Ko ha Tangata Loto-Toʻa

ʻI HE kamata ke tupu ʻo tokolahi ʻa e kakai ʻi he māmaní, ko e tokolahi taha ʻo kinautolu naʻa nau faikovi ʻo hangē ko Keiní. Ka naʻe ʻi ai ʻa e tangata ʻe taha naʻe kehe ia. Ko e tangata ia ko ʻeni naʻe hingoa ko ʻĪnoke. Ko ʻĪnoké ko e tangata naʻe loto-toʻa. Ko e kakai takatakai ʻiate iá naʻa nau fai ʻa e ngaahi meʻa ʻoku kovi, ka naʻe kei tauhi pē ʻe ʻĪnoke ʻa e ʻOtuá.

ʻOkú ke ʻilo ʻa e ʻuhinga naʻe fai ai ʻe he kakai ʻo e taimi ko iá ʻa e ngaahi meʻa lahi ʻoku kovi? Fakakaukau ange, Ko hai naʻá ne ʻai ʻa ʻĀtama mo ʻIvi ke talangataʻa ki he ʻOtuá mo kai ʻa e fua ʻo e ʻakau naʻe fakahā ʻe he ʻOtuá ke ʻoua te na kai? ʻIo, ko ha ʻāngelo kovi. ʻOku ui ia ʻi he Tohitapú ko Sētane. Pea ʻokú ne feinga ke ʻai ʻa e tokotaha kotoa pē ke nau hoko ʻo kovi.

ʻI he ʻaho ʻe taha naʻe fekauʻi ʻe Sihova ko e ʻOtuá ʻa ʻĪnoke ke ne tala ki he kakaí ʻa e meʻa naʻe ʻikai te nau fie fanongo ki ai. Ko e meʻá ʻeni: ‘ʻE ʻi ai ha ʻaho ʻe fakaʻauha ʻe he ʻOtuá ʻa e kakai kovi kotoa.’ Naʻe ʻita lahi nai ʻa e kakaí ʻi heʻenau fanongo ki aí.

Naʻa nau feinga nai ke tāmateʻi ʻa ʻĪnoke. Ko ia naʻe fiemaʻu ke loto-toʻa ʻa ʻĪnoke ʻi hono tala ki he kakaí ʻa e meʻa ʻe fai ʻe he ʻOtuá.

Naʻe ʻikai ke tuku ʻe he ʻOtuá ʻa ʻĪnoke ke moʻui fuoloa ʻi he lotolotonga ʻo e kakai kovi ko iá. Naʻe moʻui ʻa ʻĪnoke ʻi he taʻu pē ʻe 365. Ko e hā ʻoku tau pehē ai ko e “taʻu pē ʻe 365”? Koeʻuhi ko e kau tangata ʻo e ngaahi ʻaho ko iá naʻa nau mālohi ange kinautolu ia ʻi he taimí ni pea naʻa nau toe moʻui fuoloa ange. Naʻe moʻui ʻa e foha ʻo ʻĪnoke, ko Metuisela, ʻi he taʻu ʻe 969!

ʻI he hili ʻa e mate ʻa ʻĪnoké, naʻe toe fakaʻau ki he kovi mo kovi ange ʻa e kakaí. ʻOku pehē ʻi he Tohitapú ko e ‘meʻa kotoa pē naʻa nau fakakaukau ki ai ne kovi maʻu pē,’ pea ‘naʻe fonu ʻa e māmaní ʻi he fakamālohi.’

ʻOkú ke ʻilo ha ʻuhinga ʻe taha naʻe lahi pehē ai ʻa e faingataʻá ʻi he māmaní he ngaahi ʻaho ko iá? Ko hono ʻuhingá he naʻe maʻu ʻe Sētane ha founga foʻou ki hono ʻai ʻa e kakaí ke fai ʻa e ngaahi meʻa ʻoku koví. Te tau hoko atu ke ako ʻo fekauʻaki mo ʻeni.