Ko e ʻOtuá ʻa e Kaumeʻa Lelei Taha ʻe Lava Ke Ke Maʻú

Ko e hoko ko e kaumeʻa ʻo e ʻOtuá ʻa e meʻa lelei taha ʻe lava ke hoko kiate koé. ʻE akoʻi koe ʻe he ʻOtuá ki he founga ke ke hoko ai ʻo fiefia mo malú; te ne fakatauʻatāinaʻi koe mei he ngaahi tui fehālaaki lahi mo e ngaahi tōʻonga fakatupu maumaú. Te ne fanongo mai ki hoʻo ngaahi lotú. Te ne tokoniʻi koe ke ke maʻu ʻa e nonga mo e tuipau ʻi loto. (Sāme 71:5; 73:28) ʻE poupouʻi koe ʻe he ʻOtuá ʻi he lolotonga ʻo e ngaahi taimi faingataʻá. (Sāme 18:18) Pea ʻoku tuku atu kiate koe ʻe he ʻOtuá ʻa ʻene meʻaʻofa ko e moʻui taʻengatá.​—Loma 6:23.

ʻI hoʻo ʻunuʻunu ofi ki he ʻOtuá, te ke ʻunuʻunu ofi ai ki he ngaahi kaumeʻa ʻo e ʻOtuá. Te nau hoko foki ko ho ngaahi kaumeʻa. Ko hono moʻoní, te nau hoko ʻo hangē ha fanga tokoua mo e fanga tuofāfine kiate koé. Te nau fiefia ke akoʻi koe ʻo fekauʻaki mo e ʻOtuá pea te nau tokoniʻi koe mo fakalototoʻaʻi koe.

ʻOku ʻikai ke tau tatau mo e ʻOtuá. ʻI hoʻo kumi ke kaumeʻa mo e ʻOtuá, kuo pau ke ke mahinoʻi ha foʻi moʻoni mahuʻinga. Ko e kaumeʻa mo e ʻOtuá ʻoku ʻikai ko ha kaumeʻa ia ʻa ha ongo meʻa ʻokú na faitatau. ʻOku taʻumotuʻa mamaʻo ange mo poto mamaʻo ange mo mālohi mamaʻo ange ia ʻiate kitautolu. Ko hotau Tokotaha-Pule totonú ia. Ko ia, kapau ʻoku tau loto ke hoko ko hono kaumeʻa, kuo pau ke tau fanongo kiate ia pea fai ki he meʻa ʻokú ne tala mai ke tau faí. ʻE ngāue maʻu pē ʻa e meʻá ni ki heʻetau leleí.​—Aisea 48:18 (Isaia, PM).