Naʻe Tupu ha Ngaahi Matalaʻiʻakau he Tokotoko ʻo ʻĒloné

SIO ki he ngaahi matalaʻiʻakau pea mo e ngaahi foʻi ʻalimoni momoho ʻoku tupu mei he tokotoko pe vaʻakau ko ʻení. Ko e tokotoko ia ʻo ʻĒloné. Naʻe tupu ʻa e ngaahi matalaʻiʻakau mo e fuaʻiʻakau momoho ko ení ʻi he tokotoko ʻo ʻĒloné ʻi ha pō pē ʻe taha! Tau vakai ki hono ʻuhingá.

Naʻe kiʻi fuoloa ʻa e fononga holo ʻa e kau ʻIsilelí ʻi he toafá. Naʻe fakakaukau ʻa e niʻihi ʻo e kakaí ʻoku ʻikai totonu ke hoko ʻa Mōsese ko honau taki, pe ke hoko ʻa ʻĒlone ko e taulaʻeiki lahi. Ko Kola ko e taha ia naʻe kau ʻi he fakakaukau pehē, pea pehē mo Tētani, ʻApilami, mo e kau taki ʻe toko 250 ʻo e kakaí. Naʻa nau haʻu kotoa ʻo pehē kia Mōsese: ‘Ko e hā hono ʻuhinga kuó ke ʻai ai koe ke māʻolunga ʻiate kimautolú?’

Naʻe tala ange ʻe Mōsese kia Kola mo hono kau muimuí: ‘ʻI he pongipongi ʻapongipongí toʻo ʻa e ngaahi ʻaiʻanga afí pea ʻai ki ai ha ʻinisēnisi. Pea mou haʻu ki he tāpanekale ʻo Sihová. Te tau toki vakai ai pe ko hai ʻe fili ʻe Sihová.’

ʻI he ʻaho pē hono hokó naʻe haʻu ʻa Kola mo hono kau muimui ʻe toko 250 ki he tāpanekalé. Naʻe toe haʻu foki mo e tokolahi kehe ke poupou ki he kau tangatá ni. Naʻe ʻita lahi ʻa Sihova. Naʻe pehē ʻe Mōsese: ‘ʻAlu mamaʻo mei he ngaahi tēniti ʻo e kau tangata kovi ko ʻení. ʻOua naʻa ala ki ha meʻa ʻoku ʻanautolu.’ Naʻe fanongo ʻa e kakaí, pea nau ʻalu mamaʻo mei he ngaahi tēniti ʻo Kola, Tētani pea mo ʻApilamí.

Pea naʻe toki pehē leva ʻe Mōsese: ‘ʻI he meʻá ni te mou ʻilo ai pe ko hai kuo fili ʻe Sihová. ʻE mavaeua ʻa e kelekelé, pea te ne folo ʻa e kau tangata kovi ko ʻení.’

ʻI he hili pē ʻa e lea ʻa Mōsesé, naʻe mavaeua ʻa e kelekelé. Naʻe ʻalu hifo ai ki lalo ʻa e tēniti ʻo Kolá mo ʻene ngaahi meʻa kotoa pea mo Tētani mo ʻApilami pea mo kinautolu ʻi aí, pea naʻe toe mapuni ʻa e kelekelé. ʻI he fanongo ʻa e kakaí ki he kaila ʻa kinautolu kuo nau tō ki he loto kelekelé, naʻa nau kaila: ‘‘Lele! Naʻa folo mo kitautolu foki ʻe he kelekelé!’

Naʻe kei nofo ofi pē ki he tāpanekalé ʻa Kola mo hono kau muimui ʻe toko 250. Ko ia naʻe ʻomi ʻe Sihova ha afi, pea naʻe tutu kotoa ai ʻa kinautolu. Pea naʻe toki tala leva ʻe Sihova ki he foha ʻo ʻĒlone ko ʻEliesa ke toʻo ʻa e ngaahi ʻaiʻanga afi ʻa e kau tangata maté pea ʻai ʻaki ia ha ʻufiʻufi manifi ki he ʻōlitá. Naʻe hoko ʻa e ʻufiʻufi ko ʻeni ʻi he ʻōlitá ko ha fakatokanga ki he kau ʻIsilelí ʻoku totonu ke ʻoua ʻe hoko ha taha ko ha taulaʻeiki kia Sihova tukukehe pē ʻa ʻĒlone pea mo hono ngaahi fohá.

Ka naʻe fiemaʻu ʻe Sihova ke ʻai ke mahino ʻaupito ko ʻĒlone mo hono ngaahi foha kuó ne fili ko e kau taulaʻeikí. Ko ia naʻá ne pehē kia Mōsese: ‘Ke ʻomi ʻe he taki ʻo e matakali taki taha ʻo ʻIsileli hono tokotoko. Ke ʻomi ʻe ʻĒlone hono tokotokó maʻá e matakali ʻo Līvaí. Pea tuku ʻa e ngaahi tokotoko ko ʻení ʻi muʻa ʻi he puha ʻo e fuakavá ʻi he tāpanekalé. Pea ko e tokotoko ʻo e tangata kuó u fili ko e taulaʻeikí ʻe tupu mei ai ha ngaahi matalaʻiʻakau.’

ʻI he taimi naʻe vakai ai ki ai ʻa Mōsese ʻi he pongipongi hono hokó, tā ko e tokotoko ʻo ʻĒloné naʻe tupu ai ʻa e ngaahi matalaʻiʻakau mo e ngaahi foʻi ʻalimoni momoho! Ko ia ʻoku mahino kiate koe he taimí ni ʻa e ʻuhinga naʻe ʻai ai ʻe Sihova ʻa e tokotoko ʻo ʻĒloné ke tupu ai ha ngaahi matalaʻiʻakaú?