Ko e Faʻahinga Meʻakai Foʻou

ʻOKÚ KE ʻilo pe ko e hā ʻa e meʻa ʻoku tufi hake ʻe he kakaí mei he kelekelé? ʻOku hangē ko ha sinoú. ʻOku hinehina ia, pea manifi mo maʻamaʻa. Ka ʻoku ʻikai ko e sinou; ko e faʻahinga meʻa ia ke kai.

Naʻe meimei ko e māhina pē ia ʻe taha hili ʻa e mavahe atu ʻa e kau ʻIsilelí mei ʻIsipité. Naʻa nau ʻi he toafá. Naʻe siʻi ʻa e meʻakai ʻoku tupu ʻi aí, pea ko ia naʻe lāunga ai ʻa e kakaí, ʻo pehē: ‘ʻOku mau fakaʻamu naʻe tāmateʻi pē kimautolu ʻe Sihova ʻi ʻIsipite. He naʻe kei maʻu pē ai ʻa e meʻakai kotoa naʻa mau fiemaʻú.’

Ko ia, naʻe pehē ʻe Sihova: ‘Te u ʻai ha meʻakai ke ngangana hifo mei he langí.’ Pea ko e meʻa ia naʻe fai ʻe Sihová. ʻI he pongipongi hono hokó ʻi he sio ʻa e kau ʻIsilelí ki he meʻa hinehina naʻe ngangana hifó, naʻa nau feʻekeaki ʻiate kinautolu: ‘Ko e hā ʻeni?’

Naʻe pehē ʻe Mōsese: ‘Ko e meʻakai kuo ʻomai ʻe Sihova maʻamoutolu ke mou kai.’ Naʻe ui ia ʻe he kakaí ko e MANA. Naʻe ifo ʻo hangē ha keke manifi naʻe ngaohiʻaki ʻa e honé.

Naʻe tala ʻe Mōsese ki he kakaí: ‘Te mou tufi ʻo fakatatau pē ki he lahi ʻe malava ke kai ʻe ha taha.’ Ko ia ko e meʻa ia naʻa nau fai ʻi he pongipongi kotoa pē. Pea ʻi he vela ange pē ʻa e laʻaá, naʻe vaia ʻa e mana naʻe toe ʻi he kelekelé.

Naʻe toe pehē ʻe Mōsese: ‘Heʻikai ke toe tauhi ʻe ha taha ʻa e maná ki he ʻaho hono hokó.’ Ka naʻe ʻi ai ʻa e kakai ʻe niʻihi naʻe ʻikai te nau fai ki ai. ʻOkú ke ʻilo ʻa e meʻa naʻe hokó? ʻI he pongipongi hono hokó ko e mana ko ia naʻa nau tauhí naʻe fonu ia ʻi he ʻuanga, pea naʻe kamata ke namu haʻahaʻa!

Kaekehe, naʻe ʻi ai ʻa e ʻaho ʻe taha ʻi he uiké, naʻe pehē ʻe Sihova ki he kakaí ke nau tānaki ke liunga ua ʻa e lahi ʻo e maná. Ko e ʻaho hono onó ia. Pea naʻe pehē ʻe Sihova ke tuku ha konga ki he ʻaho hono hokó, koeʻuhi heʻikai te ne ʻomai ha mana he ʻaho hono fitú. ʻI heʻenau tauhi ʻa e maná ʻo aʻu ki he ʻaho hono fitú, naʻe ʻikai ke ʻuanga pea naʻe ʻikai ke namu haʻahaʻa ia! Ko e meʻa fakaemana foki mo ʻeni ʻe taha naʻe fai ʻe Sihova!

Ko e ngaahi taʻu kotoa naʻe ʻi he toafá ai ʻa e kau ʻIsilelí naʻe fafanga kinautolu ʻe Sihova ʻaki ʻa e meʻakai ko e mana.