohe feʻungá ʻe lava ke ne fakalahi ʻa e loto-mafasiá pea uesia ʻa e malava ke tokangatahá. Ka ʻi he lele lōloá, ʻe lava ke iku atu ia ki he ngaahi palopalema fakaemoʻuilelei mafatukituki.
Fokotuʻu ha taimi pau ke ke mohe ai, peá ke fai ki ai. Feinga ke mohe pea ʻā hake ʻi he taimi tatau ʻi he ʻaho kotoa.
Fakaʻehiʻehi mei he sio TV pe ngāueʻaki ʻa e ngaahi meʻa fakaʻilekitulōniká ʻi he mohengá.
Fakaʻehiʻehi mei he kai lahí, kefiní mo e ʻolokaholó ki muʻa pea mohé.

“Ko ʻeku mohé ʻoku kaunga ia ki he tafaʻaki kotoa ʻeku moʻui leleí. Kapau heʻikai ke u fiu he mohé, ʻoku ou faʻa langa ʻulu pea felāngaaki hoku sinó. Ka ʻi heʻeku maʻu ha mohe feʻungá, ʻoku ou ongoʻi ʻo hangē ka u ka hiki ha moʻungá! ʻOku ou iviiviʻia, pea ʻoku tātātaha ke u puke.”—Justin.