Vahe 32

ʻE Lava Fēfē Ke U Fakahoko ha Faisō Ola Lelei?

“KO E lahi taha ʻo e ngaahi taʻelavameʻa ʻi he nofo malí ko e taʻelavameʻa ʻa e faisoó. Ko e poini ko ení ʻoku ʻikai lava ke fuʻu lahi hono toutou leaʻakí.” Ko e lea ia ʻa Paul H. Landis, ko ha faifakatotolo ʻi he tuʻunga ʻo e moʻui fakafāmilí. ʻOku malava ke fakamoʻoniʻi ʻe Louise ʻa e moʻoni ʻo e leá ni. ʻOkú ne fakamatala: “Ko e fehālaaki lahi taha naʻá ku faí ko ʻeku pipiki fakaeongo kia Andy ki muʻa ke u fakaʻatā au ke sio pe ko e tokotaha ia naʻe fēfē. Ko ʻema faisoó naʻe meimei fakangatangata pē kia kimaua toko ua. Naʻe ʻikai ʻaupito ke u sio pe naʻe fēfē ʻene tōʻongá ʻi tuʻa mei he ngaahi tuʻunga ‘haohaoa’ ko ení.” Naʻe movete ʻena nofo malí ʻi ha vete. Ko e hā ʻa e kī ki hono kalofi ha meʻa fakamamahi pehē? Fakahoko ha faisō ola lelei!

Ki Muʻa ʻi he Faialeá

“Ko e tangata [pe fefine] fakapotopotó ʻokú ne vakai pea fakakaukauʻi lelei ʻa ʻene ʻalú.” (Palovepi 14:​15, The Amplified Bible) Ko hono fakatupulekina ha ongoʻi manako ki ha taha ʻoku ʻikai te ke loko ʻiloʻí ʻoku fakaafeʻi mai ai ʻa e fakatamaki—neongo kapau ko e tokotaha ko iá ʻoku hā ngali fakamānako. ʻE malava ke taki atu ai ki he mali mo ha taha ʻa ia ko ʻene ngaahi ongó mo ʻene ngaahi taumuʻá ʻoku kehe ʻaupito ia mei haʻaú! Ko ia ai, ʻoku fakapotopoto ke ʻuluaki siofi ʻa e tokotaha ko iá ʻi ha tuʻunga fakakulupu, ʻi he lolotonga nai haʻamou fai ha faʻahinga fakafiefia.

“Naʻá ku ʻilo kapau te u fuʻu ofi ʻi he ʻuluaki taimí, ʻe hanga ʻe heʻeku ongó ʻo kāpui ʻeku fakafuofuá,” ko e fakamatala ia ʻa Dave, ʻa ia kuó ne maʻu ha nofo mali fiefia ʻi he taʻu eni ʻe hongofulu. “Ko ia, naʻá ku vakai kia Rose mei he mamaʻó ʻo ʻikai te ne ʻilo naʻá ku mahuʻingaʻia ai. Naʻe malava ke u sio ki he anga ʻo ʻene tōʻonga ki he niʻihi kehé, pe ko ha tokotaha ia naʻe fakamalinga. ʻI he ngaahi talanoa noaʻiá, naʻá ku ʻilo ai ʻa hono ngaahi tuʻungá pea mo ʻene ngaahi taumuʻá.” ʻOku toe tokoni foki ke ʻilo pe ko e faʻahinga ongoongo fēfē ʻokú ne maʻú ʻaki ʻa e talanoa mo ha taha ʻokú ne ʻiloʻi lelei ʻa e tokotaha ko iá.—Fakafehoanaki mo e Palovepi 31:31.

Ko e ʻUluaki Faialeá

ʻI hono fakapapauʻi ʻe hoko nai ha taha ko ha hoa mali lelei kiate koé, ʻe malava ke ke fakaofiofi ki he tokotahá pea fakahaaʻi ʻa hoʻo fakaʻamu ke hoko ʻo ʻiloʻi lelei ange iá.a Pehē pē ʻoku tali lelei ia, ko hoʻo ʻuluaki faialeá ʻoku ʻikai fiemaʻu ia ke hoko ko ha meʻa ʻoku fuʻu fakaʻauliliki. Ko ha faialea kai hoʻatā nai, pe naʻa mo e kau ʻi ha faialea fakakulupu ʻe malava ke mo hoko ai ʻo maheni lelei ange koeʻuhi ke fakapapauʻi ai pe te mo kei fie hoko atu ʻa e vahaʻangataé. Ko hono ʻai ke fakafaingofua ʻa e ngaahi meʻá ʻoku tokoni ia ke fakafiemālieʻi ʻa e niʻihi nai ʻo e manavasiʻi te mo muʻaki ongoʻí. Pea ʻi he fakaʻehiʻehi mei hono fakahaaʻi vave ʻo e tukupaá, ʻe malava ai ke mo fakasiʻisiʻi ʻa e ongoʻi fakataleʻi—pe fakamā—kapau ʻe mole mei ha taha ʻia kimoua ʻa e mahuʻingaʻiá.

