Ko e Māmani Palataisí
ʻE fetongi fakaʻaufuli ʻe Sihova ʻa e kovi kotoa kuo fai ʻe Sētané. Kuo ʻai ʻe Sihova ʻa Sīsū ke Tuʻi ki he māmaní kotoa. ʻI heʻene pulé, ʻe ʻai ai ʻa e māmaní ke hoko ko ha palataisi.—Tāniela 7:13, 14; Luke 23:43.
ʻOku talaʻofa mai ʻe Sihova ʻa e ngaahi meʻá ni:
MOHU MEʻATOKONI: “Kuo foaki ʻe he kelekele hono fua: ʻe tapuakiʻi kitautolu ʻe Elohimi ko hotau ʻOtua.” “Ke mafola mai ʻa e koane ʻi he fonua, pea lea hange ko Lepanoni hono fua ʻi he funga moʻunga.”—Sāme 67:6; 72:16.
ʻIKAI KE TOE ʻI AI HA TAU: “Haʻu ʻo mamata ki he ngaahi ngaue ʻa Sihova, hono kuo ne fai meʻa fakailifia ʻi he fonua! ʻOku ne lolololo ʻa e ngaahi tau ʻo aʻu ki he ngataʻanga ʻo mamani.”—Sāme 46:8, 9.
ʻIKAI HA KAKAI KOVI: “He ko e kau taʻe fai totonu ʻe tuʻusi ia . . . ʻIo ʻoku toe siʻi pea mole ʻa ia ʻoku fai kovi; ʻio te ke hakule ʻa e potu naʻe ʻi ai, ka ʻoku ʻikai.”—Sāme 37:9, 10.
ʻIKAI HA MAHAKI, MAMAHI PE MATE: “ʻE toki fakaava ʻa e mata ʻo e kui, pea toʻo ʻa e telinga ʻo e tuli. Toki hopo ʻa e heke hange ha tia, pea hiki mavava ʻa e ʻelelo ʻo e noa.”—ʻAisea 35:5, 6.
“Ko e ʻOtua ʻoku kau maʻanautolu, ʻio, ko honau ʻOtua. Pea te ne holoholo ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa.”—Fakahā 21:3, 4.
ʻOku ʻikai ʻaupito ke loi ʻa Sihova, ʻoku mātuʻaki kehe ia meia Sētane mo e kau tēmenioó. Kuo pau ke hoko ʻo moʻoni ʻa e meʻa kotoa ʻokú ne talaʻofa maí. (Luke 1:36, 37) ʻOku ʻofa mai ʻa Sihova kiate koe pea ʻokú ne loto ke ke nofo ʻi he Palataisi te ne ngaohí. Ko ia fetuʻutaki ki he Kau Fakamoʻoni ʻa Sihová ke ke ako lahi ange ʻo kau ki he ngaahi moʻoni fakaofo ʻoku maʻu ʻi he Folofola ʻa e ʻOtuá. Kapau te ke ngāueʻaki ʻa e moʻoní ʻi hoʻo moʻuí, ʻe fakatauʻatāinaʻi ai koe mei he nofo pōpula ki he ngaahi loí mo e manavahē taʻeʻuhingá mo e taʻeʻiló. ʻE faifai atu pē pea te ke aʻu ʻo tauʻatāina mei he haʻisia ki he angahalá mo e maté. Hangē ko ia naʻe leaʻaki ʻe Sīsuú: “Pea ʻe faifai pea mahino kiate kimoutolu ʻa e moʻoni, pea ʻe fakatauʻatāina ʻa kimoutolu ʻe he moʻoni.”—Sione 8:32.