Naʻe ʻIkai te Nau Punou

ʻOKÚ KE manatuʻi ʻa e kau tangata talavou ko ʻeni ʻe toko tolú? ʻIo, ko e ngaahi kaungāmeʻa kinautolu ʻo Tāniela ʻa ia naʻa nau fakafisi ke kai ʻa e meʻa naʻe ʻikai ke lelei kiate kinautolu. Naʻe ui kinautolu ʻe he kau Pāpiloné ko Setaleki, Mēsake mo ʻApitenikō. Ka ke vakai atu kiate kinautolu heni. Ko e hā ʻoku ʻikai te nau punou ai ki he fuʻu ʻīmisí ʻo hangē ko e tokotaha kotoa pē? Tau vakai ange.

ʻOkú ke manatuʻi ʻa e ngaahi lao ʻa ia naʻe hiki tonu pē ʻe Sihova naʻe ui ko e Fekau ʻe Hongofulú? Ko e ʻuluaki ʻo kinautolu ko e: ‘Kuo pau ke ʻoua naʻa mou lotu ki ha toe ʻotua kehe ka ko au pē.’ Naʻe talangofua ki he lao ko ʻení ʻa e kau tangata talavou ko ʻení, neongo ʻoku ʻikai ko ha meʻa faingofua ia ke fai.

Naʻe fekau ʻe Nepukanesa, ko e tuʻi ia ʻo Pāpiloné, ʻa e kakai mahuʻinga tokolahi ke nau fakaʻapaʻapa ki he ʻīmisi ko eni kuó ne fokotuʻú. Naʻe toki ʻosi ʻene pehē ki he kakai kotoa pē: ‘ʻI hoʻomou fanongo ki he leʻo ʻo e ngaahi talupité, ko e ngaahi haʻapé mo e ngaahi meʻalea kehekehé, te mou punou ʻo lotu ki he ʻīmisi koula ko ʻení. Ka ʻi ai ha taha ʻe ʻikai te ne punou mo lotu ʻe lī ia ki ha fōnise afi vela ʻi he taimi pē ko iá.’

ʻI hono ʻilo ʻe Nepukanesa naʻe ʻikai ke punou ʻa Setaleki, Mēsake mo ʻApitenikoó, naʻá ne fuʻu ʻita lahi ʻaupito. Naʻá ne fekau ke ʻomai kinautolu kiate ia. Naʻá ne toe ʻoange ha faingamālie kiate kinautolu ke nau punou. Ka naʻe falala ʻa e kau tangata talavoú ni ia kia Sihova. Pea nau tala kia Nepukanesa: ‘ʻOku malava ʻe he ʻOtua ʻoku mau tauhi ki aí ke ne fakahaofi kimautolu. Ka ʻo kapau ʻe ʻikai te ne fakahaofi kimautolu, heʻikai pē te mau punou ki hoʻo ʻīmisi koulá.’

Naʻe toe lahi ange ʻa e ʻita ʻa Nepukanesá ʻi heʻene fanongo ki he meʻá ni. Naʻe ofi pē ai ha fōnise peá ne fekau: ‘Tafu ke vela ʻa e fōnisé ke liunga fitu ʻene velá ʻi haʻane vela ki muʻa atu!’ Peá ne ʻomai ʻa e kau tangata mālohi taha ʻi heʻene kau taú ke nau haʻi ʻa Setaleki, Mēsake mo ʻApitenikō pea lī kinautolu ki he fōnisé. Naʻe fuʻu vela fau ʻa e fōnisé pea naʻe mate ʻa e kau tangata mālohí ʻi he ulo mai ʻa e afí. Kae fēfē ʻa e kau tangata talavou ʻe toko tolu naʻa nau lī ki lotó?

Naʻe sio atu ʻa e tuʻí ki he loto fōnisé, pea naʻá ne fuʻu ilifia ʻaupito. Naʻá ne ʻeke: ‘ʻIkai naʻa tau haʻi ha kau tangata ʻe toko tolu ʻo lī kinautolu ki he fōnise afi velá?’

Naʻe tali ʻe heʻene kau sevānití: ‘ʻIo, ko e meʻa ia naʻa tau faí.’

Pea naʻe pehē ʻe he tuʻí: ‘Ka ʻoku ou sio ki he kau tangata ʻe toko fā ʻoku nau ʻaʻeva ʻi he loto afí. ʻOku ʻikai ke haʻi kinautolu, pea ʻoku ʻikai ke uesia kinautolu ʻe he afí. Pea ko hono toko faá ʻoku hangē ha ʻotua.’ Naʻe ʻunuʻunu atu ʻa e tuʻí ʻo ofi ange ki he matapā ʻo e fōnisé ʻo ne kalanga: ‘ʻE Setaleki! Mēsake! mo ʻApitenikō! Mou hū ki tuʻa, ko kimoutolú ko e kau sevāniti ʻa e ʻOtua Fungani Māʻolungá!’

ʻI heʻenau hū mai ki tuʻá, naʻe lava ke sio ʻa e tokotaha kotoa pē naʻe ʻikai ke hoko ha meʻa kiate kinautolu. Ko ia, naʻe pehē ʻe he tuʻí: ‘Ke fakamālōʻia ʻa e ʻOtua ʻo Setaleki, Mēsake mo ʻApitenikō! Kuó ne fekau mai ʻene ʻāngelo ʻo fakahaofi kinautolu koeʻuhi ko e ʻikai te nau punou mo lotu ki ha ʻotua pē ka ko honautolú pē.’

ʻIkai nai ko ha faʻifaʻitakiʻanga lelei ʻeni ʻo e angatonu kia Sihová ke tau muimui ai?