Neongo pe ko e hā ʻa e faʻahinga faialea ʻoku palaní, tauhi ʻa e taimí pea teuteu maau mo taau. Fakahāhā ʻa e ngaahi taukei ʻo ha tokotaha pōtoʻi talanoa. Hoko ko ha tokotaha fanongo tokanga. (Semisi 1:19) Neongo ʻoku ʻikai ha ngaahi lao pau ʻi he ngaahi meʻa ko ení, ʻe loto nai ha talavou ke muimui ʻi he ngaahi lao fakalotofonua ʻo e anga-fakaʻapaʻapá. ʻE kau nai ʻi he ngaahi meʻá ni ʻa hono fakaava ʻa e matapaá ki he kiʻi fefiné pe tataki ia ki hono tangutuʻangá. Ko ha finemui, ʻi he ʻikai te ne ʻamanekina ke ʻai ia ke ne hangē ha pilinisesí, ʻoku totonu ke ne ngāue fakataha mo e anga-fakaʻatuʻí ki he ngaahi feinga ʻa e tokotaha ʻoku faialea mo iá. ʻI he fefakaʻapaʻapaʻakí, ʻoku malava ai ke fokotuʻu ʻe ha ongo meʻa ha sīpinga ki he kahaʻú. ʻOku fekauʻi ha husepāniti ke ‘fakaʻapaʻapa ki hono uaifí ʻo hangē ko e hama vaivai.’ Pea ko ha uaifi ke “fakaʻapaʻapa ki hono husepaniti.”—1 Pita 3:7; Efeso 5:33.

ʻOku taau ʻa e fepikí, ʻumá, pe fāʻofuá pea kapau ʻoku pehē, ʻi he taimi fē? Ko e ngaahi fakahāhā ʻo e ʻofá, ʻi hono fai ko e fakamatalaʻi loto-moʻoni ʻo e ʻofá kae ʻikai ko e holi siokitá, ʻoku malava ke hoko ia ʻo fakatou maʻa mo taau. Ko e tohi Fakatohitapu ʻo e Hiva ʻo e Hivá ʻoku fakahā ai, naʻe ʻi ai ha ngaahi fakamatalaʻi feʻungamālie ʻo e ʻofá naʻe fefaiʻaki ʻi he vahaʻa ʻo e taʻahine Sūlemí pea mo e tamasiʻi tauhi-sipi naʻá ne ʻofa ai mo teu mali mo iá. (Hiva ʻo e Hiva 1:2; 2:6; 8:5) Ka ʻi he hangē ko e ongo meʻa anga-maʻa ko iá, ʻe toe tokanga ange ha ongo meʻa ke ʻoua ʻe hoko ʻa e ngaahi fakahāhā ʻo e ʻofá ʻo taʻemaʻa pe taki atu ki he fehokotaki fakasino taʻetāú.b (Kaletia 5:​19, 21) ʻI he ʻuhinga lelei, ko e ngaahi fakahāhā pehē ʻo e ʻofá ʻoku totonu ke toki fai pē ia ʻi he taimi kuo aʻu ai ʻa e vahaʻangataé ki ha tuʻunga kuo hoko ai ha fetukupāʻaki pea ʻoku hā ofi mai ʻa e malí. ʻI hono fakahāhā ʻa e mapuleʻi-kitá, ʻe malava ke ke kalofi ai hano fakaleluʻi koe mei ha taumuʻa tefito ʻo e faisō ola leleí, ʻa ia . . .

