ʻOku Fēfē Hoʻo Vakai ki he Kahaʻú?

KO E LAU ʻA E TOHI TAPÚ

“Ko e ʻOtuá . . . te ne holoholo ʻa e loʻimata kotoa pē mei honau matá, pea ʻe ʻikai ke toe ʻi ai ha mate, pe ha mamahi pe ha tangi pe ha langa. Kuo mole atu ʻa e ngaahi meʻa muʻá.”—Fakahā 21:3, 4, Liliu Tohi Tapu Māmani Foʻoú.

ʻAONGA TE KE MAʻU MEI AÍ

Ngāue ʻoku ʻi ai hono taumuʻa mo fakafiemālie.​—ʻAisea 65:21-23.

ʻIkai ke toe ʻi ai ha puke pe ko ha faʻahinga faingataʻa.​—ʻAisea 25:8; 33:24.

Ko ha moʻui fiefia mo tuʻuloa fakataha mo e fāmilí mo e ngaahi kaungāmeʻá.​—Saame 37:11, 29.

TE TAU TUI MOʻONI KOĀ KI HE LAU ʻA E TOHI TAPÚ?

ʻIo, ʻi he ʻuhinga ʻe ua:

• ʻOku maʻu ʻe he ʻOtuá ʻa e malava ke fakahoko ʻa e talaʻofá. ʻI he Tohi Tapú, ko Sihova ko e ʻOtuá toko taha pē ʻoku ui ko e “Māfimafi-Aoniú,” he ʻokú ne maʻu ʻa e mālohi taʻefakangatangata. (Fakahā 15:3) Ko ia ʻokú ne malava kakato ke fai ki heʻene talaʻofa ko ia ke liliu hotau māmaní ke lelei ange. Hangē ko e lau ʻa e Tohi Tapú, “ki he ʻOtuá ʻoku malava ʻa e meʻa kotoa pē.”—Mātiu 19:26.

• ʻOku maʻu ʻe he ʻOtuá ʻa e holi ke fakahoko ʻa e talaʻofá. Ko e fakatātaá, ʻoku “holi” ʻa Sihova ke fakafoki mai ʻa e moʻui ʻa e kakai kuo nau maté.—Siope 14:14, 15.

ʻOku toe fakahaaʻi ʻe he Tohi Tapú ko e ʻAlo ʻo e ʻOtuá, ʻa Sīsū, naʻá ne fakamoʻui ʻa e kau puké. Ko e hā naʻá ne fai ai iá? Koeʻuhí he naʻá ne loto ki ai. (Maʻake 1:40, 41) Naʻe tapua haohaoa mai ʻe Sīsū ʻa e ʻulungaanga ʻo ʻene Tamaí ʻi heʻene holi ke tokoniʻi ʻa e faʻahinga naʻe faingataʻaʻiá.—Sione 14:9.

Ko ia ʻoku malava ke tau fakapapauʻi ʻoku fakatou loto ʻa Sihova mo Sīsū ke tokoniʻi kitautolu ke tau maʻu ha kahaʻu fiefia!—Saame 72:12-14; 145:16; 2 Pita 3:9.