Faʻu ʻa e Ngaahi Tohi Faka-Tohitapú ke Fakahikihikiʻi ʻa e ʻOtuá
ʻOku ʻiloa ʻa e Kau Fakamoʻoni ʻa Sihová ʻi heʻenau malangaʻi ʻa e Puleʻanga ʻo e ʻOtuá ʻaki ha ngaahi nāunau kuo pulusi. Talu mei he 1920 mo e ngāueʻaki ʻe he Watch Tower Society ha kau ngāue pole ko e Kau Fakamoʻoni pē ke faʻu ha ngaahi makasini mo ha ʻū tohi ke tufaki atu. Naʻe fai ʻeni ke fakapapauʻi ʻe kei hokohoko atu hono faʻu ʻo e ʻū tohí ʻi ha tuʻunga fakamole maʻamaʻa taha ʻe malavá.
Lolotonga nai ʻa e taʻu ʻe 60, kuo fakalaka mo toe lahi ange ʻa hono faʻu ʻe he Sōsaietí ʻa e ʻū tohi faka-Tohitapú, ʻuluakí ʻi Brooklyn pea toki hoko ai ʻa e ngaahi fonua kehé. Kuo fai ʻa e ngāué ni kotoa ʻi he toutou tupulaki ʻa e tokolahi ʻo e kau ngāue polé.
ʻI he konga ki mui ʻo e 1970 tupú naʻe fetongi ai ʻa e ngaahi founga motuʻa ʻo hono fokotuʻutuʻu mo pulusi ʻa e ngaahi tohí ʻaki ʻa e fokotuʻutuʻu fakakomipiuta, faʻutaipe ʻaki ʻa e faitā (phototypesetting) mo e founga paaki taʻefakahangatonu (offset printing). Ko e palopalema leva ʻo e nāunau paaki naʻe malava ke fakatau maí, naʻe fakangatangata ʻa e ngaahi lea naʻe lava ʻo ngāue ki aí. Kaekehe, kuo ʻosi faʻu ʻe he Sōsaietí ha ʻū tohi ʻi he ngaahi lea ʻe 160 nai, pea naʻe ʻi ai mo e fiemaʻu ke toe lahi ange.
Ko ia, naʻe kole ki ha kau ngāue pole ke nau faʻu ha founga faʻutaipe ʻaki ʻa e faitā fakaʻelekitolōniká ki ha ngaahi lea lahi. Naʻe fakafiemālie ʻa e olá. Naʻe lavaʻi ʻa e ngaahi palopalema fakatekinikalé ni, pea kuo faʻu ha founga fakahū-fakamatala (text entry), fokotuʻu fakamatala mo e tā (composition), mo e faʻutaipe ʻaki ʻa e faitā (phototypesetting), ʻoku ui ko e MEPS. ʻOku lava ke ngāueʻaki ʻa e foungá ni ki he ngaahi lea ʻe 200. ʻE lava pē ke toe tānaki atu ki ai ha ngaahi lea lahi ange.
He ʻahó ni ko e MEPS, ʻa ia naʻe faʻu ʻe he Kau Fakamoʻoni ʻa Sihová, ʻoku ngāueʻaki ia ʻi he fonua lahi ange he 70, pea ʻoku lahi mo e ngaahi fonua te nau kau ki ai. Kuo akoʻi ʻa e kau ngāue pole mei he ngaahi fonuá ni ke nau ngāueʻaki mo tauhi ʻa e nāunaú ni. ʻOku faʻu ʻe he Sōsaietí ha ngaahi makasini ʻo lahi hake ʻi he lea ʻe 100 ʻi he ngaahi fonua ʻe 50, pea ko e fonua ʻe 8 ai ʻoku nau paaki ʻa e ʻū tohi pea mo e Tohitapu.
