Polokalama ki Hono Fakatupulekina ʻa e Malava ʻi he Tuʻunga ko ha Tokotaha Malanga mo ha Faiakó
PE ʻOKÚ KE kei siʻi pe taʻumotuʻa, tangata pe fefine, ko e ako ko ení ʻe lava ke ne tokoniʻi koe ʻi hono fai ha fakamatala ola lelei ange pea ʻi he hoko ʻo taau lelei ange ʻi he tuʻunga ko ha faiako ʻo e Folofola ʻa e ʻOtuá.
Ko e ngaahi konga ke vaheʻi ki he faʻahinga ʻoku kau ʻi he Ako Fakafaifekau Fakateokalatí ʻe fai ia ʻe he ʻovasia ʻo e akó. ʻI he ngaahi peesi ʻe tolu hono hokó, te ke maʻu ai ʻa hoʻo foomu akonakiʻi fakafoʻituituí. Ko e ngaahi fika ʻi muʻa ʻi he ngaahi poini kehekehé ʻoku fehoanaki ia mo e ngaahi ako ʻi he ngaahi peesi hoko maí. ʻI he ngaahi ako ko iá te ke maʻu ai ha fakamatala fekauʻaki mo e meʻa ʻoku kau ki he pōtoʻi ʻi he ngaahi tafaʻaki ko eni ʻo e leá mo e faiakó pea mo e ʻuhinga ʻoku mahuʻinga ai ʻa e fakamatala taki taha. Te ke toe maʻu ai ʻa e tataki ʻaonga ʻi he founga ke fakahoko ai ʻa e meʻa ʻoku fakahinohino maí.
Ko e lanu ʻoku ʻomai ʻi he foomu akonakí ʻoku fakahaaʻi ai ʻa e ngaahi poini ʻoku ngāueʻaki ki he ngaahi konga ʻoku kau ki ai ʻa e (1) lautohi ki ha kau fanongo, (2) ko ha fakahāhā mo e toko ua pe ko ha faʻahinga tokolahi ange, pe (3) ko ha malanga ki he fakatahaʻangá. ʻE vaheʻi ʻe he ʻovasia ʻo e akó ʻa e poini ke ke ngāue ki aí. ʻOku lelei ange ke ngāue ki he poini pē ʻe taha ʻi he taimi taki taha. Te ke maʻu ʻaonga ʻi hono fai ʻa e ngaahi meʻa ke fai ʻoku ʻomai ʻi he ngataʻanga ʻo e ako kuo vaheʻi maí. Kapau ʻokú ke ʻoatu ʻa e fakamoʻoni kuó ke ngāueʻaki lavameʻa ʻa e akonaki ʻi he ako kuo vaheʻí, ʻe vaheʻi atu kiate koe ʻe hoʻo faiakó ha toe poini ʻe taha.
Kapau ko hoʻo kongá ke fakahoko ia ko ha fakahāhā, te ke fiemaʻu ki ai ha fokotuʻutuʻu. Ko ha fakahokohoko ʻo e ngaahi fokotuʻutuʻú ʻoku hā ia ʻi he peesi 82, ka ʻoku ʻikai ke ke fakangatangata pē ʻi he fakahokohoko ko ení. ʻE tuku atu nai ʻe hoʻo faiakó ke ke ʻahiʻahiʻi ha fokotuʻutuʻu pau koeʻuhi ke ke maʻu ai ha taukei, pe te ne tuku atu pē nai kiate koe ke ke fai ʻa e filí.
Ko hono lau ʻa e tohí ni pea mo hono fai ʻa e ngaahi meʻa ke faí naʻa mo e ʻi he ʻikai te ke teuteu ha ngaahi konga ki he akó ʻe lava ke tokoni lahi ia ki hoʻo fakalakalaká. Mahalo pē te ke lava ke kāpui ha ako kehe ʻi he uike taki taha pe ofi ki ai.
Tatau ai pē pe ko e hā hono fuoloa hoʻo kau ʻi he akó pe kau ʻi he malaʻe fakafaifekaú, ʻe kei lava pē ke ke fakalakalaka. ʻOfa ke ke maʻu ʻaonga kakato mei he ako ʻoku tokonaki mai fakafou ʻi he Ako Fakafaifekau Fakateokalatí.