Naʻe Sio ki Mui ʻa e Uaifi ʻo Loté

NAʻE nofo ʻa Lote mo hono fāmilí fakataha mo ʻĒpalahame ʻi he fonua ko Kēnaní. ʻI he ʻaho ʻe taha naʻe pehē ai ʻe ʻĒpalahame kia Lote: ‘ʻOku ʻikai feʻunga ʻa e fonuá ni ki heʻeta fanga manú kotoa. Kātaki, ke ta mavaeua. Kapau te ke ʻalu koe ki hē pea te u ʻalu au ki hē.’

Naʻe vakai ʻa Lote ki he konga fonuá. Naʻá ne sio ki ha konga fonua ʻoku lelei ʻaupito pea ʻoku ʻi ai ha vai pea mo e ngaahi mohuku lelei ki heʻene fanga manú. Ko e Vahefonua ia ʻo Sioataní. Ko ia naʻe hiki ki ai ʻa Lote mo hono fāmilí mo ʻene fanga manú. Faifai atu pea naʻa nau nofo ʻi he kolo ko Sōtoma.

Ko e kakai ʻo Sōtomá naʻe kovi ʻaupito. Naʻe fakalotomamahi ʻeni kia Lote, koeʻuhi he ko e tangata lelei ia. Naʻe loto-mamahi foki mo e ʻOtuá. Faifai atu pē, pea naʻe fekau mai ʻe he ʻOtuá ha ongo ʻāngelo ke fakatokanga kia Lote te ne fakaʻauha ʻa Sōtoma pea mo e kolo ofi ki ai ko Komola, koeʻuhi ko e kovi ʻa e kakaí.

Naʻe pehē ʻe he ongo ʻāngeló kia Lote: ‘Vave! ʻAlu mo ho uaifí mo ho ongo ʻofefiné pea hola mei heni!’ Naʻe kiʻi fakatuotuai ʻa Lote mo hono fāmilí ke ʻalu, ko ia naʻe puke ʻe he ongo ʻāngeló honau nimá ʻo taki atu kinautolu ki tuʻa mei he koló. Pea naʻe toki pehē ʻe he ʻāngelo ʻe taha: ‘Lele ka mou moʻui! ʻOua ʻe sio ki mui. Lele ki he moʻungá, ke ʻoua te mou mate.’

Naʻe talangofua ʻa Lote mo hono ongo ʻofefiné pea naʻa nau hola mei Sōtoma. Naʻe ʻikai te nau toe tatali, pea naʻe ʻikai te nau toe sio ki mui. Ka naʻe talangataʻa ʻa e uaifi ʻo Loté. Hili pē ʻenau ʻalu mei Sōtomá, naʻá ne tuʻu ʻo sio ki mui. Pea naʻe hoko ai ʻa e uaifi ʻo Loté ko e fuʻu pou māsima. ʻOkú ke sio ki ai ʻi he fakatātaá?

ʻOku tau ako ha meʻa lelei mei heni. ʻOkú ne fakahā mai kiate kitautolu ʻoku fakahaofi ʻe he ʻOtuá ʻa kinautolu ʻoku talangofua kiate iá, ka ko kinautolu ʻoku talangataʻa kiate iá ʻe mole ʻenau moʻuí.