Ke fai ʻa e ngāué ni ʻoku fiemaʻu ha kau ngāue—kau hiki tohi, kau liliu lea, kau pulufu-tohi, kau paaki, kau fakatakafi tohi, pea mo e kau ngāue fakaheka tohi. Ko e niʻihi ʻoku nau fai ʻa e ngaahi fetuʻutaki faitohi mo e ngaahi fakatahaʻangá. Ko e niʻihi ʻoku nau tō ngoue kai, teuteu ha meʻatokoni, fakamaʻa ʻapi, fō, mo e ngaahi meʻa pehē. Ko e ngāué ni kotoa ʻoku fai ia ʻe he kau ngāue pole ʻi he ngaahi fonua kehekehe. ʻI he māmaní kotoa lolotonga ʻa e 1988, naʻe ngāue ʻa e kau ngāue pole toko lahi hake he 9,000 ʻi he ngaahi ʻōfisi, ngaahi fale paaki, ngaahi ʻapi mo e ngaahi faama kehekehe.
Ko hai ʻa e fuʻu kakaí ni? Ko e kau tangata mo e kau fafine, teʻeki mali mo e ʻosi mali, talavou mo e motuʻa, ko e Kau Fakamoʻoni fakatapui kotoa ʻa Sihova. Kuo ʻi he ngāué ni ʻa e niʻihi ʻi he taʻu ʻe 40, 50, ʻo aʻu ki he 60. ʻOku fakaʻavalisi ʻenau ngāué ʻoku ʻikai toe siʻi hifo he houa ʻe 44 he uike ʻi heʻenau ngāue kuo vaheʻí, mo ha toe taimi kehe ʻo ka fiemaʻu. ʻOku nau ngāueʻaki ʻa e efiafí mo e fakaʻosinga ʻo e uiké ke malangaʻi ʻa e ongoongo leleí mei he fale ki he fale, pea mo e ngaahi ngāue kehe ʻa e fakatahaʻangá.
ʻI he māmaní kotoa ʻoku tokonaki ki he kau ngāué ni ʻenau meʻatokoni mo ha loki ʻoku feʻunga ke nau nofo ai ʻi ha taha ʻo e ngaahi fale ʻo e Sōsaietí, ʻoku ui ko e ʻApi Pēteli. ʻOku nau toe maʻu ha kiʻi totongi feʻunga ki he fakamole ʻo e fefonongaʻaki ʻi heʻenau ngāue fakamalangá pea pehē ki heʻenau ngaahi fiemaʻu fakafoʻituituí.
Talu mei he 1920, kuo faʻu ʻe he kau ngāue pole ko ení ʻo laka hake he hiva piliona ʻa e Tohitapu, ʻū tohi, ngaahi makasini, pea mo e ngaahi tuleki ʻi he lea nai ʻe 200 ke tufaki atu he māmaní kotoa. ʻOku nau fai honau fatongiá ke lava ʻo malangaʻi atu ʻa e ongoongolelei taʻengatá ki he puleʻanga mo e matakali mo e lea mo e faʻahinga kotoa.—Fakahā 14:6, 7.
• Ko e hā ʻa e fokotuʻutuʻu fakapulusi ʻoku ngāueʻaki ʻe he Watch Tower Society, pea ko e hā hono ʻuhingá?
• Ko hai ʻoku nau fai ʻa e ngaahi ngāué ni, pea ʻoku anga-fēfē ʻenau nofó?
[Fakatātā ʻi he peesi 24]
Ko e kau ngāue pole ʻoku nau fai ʻa e ngaahi ngāue fekauʻaki mo e faʻu ʻo e tohi faka-Tohitapú ʻi he fale paakí, ʻapi, ʻōfisi, mo e faama, ʻi Brooklyn mo Wallkill, New York, U.S.A.
[Fakatātā ʻi he peesi 25]
Ko e kau ngāue pole ʻoku nau fai ʻa e ngaahi ngāue kehekehe ʻo kau fakahangatonu pe taʻefakahangatonu ki he faʻu ʻo e Tohitapú mo e ʻū tohi faka-Tohitapú
Sēpeni
Siamane
Finilani
Kānata
Tenimaʻake
Sueteni
ʻAfilika Tonga
Pelēsila
Netaleni
ʻAositelēlia