Sīsū​—Ko ʻEne Moʻuí mo ʻEne Ngāue Fakafaifekau

Ko e Tangata Koloaʻiá mo Lasalosi

KUO lea ʻa Sīsū ki heʻene kau ākongá ʻo fekauʻaki mo hono ngāuetotonuʻaki ʻa e ngaahi koloa fakamatelié, ʻo ne fakamatala ʻe ʻikai malava ke tau hoko ko e kau sevāniti ki he ngaahi meʻa ko ʻení pea mo hoko ko e kau sevāniti ki he ʻOtuá ʻi he taimi tatau pē. ʻOku fanongo foki ki ai mo e kau Fālesí, pea ʻoku nau kamata taukae kia Sīsū koeʻuhi he ʻoku nau ʻofa ki he paʻangá. Ko ia ʻokú ne pehē kiate kinautolu: “Ko kimoutolu ia ʻoku mou ngaue pe ke hā totonu ki he kakai; ka ʻoku meaʻi ʻe he ʻOtua homou loto: he ko e meʻa ʻoku fungani ʻi he lau ʻa e kakai ko e fakalielia pe ia ʻi he vakai ʻa e ʻOtua.”

Kuo hoko ʻa e taimi ki ha fuʻu liliu lahi ki he kakai ʻa ia ʻoku nau koloaʻia ʻi he ngaahi koloa fakamāmaní, mafai fakapolitikalé, pea mo e pule mo e tākiekina fakalotú. ʻE fakamāʻulaloʻi kinautolu, pea ko kinautolu ʻoku nau ʻilo ʻa ʻenau fiemaʻu fakalaumālié ʻe fakamāʻolungaʻi. ʻOku tuhu ʻa Sīsū ki ha liliu pehē ʻi heʻene hoko atu ʻa ʻene pehē ki he kau Fālesí:

“Naʻe ʻi ai ʻa e Lao mo e kau Palōfita ʻo aʻu kia Sione [ko e Papitaiso]: talu mei ai mo e ongoongoa ʻo e puleʻanga ʻo e ʻOtua, kae ʻohofia ia ʻe he kakai taki taha. Ka ʻoku faingofua ke mole ʻa e langi mo māmani ʻi he tō kelekele ha foʻi kohi ʻe taha ʻo e Lao.”

ʻOku pōlepoleʻaki ʻe he kau sikalaipé mo e kau Fālesí ʻa ʻenau pipiki fakahāhā ki he Lao ʻa Mōsesé. Manatu ki he taimi naʻe fakaʻā ai ʻe Sīsū ʻi ha mana ha tangata kui ʻe taha ʻi Selusalema, naʻa nau pōlepoleʻaki: “Ko kimautolu ko e kau ako ʻa Mōsese. ʻOku mau ʻilo kuo folofola ʻe he ʻOtua kia Mōsese.” Ka kuo fakahoko ʻa e Lao ʻa Mōsesé ʻa hono taumuʻa ko hono tataki ʻa e faʻahinga anga-fakatōkilaló ki he Tuʻi kuo vaheʻi ʻe he ʻOtuá, ko Sīsū Kalaisi. Ko ia, ʻi he kamataʻanga ʻa e ngāue fakafaifekau ʻa Sioné, ko e faʻahinga kotoa pē ʻo e tangatá, tautefito ki he kakai anga-fakatōkilaló mo e masivá, ʻoku nau feinga mālohi ke nau hoko ko e kakai ʻi he malumalu ʻo e Puleʻanga ʻo e ʻOtuá.

Koeʻuhi ʻoku lolotonga fakahoko ʻa e Lao ʻa Mōsesé, ko e fatongiaʻaki ʻa hono tauhí ʻoku toʻo atu ia. ʻOku fakangofua ʻe he Laó ʻa e vete malí ʻi he ngaahi tuʻunga kehekehe, ka ʻoku pehē ʻe Sīsū ia: “ʻIlonga ha taha ʻoku ne vete mali mo hono uaifi, ʻo mali mo ha fefine kehe, ʻoku ne feʻauaki: pea ko ia te ne mali mo ia kuo liʻaki ʻe hono husepāniti, ʻoku ne tono fefine.” Hono ʻikai ke fakatupu ʻita ʻa e ngaahi fakamatala peheé ki he kau Fālesí, tautefito koeʻuhi he ʻoku nau fakangofua ʻa e vete malí ʻi he ngaahi tuʻunga kehekehe lahi ʻaupito!