Ko Hono ʻIloʻi “ʻa e Tangata Fufū ʻo e Loto”

Naʻe līpooti ʻe ha timi fakatotolo ʻi he ʻīsiu ʻo Mē 1980 ʻo e Journal of Marriage and the Family: “ʻOku ngali tolonga mo lakalakaimonū ange ʻa e ngaahi nofo malí kapau ʻe hū ki ai ʻa e kakaí mo e meimei ʻilo kakato ki he anga ʻi loto ʻo e tokotaha ʻe tahá.” ʻIo, ko hono ʻiloʻi “ʻa e tangata fufū ʻo e loto” ʻo ho hoá ʻoku mātuʻaki mahuʻinga.—1 Pita 3:4.

Neongo ia, ko hono “fusi hake” ʻa e ngaahi taumuʻa ʻo e loto ʻo ha taha kehé ʻoku fiemaʻu ki ai ʻa e feinga mo e ʻiloʻilo. (Palovepi 20:5) Ko ia, palani ʻa e ngaahi meʻa ʻoku hangehangē te ne tokoniʻi lahi ange koe ke ke sio ki he anga ʻi loto ʻa ho hoá. Lolotonga ko e ʻalu ʻo sio faivá pe ki ha koniseti ʻe feʻunga nai ia ʻi he kamatá, ko hono fai ʻo e ngaahi meʻa ʻoku lahi ange ai ʻa e fetalanoaʻakí (hangē ko e ngaahi vaʻinga sipotí, maʻu ha taimi fiefia ʻi he matātahí mo e luelue ʻo ʻeveʻevá) ʻe tokoni lahi ange ia kia kimoua ke mo hoko ai ʻo maheni lelei ange.

Ke maʻu ha kiʻi fakakaukau fekauʻaki mo e ngaahi ongoʻi ʻa ho hoá, ʻahiʻahi ngāueʻaki ʻa e ngaahi fehuʻi hangē ko ení, ‘ʻOkú ke ngāueʻaki fēfē ho taimi ʻataá?’ ‘Kapau naʻe lahi ʻa e paʻangá, ko e hā te ke fie faí?’ ‘Ko e hā ʻa e tafaʻaki ʻo ʻetau lotu ki he ʻOtuá ʻokú ke saiʻia taha aí? Ko e hā hono ʻuhingá?’ ʻOku ʻomai ʻe he meʻá ni ʻa e ngaahi tali loloto ʻoku tokoni ia ke ke ʻilo ai ʻa e meʻa ʻoku fakamahuʻingaʻi ʻe ho hoá.

ʻI he fakaʻau ke loloto ange ʻa e vahaʻangataé peá mo fakakaukau fakamātoato ange ki he nofo malí, ʻoku ʻi ai ʻa e fiemaʻu ki ha talanoa fakamātoato fekauʻaki mo e ngaahi ʻīsiu mahuʻinga, hangē ko e ngaahi meʻa ʻokú mo fakamahuʻingaʻí; feituʻu te mo nofo ai mo e anga hoʻomo moʻuí; ngaahi meʻa fakapaʻangá, kau ai pe te mo fakatou ngāue; maʻu fānau; fakavahavahafanau; ngaahi fakakaukau fekauʻaki mo homo ngafa taki taha ʻi he nofo malí; pea mo e ngaahi taumuʻa fakahoko vave mo fuoloa ange mo e anga hoʻomo palani ke aʻusia iá. Ko e tokolahi ʻo e kau talavou Fakamoʻoni ʻa Sihová ʻoku nau hoko ko e kau ʻevangeliō taimi-kakato ʻi he ʻosi ʻenau akó, pea ʻoku nau fakaʻamu ke hoko atu ai pē ʻi he ngāue ko iá ʻi he hili ʻa e malí. Ko e taimi eni kiate kimoua ke mo fakapapauʻi ai ʻoku hoamālie hoʻomo ngaahi taumuʻa fakalaumālié. Ko ha toe taimi foki ia ke fakahā ai ha ngaahi meʻa, mahalo ʻi ho kuohilí, te ne uesia nai ʻa e nofo malí. ʻE kau nai ʻi he ngaahi meʻá ni ha ngaahi moʻua lalahi pe ngaahi fatongia. Ko e ngaahi meʻa fekauʻaki mo e moʻuí, hangē ko ha faʻahinga mahaki mafatukituki pea mo hono ngaahi nunuʻá ʻoku toe totonu foki ke talanoaʻi hangatonu.

