Naʻe ʻi Ai ʻa e Ngaahi Kaumeʻa Lelei ʻo Siosaia

ʻOkú ke fakakaukau ʻoku faingataʻa ke fai ʻa e meʻa ʻoku totonú?— ʻOku fakakaukau pehē ʻa e kakai tokolahi. ʻOku tala mai ʻe he Tohi Tapú kiate kitautolu naʻe faingataʻa ʻaupito ki ha kiʻi tamasiʻi naʻe hingoa ko Siosaia ke fai ʻa e meʻa naʻe totonú. Ka naʻe ʻi ai hono ngaahi kaumeʻa lelei naʻa nau tokoniʻi ia. Tau ako lahi angé fekauʻaki mo Siosaia mo hono ngaahi kaumeʻá.

Ko e tamai ʻa Siosaiá ko ʻĀmoni, ko ha tuʻi ʻo Siuta. Naʻe anga-kovi ʻaupito ʻa ʻĀmoni mo lotu ki he ngaahi ʻaitolí. ʻI he taimi naʻe mate ai ʻa e tamai ʻa Siosaiá, naʻe hoko ʻa Siosaia ko e tuʻi ʻo Siuta. Ka naʻá ne kei taʻu valu pē! ʻOkú ke fakakaukau naʻá ne anga-kovi ʻo hangē ko ʻene tamaí?— ʻIkai, naʻe ʻikai ke pehē ia!

Naʻa mo e taimi naʻá ne kei siʻi ʻaupito aí, naʻe loto ʻa Siosaia ke talangofua kia Sihova. Ko ia naʻá ne fili ke kaumeʻa pē mo e kakai naʻa nau ʻofa kia Sihová. Pea naʻa nau tokoni kia Siosaia ke fai ʻa e meʻa ʻoku totonú. Ko hai ʻa e niʻihi ʻo e ngaahi kaumeʻa ʻo Siosaiá?

Ko e taha hono ngaahi kaumeʻá ko Sēfanaia. Ko Sēfanaiá ko ha palōfita naʻá ne fakatokanga ki he kakai ʻo Siutá ʻe hoko ʻa e faingataʻa kia kinautolu kapau te nau lotu ki he ngaahi ʻaitolí. Naʻe fanongo ʻa Siosaia kia Sēfanaia pea lotu kia Sihova kae ʻikai ko e ngaahi ʻaitolí.

Ko e taha ʻi he ngaahi kaumeʻa ʻo Siosaiá ko Selemaia. Naʻá ne mei taʻu tatau pē mo Siosaia pea naʻá na nofo vāofi ʻi heʻena tupu haké. Naʻá na kaumeʻa lelei pea ʻi he taimi naʻe mate ai ʻa Siosaiá naʻe tohi ai ʻe Selemaia ha hiva makehe fekauʻaki mo e lahi ʻo ʻene ʻofa kia Siosaiá. Ko Selemaia mo Siosaiá naʻá na fetokoniʻaki ke fai ʻa e meʻa ʻoku totonú mo talangofua kia Sihova.

Ko e hā ʻe lava ke ke ako meia Siosaiá?— Neongo naʻe kei tamasiʻi ʻa Siosaia, naʻá ne loto ke fai ʻa e meʻa naʻe totonú. Naʻá ne ʻiloʻi ʻoku totonu ke kaumeʻa pē mo e kakai ʻoku nau ʻofa kia Sihová. Fakapapauʻi ʻokú ke fili ʻa e ngaahi kaumeʻa ʻoku ʻofa kia Sihova mo lava ke tokoniʻi koe ke ke fai ʻa e meʻa ʻoku totonú!