ʻI hono hoko atu ʻe Sīsū ʻa ʻene lea ki he kau Fālesí, ʻoku tala ʻe Sīsū ha talanoa fakatātā ʻo kau ki ha ongo tangata ʻe ua ʻa ia ko hona tuʻungá, ʻoku faifai atu pē pea liliu lahi ʻaupito. ʻOku lava ke ke ʻilo pe ko e hā ʻoku fakatātaaʻi ʻe he ongo tangata ʻe uá pea mo e ʻuhinga ʻo e fulihi ʻo hona tuʻungá?

ʻOku fakamatala ʻe Sīsū: “Tokua ko e tangata ʻe taha naʻe koloaʻia, pea naʻa ne ʻai maʻu pē ʻa e kofu kulokula mo e lineni mahuʻinga, pea ne kai katoanga ʻi he ʻaho kotoa pē. Pea ai mo ha motuʻa masiva, ko hono hingoa tokua ko Lasalosi, kuo li atu ia feʻunga mo e huʻanga ʻo e fale ʻo e matāpule, ko e toko taha naʻe papala fuʻu. Pea fakaʻamu ia ke ʻomi ʻa e ngaahi meʻa naʻe ngangana mei he tēpile ʻa e koloaʻia ke ne makona ai: ka ko e fanga kulī foki naʻa nau ōmi, ʻo ʻemohia hono papala.”

ʻOku ngāueʻaki heni ʻe Sīsū ʻa e tangata koloaʻiá ke fakatātaaʻi ʻa e kau taki lotu Siú, ʻo kau ki ai ʻo ʻikai ko e kau Fālesí mo e kau sikalaipé pē ka ko e kau Sātusí mo e kau taulaʻeiki lahí foki. ʻOku nau koloaʻia ʻi he ngaahi monū mo e ngaahi faingamālie fakalaumālie, pea ko ʻenau angafaí naʻe hangē ko ia naʻe fai ʻe he tangata koloaʻiá. Ko ʻenau kofu kulokula fakatuʻí ʻokú ne fakatātaaʻi ʻa honau tuʻunga manakoa, pea ko e līneni hinehiná ʻokú ne fakatātaaʻi ʻa ʻenau fie māʻoniʻoní.

Ko e faʻahinga ko ʻeni ʻo e tangata koloaʻia loto-pōlepole ko ʻení ʻoku nau vakai mātuʻaki paetaku ki he kakai masiva mo lāuvalé, ʻo ui kinautolu ko e kau ‛am ha·’aʹrets, pe kakai ʻo e kelekelé [fonua]. Ko e paea ko Lasalosí ʻokú ne fakatātaaʻi ʻa e kakai ko ʻeni ʻa ia ʻoku taʻofi mei ai ʻe he kau taki lotú ʻa e fafangaʻi fakalaumālié mo e ngaahi monū totonu. Ko ia ai, ʻo hangē ko Lasalosí ʻi hono ʻufiʻufi ia ʻe he papalá, ʻoku fai ʻa e sio lalo ki he kakai lāuvalé ko e kakai mahakiʻia fakalaumālie pea ʻoku feʻunga pē ke feohi mo e fanga kulií. Ka, ko kinautolu ʻo e faʻahinga hangē ko Lasalosí ʻoku nau fiekaia mo fieinua ki he meʻakai fakalaumālié pea ʻoku nau ʻi he matapā ko e feinga ke maʻu ha kiʻi momo pē ʻo e meʻakai fakalaumālie ʻe tō nai mei he tēpile ʻa e tangata koloaʻiá.

ʻOku hoko atu ʻeni ʻa Sīsū ke fakamatala ki he ngaahi liliu ʻi he tuʻunga ʻo e tangata koloaʻiá mo Lasalosí. Ko e hā ʻa e ngaahi liliu ko ʻení, pea ko e hā ʻoku nau fakatātaaʻi? Ko e ngaahi fehuʻi ko ʻení ʻe lave ki ai ʻi he ʻīsiu hono hoko mai ʻo ʻemau makasiní. Luke 16:​14-21; Sione 9:28, 29; Mātiu 19:​3-9; Kalētia 3:24; Kolose 2:14.

◆ ʻI he kamata ʻa e ngāue fakafaifekau ʻa Sioné, ko e hā ʻa e liliu ʻoku fakahā ʻe Sīsū ʻoku hokó?

◆ Ko e hā ʻe toʻo atu ʻi he hili ʻa e pekia ʻa Sīsuú, pea ʻe laveʻi fēfē ʻe he meʻá ni ʻa e meʻa ʻo fekauʻaki mo e vete malí?

◆ ʻI he talanoa fakatātā ʻa Sīsuú, ko hai ʻoku fakatātaaʻi ʻe he tangata koloaʻiá mo Lasalosí?

◆ Ko e hā ʻa e fakamatala te tau fakatuʻamelie ki ai ʻi he ʻīsiu hono hoko mai ʻo e makasini ko ʻení?