ʻI he ngaahi talanoa peheé, muimui ʻi he faʻifaʻitakiʻanga ʻa ʻIlaiū, ʻa ia naʻá ne pehē: “ʻOku ou lea hangatonu mei hoku lotó mo talanoa totonu.” (Siope 33:​3, The Holy Bible in the Language of Today, ʻa William Beck) ʻI he fakamatala ʻa Esther ki hono teuʻi ia ʻe heʻene faisoó ki ha tuʻunga naʻe hoko ko ha nofo mali fiefiá, naʻá ne pehē: “Naʻe ʻikai te u feinga ke ‘fakangalingali’ pe te u pehē ʻoku ou loto-tatau mo Jaye ka naʻe kehe ʻeku ongoʻí. ʻOku kei ʻikai pē ke u pehē. ʻOku ou feinga maʻu pē ke u lea totonu.”

ʻOua te ke kalo pe fakataʻetaʻetokanga ki he ngaahi tuʻunga-lea pelepelengesí ʻi he manavasiʻi naʻá ke ʻai ke faingataʻaʻia ho hoá. Naʻe fai ʻe Beth ʻa e fehālaaki ko ení lolotonga ʻene faisō mo John. Naʻe pehē ʻe Beth ʻokú ne tui ki he tātānaki ki he kahaʻú ʻo ʻikai fakamoleki noa ʻa e paʻangá. Naʻe pehē ʻe John ʻoku pehē pē mo ia. Naʻe ʻikai toe hoko atu ʻa e fakaʻekeʻeke ʻa Beth, ʻi he fakakaukau atu naʻá na fakakaukau taha ʻi he ngaahi meʻa fakapaʻangá. Ka naʻe ʻosi angé ko e fakakaukau ia ʻa John fekauʻaki mo e tātānaki ki he kahaʻú, naʻe ʻuhinga ia ko e tātānaki ke maʻu ha kā sipoti foʻou! ʻI he hili ʻa e malí ko e siʻi ʻena felotoi ʻi he anga hono ngāueʻaki ʻo e paʻangá naʻe hoko ia ʻo maeʻeeʻa lelei ʻene fakamamahí.

Ko e ngaahi taʻefemahinoʻaki peheé ʻe malava pē ke taʻofi ki muʻa. Ko Louise, naʻe fai ki ai ʻa e lave ʻanenaí, ʻi heʻene toe fakakaukau atu ki heʻene faisoó ʻokú ne pehē: “Naʻe totonu ke toe lahi ange ʻa e ngaahi fehuʻi naʻá ku ʻeké, hangē ko ení, ‘Fēfē kapau naʻá ku feitama pea naʻe ʻikai te ke fiemaʻu ha pēpē, ko e hā te ke faí?’ Pe, ‘Kapau naʻe ʻi ai hata moʻua pea naʻá ku loto ke u nofo ʻi ʻapi ʻo tokangaʻi ʻeta tamá, te ke tokangaʻi fēfē ʻa e ngaahi meʻá?’ Naʻá ku mei fakatokangaʻi lelei ai ʻa ʻene talí.” Ko e ngaahi talanoa peheé ʻe malava ke ne fakaeʻa ʻa e ngaahi anga ʻo e lotó ʻa ia ʻoku totonu ke fai ha sio lelei ki ai ki muʻa ʻi he malí.

Siofi ʻEne Tōʻongá!

“ʻE malava ke mātuʻaki anga-lelei atu ha taha ʻi hoʻomo feangai fakaekimouá pē,” ko e fakamatala ia ʻa Esther. “Ka ʻi he ʻi ai ʻa e niʻihi kehé, ʻoku faʻa ʻai ai kinautolu ki ha tuʻunga taʻeʻamanekina. ʻE lea atu ʻaki nai ʻe ha taha ho ngaahi kaungāmeʻá ki ho hoá ha meʻa ʻe ʻikai nai te ne saiʻia ai. Te ke sio leva he taimí ni ki he anga ʻo ʻene tali ʻi he malumalu ʻo e tengé. Te ne vangi ʻa e tokotaha ko iá pe manukiʻi?” ʻOkú ne fakaʻosiʻaki: “Ko e feohi mo homa ngaahi kaungāmeʻá mo e fāmilí lolotonga ʻema faisoó naʻe tokoni lahi fakaʻulia ia.”

