Ko Hai ʻa e Ngaahi Fili ʻo e ʻOtuá?

Ko e fili tefito ʻo e ʻOtuá ko Sētane ko e Tēvoló. Ko ha meʻamoʻui laumālie ia ʻa ia naʻe angatuʻu kia Sihova. ʻOku hokohoko atu ʻa Sētane ke faitau ki he ʻOtuá pea fakatupunga ʻa e faingataʻa lahi ki he faʻahinga ʻo e tangatá. ʻOku fulikivanu ʻa Sētane. Ko e tokotaha-loi ia mo ha tokotaha-fakapō.​—Sione 8:44.

Naʻe kau ʻa e ngaahi meʻamoʻui laumālie kehe mo Sētane ʻi heʻene angatuʻu ki he ʻOtuá. ʻOku ui kinautolu ʻe he Tohitapú ko e fanga tēmeniō. ʻI he hangē ko Sētané, ko e kau tēmenioó ko e ngaahi fili ia ʻo e faʻahinga ʻo e tangatá. ʻOku nau saiʻia ke fakamamahiʻi ʻa e kakaí. (Mātiu 9:32, 33; 12:22) ʻE fakaʻauha ʻe Sihova ʻa Sētane mo ʻene kau tēmenioó ʻo taʻengata. ʻOku nounou pē ʻa honau taimi ʻoku toe ki hono fakahohaʻasi ʻa e faʻahinga ʻo e tangatá.​—Fakahā 12:12.

Kapau ʻokú ke loto ke hoko ko e kaumeʻa ʻo e ʻOtuá, kuo pau ke ʻoua te ke fai ʻa e meʻa ʻoku loto ʻa Sētane ke ke faí. Ko Sētane pea mo e kau tē­menioó ʻoku nau fehiʻa ʻia Sihova. Ko e ngaahi fili kinautolu ʻo e ʻOtuá, pea ʻoku nau loto ke ʻai koe ko ha fili ʻo e ʻOtuá. Kuo pau ke ke fili pe ko hai ʻokú ke loto ke fakahōifuaʻí​—ko Sētane pe ko Sihova. Kapau ʻokú ke fiemaʻu ʻa e moʻui taʻengatá, kuo pau ke ke fili ke fai ʻa e finangalo ʻo e ʻOtuá. ʻOku lahi ʻa e ngaahi tōʻonga mo e ngaahi founga ʻa Sētane ke kākaaʻi­ʻaki ʻa e kakaí. Ko e tokolahi taha ʻo e kakaí ʻokú ne kākaaʻi ʻe ia.​—Fakahā 12:9.