Ko Sisipeli—Ko ha Kuini Kovi ʻAupito

ʻI HE hili ʻa e mate ʻa Tuʻi Selopoamé, naʻe kovi ʻa e ngaahi tuʻi kotoa naʻe pule ʻi he puleʻanga matakali ʻe 10 ʻo ʻIsileli ʻi he tokelaú. Ko Tuʻi ʻĒhapi ko e tuʻi kovi taha ia ʻiate kinautolu. ʻOkú ke ʻilo hono ʻuhingá? Ko e ʻuhinga lahi ʻe taha ko hono uaifí, ko e Kuini kovi ʻaupito ko Sisipeli.

Naʻe ʻikai ko ha fefine ʻIsileli ʻa Sisipeli. Ko e ʻofefine ia ʻo e tuʻi ʻo Saitoni. Naʻe lotu ia ki he ʻotua loi ko Pēali, pea naʻá ne ʻai ʻa ʻĒhapi mo e kau ʻIsileli tokolahi ke nau lotu foki kia Pēali. Naʻe fehiʻa ʻa Sisipeli kia Sihova pea naʻá ne tāmateʻi ʻa e tokolahi ʻo ʻene kau palōfitá. Naʻe pau ke toi ʻa e niʻihi kehé ʻi ha ngaahi ʻana ke ʻoua naʻa tāmateʻi kinautolu. Kapau naʻe fiemaʻu ʻe Sisipeli ha meʻa, naʻe aʻu ʻo ne tāmateʻi ha taha kae maʻu ia.

ʻI ha ʻaho ʻe taha naʻe mātuʻaki loto-mamahi ai ʻa Tuʻi ʻĒhapi. Ko ia naʻe ʻeke kiate ia ʻe Sisipeli: ‘Ko e hā ʻokú ke loto-mamahi ai ʻi he ʻaho ní?’

Naʻe tali ʻe ʻĒhapi: ‘Koeʻuhi ko e meʻa naʻe lea mai ai ʻa Nēpote. Naʻá ku fie fakatau ʻene ngoue vainé. Ka naʻá ne tala mai heʻikai lava ke u fakatau ia.’

Naʻe pehē ʻe Sisipeli: ‘ʻOua te ke tokanga ki ai. Te u maʻu ia maʻau.’

Ko ia naʻe fai ʻe Sisipeli ha ngaahi tohi ki ha kau tangata ʻiloa ʻi he kolo ko ia naʻe nofo ai ʻa e tangata ko ʻeni ko Nēpoté. Naʻá ne tala kiate kinautolu: ‘ʻAi ha kau tangata kovi ke nau pehē kuo lauʻikoviʻi ʻe Nēpote ʻa e ʻOtuá mo e tuʻí. Pea toki ʻave ʻa Nēpote ki he tuʻa koló ʻo tolomakaʻi ke mate.’

ʻI he ʻilo pē ʻe Sisipeli kuo mate ʻa Nēpoté, naʻá ne pehē kia ʻĒhapi: ‘ʻAlu ʻo maʻu ʻene ngoue vainé.’ ʻIkai ʻokú ke loto-tatau naʻe totonu ke tautea ʻa Sisipeli ki hono fai ha meʻa fakalilifu pehē?

Ko ia, naʻe fekau ai ʻe Sihova ha tangata ko Sehu ke ne tautea ia. ʻI he fanongo pē ʻa Sisipeli kuo haʻu ʻa Sehú, naʻá ne valivali hono matá mo feingaʻi ia ke hā fakaʻofoʻofa. Ka ʻi he haʻu ʻa Sehu ʻo ne sio kia Sisipeli ʻi he matapā sioʻatá, naʻá ne ui ki he kau tangata ʻi he pālasí: ‘Lī hifo ia!’ Naʻe talangofua ki ai ʻa e kau tangatá, ʻo hangē ko ia ʻokú ke sio ki ai ʻi he fakatātaá. Naʻa nau lī hifo ia, ʻo ne mate ai. Ko e ngataʻanga ia ʻo e Kuini kovi ʻaupito ko Sisipelí.