Tānaki atu ki he fakafiefiá, fakamoleki ha taimi ke ngāue fakataha ai. Kau ʻi he ngaahi ngāue faka-Kalisitiané, kau ai ʻa e ako ʻo e Folofola ʻa e ʻOtuá mo e ngāue fakafaifekau faka-Kalisitiané. Pehē foki, fai ha niʻihi ʻo e ngaahi ngāue fakaʻaho ʻa ia ʻi he hili ʻa e malí ʻe hoko ko ha founga ʻo e moʻuí—fakatau mai ʻo e meʻakaí, teuteu ha meʻatokoni, fufulu ipu mo e fakamaʻa fale. ʻI he ngāue fakataha ʻi he ngaahi tuʻunga moʻoni ʻo e moʻuí—ʻi he hoko nai ho hoá ʻo ʻi hono tuʻunga kovi tahá—ʻe malava ai ke ke ʻiloʻi ha faʻahinga fakangalilelei pē.

Ko e tamasiʻi tauhi-sipi ʻo e Hiva ʻo e Hivá naʻá ne vakai ki he tōʻonga ʻa e taʻahine naʻá ne ʻofa aí, ʻi he taimi naʻá ne loto-mamahi aí pe ʻi he lolotonga ʻene ngāue ʻi he laʻā vevelá—ʻo tautaʻa mo helaʻia. (Hiva ʻo e Hiva 1:​5, 6; 2:15) ʻI he hili foki ʻa e toe vakai ki heʻene talitekeʻi mateaki ʻa e ngaahi fakatauele ʻa e tuʻi koloaʻia ko Solomoné, naʻá ne fakahā: “E hoku ofaaga, oku ke hoihoifua haohaoa; oku ikai ha mele iate koe.” (Hiva ʻo e Hiva 4:​7, PM) Ko e moʻoni, naʻe ʻikai te ne ʻuhingá naʻá ne haohaoa, ka naʻe ʻikai hano mele pe ʻila tefito fakaeʻulungāanga. Ko ʻene hoihoifuá naʻe fakalahi ia ʻe hono mālohinga fakaeʻulungāangá, ʻa ia naʻe mahuʻinga ange ia ʻi hano vaivaiʻanga pē.—Fakafehoanaki mo e Siope 31:7.

Ke fai ha sivisiviʻi pehē ʻoku fiemaʻu ki ai ʻa e taimi. Ko ia, fakaʻehiʻehi mei he fakavaveʻi ʻo e faisoó. (Palovepi 21:5) ʻE faʻa fai ʻe ha tangata mo ha fefine ʻa e meʻa kotoa pē ke ikuʻi ai ʻena ʻofá. Ka ʻo kapau ʻoku fakaʻatā ha taimi feʻunga, ko e ngaahi tōʻonga mo e ngaahi hehema koví ʻe eʻa ia ʻi ha founga. Ko ha ongo meʻa ʻoku ʻikai ngata pē ʻi heʻena tuku ha taimi ka ʻokú na toe ngāueleleiʻaki ia lolotonga ʻa e faisoó, ʻoku hangehangē ʻi he hili ʻa e malí ʻe faingofua ange ʻena fengaʻunuʻakí. Fakataha mo e ʻilo lahi, ʻoku malava ke na hū ai ki he nofo malí mo e falala ʻe malava ke na fakaleleiʻi ʻa e ngaahi felotokehekeheʻaki ʻe malanga haké. Ko e faisō ola leleí kuó ne teuʻi kinaua ki ha nofo mali fiefia mo lavameʻa.

[Fakamatala ʻi lalo]

Ngaahi Fehuʻi ki he Fetalanoaʻaki

◻ Ko e hā ha taumuʻa tefito ʻo e faisoó, pea ʻoku mahuʻinga fēfē ia ki he nofo mali fiefiá?

◻ Ko e hā te ne tokoniʻi koe ke ke ʻiloʻi ʻa e ‘anga ʻi loto’ ʻo ha tokotaha kehe?

◻ Ko e hā ʻa e faʻahinga talanoa ʻoku tokoni ki ha faisō ola lelei?

◻ Ko e hā ʻoku tokoni ai ʻa e fakamoleki fakataha ʻo e taimí ʻi he ngaahi tuʻunga kehekehe?

◻ Ko e hā ʻa e ngaahi fakaʻilonga ʻo e mele ha vahaʻangatae?

◻ Ko fē ʻa e taimi ʻoku totonu ke fakangata ai ha faisō?

