ʻI ha Loki ʻi ʻOlunga

KO E pō Tuʻapulelulu eni, ko e ʻaho ʻe ua ki mui mai. Naʻe haʻu ai ʻa Sīsū mo ʻene kau ʻapositolo ʻe toko 12 ki he fuʻu loki ko ʻeni ʻi ʻolunga ke kai ai ʻa e Lakaatú. Ko e tangata ʻokú ke sio ʻoku ʻalu atú ko Siutasi ʻIsikaliote ia. Ko ʻene ʻalu ke fakahā ki he kau taulaʻeikí ʻa e founga te nau maʻu ai ʻa Sīsuú.

ʻI he ʻaho pē ki muʻa aí, naʻe ʻalu ʻa Siutasi kiate kinautolu peá ne ʻeke: ‘Ko e hā te mou ʻomai maʻaku ʻo kapau te u tokoni atu ke mou puke ʻa Sīsū?’ Naʻa nau pehē: ‘Ko e foʻi paʻanga siliva ʻe tolungofulu.’ Ko ia ko e ʻalu ʻeni ʻa Siutasi ke feʻiloaki mo e kau tangata ko iá koeʻuhi ke ne taki kinautolu kia Sīsū. ʻIkai ko ha meʻa fakalilifu ia?

Naʻe ʻosi ʻa e kai ʻo e Lakaatú ia. Ka naʻe kamata leva ʻe Sīsū ha kai makehe ʻe taha. Naʻá ne ʻoatu ki heʻene kau ʻapositoló ha foʻi mā mo ne pehē: ‘Kai ʻeni, koeʻuhi he ʻoku ʻuhinga eni ki hoku sinó ʻa ia ʻe foaki koeʻuhi ko kimoutolu.’ Hili iá naʻá ne ʻoatu ha ipu uaine kiate kinautolu mo ne pehē: ‘ʻInu ʻeni, koeʻuhi he ʻoku ʻuhinga eni ki hoku totó, ʻa ia ʻe lilingi koeʻuhi ko kimoutolu.’ ʻOku ui ʻeni ʻe he Tohitapú ko e ‘houa kai efiafi ʻa e ʻEiki,’ pe ko e ‘ʻohomohe ʻa e ʻEiki.’

Naʻe kai ʻe he kau ʻIsilelí ʻa e Lakaatú ke fakamanatu kiate kinautolu ʻa e ‘laka atu’ ʻa e ʻāngelo ʻa e ʻOtuá ʻi honau ngaahi fale ʻi ʻIsipité, ka ne tāmateʻi ʻa e ʻuluaki fānau ʻi he ngaahi fale ʻo e kau ʻIsipité. Ka naʻe fiemaʻu ʻe Sīsū ia hono kau muimuí ke nau manatu kiate ia, pea mo e anga ʻo ʻene foaki ʻene moʻuí maʻanautolú. Pea ko e ʻuhinga ia naʻá ne tala ai kiate kinautolu ke nau kātoangaʻi ʻa e kai makehe ko ʻení ʻi he taʻu taki taha.

ʻI he ʻosi ʻa e kai ʻo e Houa Kai Efiafi ʻa e ʻEikí, naʻe tala ange ʻe Sīsū ki heʻene kau ʻapositoló ke nau loto-toʻa mo mālohi ʻi he tui. ʻI he fakaʻosí naʻa nau hiva ki he ʻOtuá pea nau ʻalu. Kuo poʻuli eni, ʻo ʻosi atu nai ʻa e vaeuapō. Tau sio ange pe naʻa nau ʻalu ki fē.