LĒSONI 4
Naʻá Ne ʻAi ke Fiefia ʻEne Tamaí mo Sihova
Ko e hā ʻa e palōmesi ʻoku fai ʻe Sēfita kia Sihová?
Naʻe ʻikai faingofua, ka naʻe fakahoko ʻe he ʻofefine ʻo Sēfitá ʻa e palōmesi ʻene tamaí
ʻOkú ke sio ki he taʻahine ʻi he fakatātaá?— Ko e ʻofefine ia ʻo e tangata ko hono hingoá ko Sēfita. ʻOku ʻikai ke tala mai ʻe he Tohi Tapú hono hingoá, ka ʻoku tau ʻiloʻi naʻá ne ʻai ke fiefia ʻene tamaí mo Sihova. Tau ako angé fekauʻaki mo ia mo ʻene tamai ko Sēfitá.
Ko ha tangata lelei ʻa Sēfita pea naʻá ne fakamoleki ʻa e taimi lahi ke akoʻi hono ʻofefiné fekauʻaki mo Sihova. Naʻá ne toe hoko ko ha tangata mālohi pea ko ha taki lelei. Ko ia naʻe kole ʻe he kau ʻIsilelí ke ne tataki kinautolu ʻi he tau mo honau ngaahi filí.
Naʻe lotu ʻa Sēfita ki ha tokoni ʻa e ʻOtuá ke nau mālohi. Naʻe palōmesi ʻa Sēfita kapau ʻe ikuna, te ne ʻoatu kia Sihova ʻa e ʻuluaki tokotaha ʻe hū mai ki tuʻa mei hono falé ʻi he taimi ʻe foki ai ki hono ʻapí. Ko e tokotaha ko ení ʻe nofo mo ngāue ʻi he kotoa ʻo ʻene moʻuí ʻi he tāpanekale ʻa e ʻOtuá. Ko e tāpanekalé ko ha feituʻu ia naʻe ō ki ai ʻa e kakaí ke lotu ki he ʻOtuá ʻi he taimi ko iá. Sai, naʻe ikuna ʻa Sēfita ʻi he taú! ʻOkú ke ʻiloʻi ʻa e tokotaha naʻe ʻuluaki hū mai ki tuʻa mei hono falé ʻi heʻene foki ki ʻapí?—
ʻIo, ko e ʻofefine ʻo Sēfitá! Ko ʻene taʻahine pē ia ʻe tahá pea ko e taimí ni ʻe ʻave ia ʻe Sēfita. Naʻe hoko eni ʻo loto-mamahi lahi ʻa Sēfita. Kae manatuʻi, naʻá ne ʻosi fai ha palōmesi. ʻI he ʻikai toe veiveiuá, naʻe pehē ʻe hono ʻofefiné: ‘Tangataʻeiki, naʻá ke ʻosi fai ha palōmesi kia Sihova pea kuo pau ke ke fai ki ai.’
ʻI he taʻu kotoa pē, naʻe ʻalu ʻa e ngaahi kaumeʻa ʻo e ʻofefine ʻo Sēfitá ke ʻaʻahi kiate ia
Naʻe loto-mamahi foki mo e ʻofefine ʻo Sēfitá. ʻI he tāpanekalé, ʻe ʻikai lava ke ne mali mo maʻu ha fānau. Ka naʻá ne loto ʻaupito ke fakahoko ʻa e palōmesi ʻene tamaí mo ʻai ʻa Sihova ke fiefia. Naʻe mahuʻinga lahi ange eni kiate ia, ʻi haʻane mali pe maʻu ha fānau. Ko ia ai, naʻá ne mavahe mei ʻapi pea nofo ʻi he tāpanekalé ʻi he toenga ʻo ʻene moʻuí.
ʻOkú ke pehē ko e meʻa naʻá ne faí naʻe fiefia ai ʻene tamaí mo Sihova?— ʻIo, ko ia tofu pē! Kapau ʻokú ke talangofua mo ʻofa kia Sihova, ʻe lava ke ke hangē ko e ʻofefine ʻo Sēfitá. ʻE pehē pē mo koe foki te ke ʻai ke fiefia ʻaupito hoʻo ongo mātuʻá mo Sihova.