[Fakamatala ʻi he peesi 255]

“ʻOku ngali tolonga mo lakalakaimonū ange ʻa e ngaahi nofo malí kapau ʻe hū ki ai ʻa e kakaí mo e meimei ʻilo kakato ki he anga ʻi loto ʻo e tokotaha ʻe tahá.”​—Journal of Marriage and the Family

[Puha/Fakatātā ʻi he peesi 256, 257]

ʻOku Totonu Ke Ma ʻOsi?

ʻI he fakaofiofi atu ha feʻofaʻaki ki he tuʻunga mahuʻinga ʻo hono fai ha fili, ʻoku ʻikai ko ha meʻa foʻou ke malanga hake ha filifilingaua. Fēfē kapau ʻoku tupu ʻa e filifilingaua peheé mei he ngaahi mele mafatukituki ʻi he tokotaha ʻokú ke faialea mo iá pe mei he ngaahi mele ʻi he vahaʻangataé tonu?

Ko e fakatātaá, naʻa mo e kakai ʻoku nau feʻofaʻakí ʻoku moʻoni ʻoku nau taʻefelotoi ʻi ha ngaahi taimi ʻe niʻihi. (Fakafehoanaki mo e Senesi 30:2; Ngāue 15:39.) Ka ʻo kapau ʻokú mo taʻefelotoi ʻi he meimei meʻa kotoa pē, kapau ʻoku hoko ʻa e talanoa kotoa pē ko ha feʻauhi kaikaila, pe kapau ko homo vahaʻangataé ko ha vilo taʻetoengata ia ʻo e ʻosí mo e fakaleleí, tokanga! Ko ha fakaʻekeʻeke ʻo e kau toketā ʻe toko 400 naʻe fakahā ai ko e hokohoko feʻiteʻitaní ko ha fakaʻilonga mālohi ia ʻo e “taʻemateuteu fakaeongo ki he nofo malí,” naʻa mo hono fakahaaʻi nai ha “fepaki taʻealafakaleleiʻi ʻi he vahaʻa ʻo e ongo meʻá.”

Ko e ʻuhinga foki ʻe taha ki he hohaʻá ko hoʻo ʻilo nai ha ngaahi mele fakatupu hohaʻa ʻi he angaʻitangata ʻo ha hoa ʻoku ʻamanekina. Ko e hā mai ʻo ha loto-lili pe naʻa mo e ngaahi fakaʻilonga ʻo ha siokita, taʻematuʻotuʻa, ʻiteʻita pe taʻeʻunuá te ne ʻai nai ai ke ke fifili pe te ke fie fakamoleki ʻa e toenga hoʻo moʻuí mo e tokotahá ni. Ka ʻoku taʻetokangaʻi pe feinga ʻa e tokolahi ke fakatonuhiaʻi ʻa e ngaahi tōnounou peheé pea ngali fakapapauʻi ke ʻai ʻa e vahaʻangataé ke ngāue neongo ai pē pe ko e hā. Ko e hā ʻoku hoko ai ení?

Koeʻuhi ko e faisoó ʻoku fai fakamātoato ʻe he kau Kalisitiane moʻoní—hangē ko ʻene totonu ke peheé—ʻoku ongoʻi ai ʻe he niʻihi ʻoku fakaʻaiʻai kinautolu ke mali mo e tokotaha ʻoku nau faialea mo iá. Te nau toe manavahē nai ʻi he fehangahangai pea fakalotomamahiʻi ʻa e tokotahá ni. ʻE ilifia pē nai ʻa e niʻihi naʻa ʻikai malava ke nau toe maʻu ha taha ke mali mo ia. Kae kehe, ʻoku ʻikai ko ha ngaahi ʻuhinga lelei eni ki hono fakatolonga ha faisō kuo palopalemaʻia.

Ko e taumuʻa ʻo e faisoó ke vakaiʻi pe ʻe malava ke hoko ha mali. Pea kapau ʻoku kamata ʻe ha Kalisitiane ha faisō fakataha mo e tui mālohi, ʻoku ʻikai te ne moʻuaʻaki ke hokohoko atu ia kapau ʻoku hoko ʻo mele. ʻIkai ko ia pē, ʻikai ʻe hala mo siokita ke fakatolonga ha vahaʻangatae kuo hōloa ʻi he fakakaukau, ‘mahalo pē heʻikai ke u toe maʻu ha taha?’ (Fakafehoanaki mo e Filipai 2:4.) Ko ia ʻoku mahuʻinga leva ke mo fehangahangai, ʻikai ko hono kalofi, hoʻomo ngaahi palopalemá. Kamataʻaki ʻa e vakai mālohi ki he tokotaha ʻokú ke faialea mo iá.

