Ko e Ngata ʻa e Kovi Hono Kotoa Pē

KO E HĀ ʻokú ke sio ki ai ʻi hení? ʻIo, ko ha kau tau ʻi he fanga hoosi tea. Ka ke fakatokangaʻi ʻa e feituʻu ʻoku nau haʻu mei aí. Ko e fanga hoosí ʻoku nau talua hifo mei hēvani ʻi he ngaahi ʻao! Ko e moʻoni ʻoku ʻi ai ha fanga hoosi ʻi hēvani?

ʻIkai, ʻoku ʻikai ko ha fanga hoosi moʻoni ʻeni ia. ʻOku tau ʻilo ʻení koeʻuhi he ʻoku ʻikai lava ʻa e fanga hoosí ʻo lele ʻi he ngaahi ʻaó, ʻikai ko ia? Ka ʻoku lave ʻa e Tohitapú ki he fanga hoosi ʻi hēvani. ʻOkú ke ʻilo pe ko e hā ʻoku lave ai ki aí?

Koeʻuhi ʻi he taimi ʻe taha naʻe ngāuelahiʻaki ʻa e fanga hoosí ki he fai ʻo e ngaahi taú. Ko ia ʻoku lave ʻa e Tohitapú ki he kau heka hoosi ʻoku ʻalu hifo mei hēvani ke fakahā ʻoku ʻi ai ʻa e tau ʻa e ʻOtuá ʻe fai mo e kakai ʻo e māmaní. ʻOkú ke ʻilo ʻa e hingoa ʻo e feituʻu ʻo e tau ko ʻení? Ko ʻĀmaketone. Ko e tau ko ia ke fakaʻauha ʻa e kovi hono kotoa pē ʻi he māmaní.

Ko Sīsū ʻa e Tokotaha te ne taki ʻa e tau ko ʻeni ʻi ʻĀmaketoné. Manatuʻi, ko Sīsū ʻa e tokotaha naʻe fili ʻe Sihova ke tuʻi ʻi Heʻene founga-pulé. Ko e ʻuhinga ia ʻoku ʻai ai ʻe Sīsū ʻa e kalauni ʻo ha tuʻí. Pea ko e heletaá ʻokú ne fakahā te ne tāmateʻi ʻa e ngaahi fili kotoa pē ʻo e ʻOtuá. ʻOku totonu ke tau ofo ʻi hano fakaʻauha ʻe he ʻOtuá ʻa e kakai kovi kotoa pē?

Toe sio ange ki he Talanoa 10. Ko e hā ʻokú ke sio ʻi aí? ʻIo, ko e fuʻu Lōmaki naʻá ne fakaʻauha ʻa e kakai koví. Ko hai naʻá ne ʻomai ʻa e Lōmakí? Ko Sihova ko e ʻOtuá. Sio ange ki he Talanoa 15. Ko e hā ʻa e meʻa naʻe hoko aí? Naʻe fakaʻauha ʻa Sōtoma mo Komola ʻaki ʻa e afi naʻe ʻomai ʻe Sihova.

Huke ki he Talanoa 33. Sio ki he meʻa naʻe hoko ki he fanga hoosi mo e ngaahi saliote tau ʻa e kau ʻIsipité. Ko hai naʻá ne ʻai ʻa e vaí ke ne haveʻi kinautolú? Ko Sihova. Naʻá ne fai ia ke maluʻi ʻene kakaí. Sio ki he Talanoa 76. Te ke sio ai naʻa mo e kakai ʻa Sihová, ʻa e kau ʻIsilelí, naʻá ne tuku ke fakaʻauha kinautolu koeʻuhi ko ʻenau fai koví.

Ko ia ai, ʻoku totonu ke ʻoua te tau ofo ʻi hano ʻomai ʻe Sihova ʻa ʻene kau tau fakahēvaní ke fakangata ʻa e kovi kotoa pē ʻi he māmaní. Ka ke fakakaukau ange pe ki he meʻa ʻe hokó! Hukeʻi mai ʻa e peesí ke tau sio angé.