Ko e fakatātaá, ʻoku ʻi ai ha fakamoʻoni ko ha fefine eni ʻe hoko ko ha uaifi fita mo anga-nofo? (Palovepi 31:​10-31) ʻOku ʻi ai ha fakamoʻoni ko ha tangata eni te ne fakahā ʻa e ʻofa feilaulauʻi-kitá pea hoko ko ha tokotaha tokonaki lavameʻa? (Efeso 5:​28, 29; 1 Timote 5:8) ʻE taku nai ʻe ha taha ko ha sevāniti faivelenga ia ʻa e ʻOtuá, ka ʻoku ʻi ai ha ngaahi ngāue ke poupouʻiʻaki ha taukaveʻi pehē ʻo e tuí?—Semisi 2:​17, 18.

Ko e moʻoni, kapau kuó ke fakamoleki ʻa e ongo mo e taimi lahi ʻi hono fakatupulekina ha vahaʻangatae, ʻoua ʻe fakavave ke fakangata ia koeʻuhi pē kuó ke ʻilo ʻoku ʻikai te ne haohaoa. (Semisi 3:2) Mahalo ko e ngaahi mele ʻo e tokotaha ko iá ko e ngaahi meʻa pē ʻoku malava ke ke feʻao mo ia.

Fēfē kapau ʻoku ʻikai? Talanoaʻi ʻa e ngaahi meʻá. ʻOku ʻi ai ha ngaahi faikehekehe tefito ʻi hoʻomo ngaahi taumuʻá pe fakakaukaú? Pe ko e ngaahi taʻefemahinoʻaki pē? Ko ha tuʻunga nai ia ʻo e fiemaʻu fakatouʻosi kiate kimoua ke mo ako ke ‘buleʻi homo laumalié’ pea fakaleleiʻi anga-mokomoko ange ʻa e ngaahi meʻá? (Palovepi 25:​28, PM) Kapau ʻoku fakahohaʻasi koe ʻe he fanga kiʻi anga faikehe fakatupu-ʻitá, ʻokú ne fakahaaʻi anga-fakatōkilalo ʻa e ngaahi tōnounoú pea fakahā ha holi ke fakalakalaka? ʻOku ʻi ai ha fiemaʻu ʻi hoʻo tafaʻakí ke fakasiʻisiʻi ange ʻa hoʻo ʻita vavé mo e mamahingofuá? (Koheleti 7:9) Ko e ‘fekatakiʻaki ʻi he ʻofá’ ʻa e moʻuiʻanga ʻo ha nofo mali lelei.—Efeso 4:2.

ʻI he ʻikai maumauʻi homo vahaʻangataé, ko hono talanoaʻi ʻo e ngaahi meʻá te ne fakaeʻa nai ʻa e malava ki ha tupulekina ʻi he kahaʻú! Ka ʻo kapau ʻoku iku pē ʻa e fetalanoaʻakí ia ʻo ʻikai fakaleleiʻi ai ha meʻa, ʻoua te ke tukunoaʻi ʻa e ngaahi fakaʻilonga mahino ʻo e fakatamaki ʻoku tuʻunuku maí. (Palovepi 22:3) Ngalingali ʻe ʻikai ke toe lelei ange ʻa e ngaahi meʻá ʻi he hili ʻa e malí. Ko hono fakangata nai ʻo e faisoó ʻa e meʻa lelei taha kiate kimouá.

[Fakatātā ʻi he peesi 253]

Ko e fevakaiʻaki ʻi ha kulupú ʻe malava ke mo hoko ai ʻo maheni lelei ange ʻo ʻikai ha felāveʻi fakaeʻofa

[Fakatātā ʻi he peesi 254]

Ko e fai ki he ngaahi lao fakalotofonua ʻo e anga-fakaʻapaʻapá mo e ʻulungāanga leleí ʻoku fokotuʻu ai ha sīpinga ʻo e fefakaʻapaʻapaʻaki ʻa ia ʻe malava ke kei hokohoko atu ʻi he nofo malí

[Fakatātā ʻi he peesi 259]

ʻI he hā mai ʻoku ʻikai ke ola lelei ha faisō, ko e meʻa anga-ʻofa ke faí, ko e fai ha talanoa femātaaki ʻo fakamatalaʻi ʻa e ʻuhinga kuo pau ke fakangata ai ʻa e vahaʻangataé